ເຈົ້າໜ້າທີ່ ປກສ ເມືອງແອດ ຢຶດຢາເສບຕິດ ພ້ອມທັງກັກຕົວຜູ້ຕ້ອງຫາ 2 ຄົນ ມາດຳເນີນຄະດີຕາມລະບຽບກົດໝາຍ

ວັນທີ 23 ມີນາ 2023 ຜ່ານມາ, ເຈົ້າໜ້າທີ່ ປກສ ເມືອງແອດ ໄດ້ອອກກວດກາຕິດຕາມເປົ້າໝາຍຕາມເສັ້ນທາງລະຫວ່າງບ້ານ ເມືອງແອດ – ບ້ານ ຜາແກ້ວ ເມືອງແອດ ແຂວງຫົວພັນ; ຮອດເວລາ 12:00 ນາທີ ເຫັນຜູ້ຕ້ອງສົງໄສຂັບຂີ່ລົດຈັກ ຢາມາຮາ 135 ຊີຊີ; ສີສົ້ມດໍາ ບໍ່ມີປ້າຍທະບຽນ ມາແຕ່ບ້ານຜາແກ້ວ; ສະນັ້ນເຈົ້າໜ້າທີ່ຈຶ່ງຂໍອະນຸຍາດກວດກາຕາມລະບຽບການ ແລ້ວພົບເຫັນ ຂອງກາງຢາເສບຕິດ ປະເພດຢາບ້າ ຈໍານວນ 194 ເມັດ; ເງິນກີບຈໍານວນ 800 000 ກີບ  ( ແປດແສນກີບ ); ຊຸກເຊື່ອງຢູ່ໃນຕົນຕົວຂອງຜູ້ກ່ຽວ; ຈາກນັ້ນເຈົ້າໜ້າທີ່ຈຶ່ງໄດ້ຢຶດເຄື່ອງຂອງກາງຢາເສບຕິດ ພ້ອມທັງກັກຕົວຜູ້ກ່ຽວ ຊຶ່ ທ້າວ ຈັນ ອາຍຸ 30 ປີ; ອາຊີບ ປະຊາຊົນ; ຢູ່ບ້ານ ເມືອງແອດ ເມືອງແອດ ແຂວງຫົວພັນ ນໍາມາສືບສວນ-ສອບສວນ ຜ່ານການ ສືບສວນຂັ້ນເບື້ອງຕົ້ນ ຂອງເຈົ້າໜ້າທີ່ ປກສ ເມືອງແອດ ຜູ້ກ່ຽວໄດ້ຮັບສາລະພາບຂອງກາງດັ່ງກ່າວແມ່ນຂອງຜູ່ກ່ຽວແທ້; ເຊິ່ງຢາບ້າ ໄດ້ຊື້ປະຂາຊົນ ບໍ່ຮູ້ຊຶ່ ຢູ່ບ້ານຜາແກ້ວ ເມືອງແອດ ແຂວງຫົວພັນ.

ເວລາ 15:00 ນາທີ ຂອງວັນດຽວກັນນີ້ ເຈົ້າໜ້າທີ່ ປກສ ເມືອງແອດ ໄດ້ສົມທົບ ກັບກອງບັນຊາການ ທະຫານເມືອງແອດ; ປກສ ກຸ່ມບ້ານນາຄໍາ; ອໍານາດການປົກຄອງບ້ານຜາແກ້ວ; ປກສ ບ້ານ ແລະ ແມ່ຍິງບ້ານ, ເຂົ້າກວດຄົ້ນເຄຫາສະຖານ ເຮືອນຂອງເປົ້າໝາຍ ຈິ່ງພົບເຫັນ ນາງ ເຢຍຊົງ ອາຍຸ 70 ປີ; ປະຊາຊົນ ບ້ານຜາແກ້ວ ເມືອງແອດ ແຂວງຫົວພັນ ແລ້ວເຈົ້າໜ້າທີ່ ໄດ້ກວດຄົ້ນຕົນຕົວຜູ້ກ່ຽວ ໄດ້ພົບເຫັນຂອງກາງ ປະເພດຢາບ້າ ຈໍານວນ 6 ເມັດ ແລະ ໄດ້ກວດຄົ້ນເຄຫາສະຖານເຮືອນຂອງຜູ້ກ່ຽວ ໄດ້ພົບເຫັນຢາບ້າຈໍານວນ 52 ເມັດ; ຝິ່ນ 4 ກ້ອນນ້ອຍ; ຝຸ່ນສີຂາວຄ້າຍຄືເຮໂຣອິນ ຈໍານວນ 1 ຫໍ່ນ້ອຍ ແລະ 4 ແປັບ ຊຸກເຊື່ອງໄວ້ໃນເຮືອນຂອງຜູ້ກ່ຽວ; ຜ່ານການສືບສວນ-ສອບສວນ ຂອງເຈົ້າໜ້າທີ່ ປກສ ເມືອງແອດ ຜູ້ກ່ຽວໄດ້ຮັບສາລະພາບວ່າ ແມ່ນຂອງຜູ້ກ່ຽວແທ້, ສະນັ້ນເຈົ້າໜ້າທີ່ ປກສ ເມືອງແອດ ຈຶ່ງໄດ້ຢຶດຂອງກາງຈໍານວນດັ່ງກ່າວ ພ້ອມທັງຈັບຕົວພວກກ່ຽວມາດໍາເນີນການສືບສວນ-ສອບສວນ ຫາກຸ່ມແກ້ງຮ່ວມຂະບວນການ ເພື່ອມາດໍາເນີນຄະດີຕາມຂັ້ນຕອນຂອງກົດໝາຍ.

ແຫຼ່ງຂ່າວ: ປກສ ເມືອງແອດ