3 ເດືອນຕົ້ນປີ 2023 ແຂວງຄຳມ່ວນມີບໍລິສັດ ຂຸດຄົ້ນແຮ່ເຫລັກແບບທົດລອງ 9 ໂຄງການ ມູນຄ່າ 278 ຕື້ກວ່າກີບ
ທ່ານ ເດດສັກດາ ມະນີຄຳ ຫົວໜ້າພະແນກແຜນການ ແລະ ການລົງທຶນ ແຂວງຄຳມ່ວນ ເນື່ອງໃນໂອກາດ ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ພ້ອມຄະນະໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກ ໃນວັນທີ 22 ມີນາ 2023 ຜ່ານມານີ້ວ່າ: ປີ 2022 ຜ່ານມາໄດ້ ກວດກາ ແລະ ປະເມີນຄືນບັນດາໂຄງການນອກແຜນຈາກພະແນກການ ແລະ ບັນດາເມືອງທີ່ສະເໜີເຂົ້າແຜນລົງທຶນຂອງລັດທີ່ໄດ້ຈັດຕັ້ງປະຕິບັດມີທັງໝົດ 96 ໂຄງການ, ສະເໜີເຂົ້າແຜນ 2023 ໄດ້ທັງໝົດ 52 ໂຄງການ. ການລົງທຶນໃນກິດຈະການສຳປະທານ ແລະ ກິດຈະການທົ່ວໄປ (ທີ່ນອນໃນບັນຊີຄວບຄຸມ) ຂອງເອກະຊົນພາຍໃນ ແລະ ຕ່າງປະເທດພາຍໃນແຂວງລວມທັງໝົດ 192 ໂຄງການມູນຄ່າການລົງທຶນທັງໝົດ 7.088,06 ລ້ານໂດລາສະຫະລັດ, ທຶນຈົດທະບຽນ 2.793,42 ລ້ານໂດລາສະຫະລັດ. ລາຍລະອຽດຄື: ກິດຈະການສໍາປະທານ ທັງໝົດ 190 ໂຄງການ, ມູນຄ່າການລົງທຶນທັງໝົດ 7.085,08 ລ້ານໂດລາສະຫະລັດ, ທຶນຈົດທະບຽນ 2.790,66 ລ້ານໂດລາສະຫະລັດ; ກິດ ຈະການທົ່ວໄປ (ນອນໃນບັນຊີຄວບຄຸມ) ທັງໝົດ 2 ໂຄງການ, ມູນຄ່າການລົງທຶນທັງໝົດ 2,9 ລ້ານໂດລາສະຫະລັດ ແລະ ທຶນຈົດທະບຽນ 2,7 ລ້ານໂດລາສະຫະລັດ. ໃນນີ້ຂັ້ນສູນກາງອະນຸຍາດ ທັງໝົດ 71 ໂຄງການ, ມູນຄ່າທັງໝົດ 6.729,57 ລ້ານໂດລາສະຫະລັດ, ທຶນຈົດທະບຽນ 2.550,41 ລ້ານໂດລາສະຫະລັດ; ຂັ້ນແຂວງອະນຸຍາດ ທັງໝົດ 121 ໂຄງການ, ມູນຄ່າທັງໝົດ 358,4 ລ້ານໂດລາສະຫະລັດ, ທຶນຈົດທະບຽນ 243,01 ຕື້ກີບ.
ໄລຍະ 3 ເດືອນຕົ້ນປີ 2023 ນີ້, ສາມາດລົງຕິດຕາມກວດກາສຳເລັດແລ້ວ 15 ບໍລິສັດ. ບໍລິສັດການຂຸດຄົ້ນແຮ່ເຫລັກແບບທົດລອງ ທັງໝົດ 9 ໂຄງການ, ມີເນື້ອທີ່ສໍາປະທານ 23,56 ກິໂລຕາແມັດ, ກວມເອົາ 3 ເມືອງຄື: ເມືອງບົວລະພາ 3 ໂຄງການ, ເມືອງຫີນບູນ 5 ໂຄງການ, ເມືອງຄູນຄໍາ 1 ໂຄງການ, ມູນຄ່າລົງທຶນທັງໝົດ 278,77 ຕື້ກີບ, ທຶນຈົດທະບຽນ 162,42 ຕື້ກີບ, ສາມາດຜະລິດແຮ່ເຫລັກໄດ້ທັງໝົດ 1.035.000 ໂຕນ ແລະ ປັດຈຸບັນສົ່ງອອກແລ້ວ 13.175 ກວ່າໂຕນ.
