ອິນເດຍ ເພີ່ມການໃຊ້ລົດໂດຍສານໄຟຟ້າ-ພະລັງງານແສງຕາເວັນ ເພື່ອຄວບຄຸມມົນລະພິດທາງອາກາດໃຫ້ຫລຸດລົງຫລາຍທີ່ສຸດ
ສຳນັກຂ່າວຣອຍເຕີລາຍງານວ່າ: ກະຊວງການເງິນ ອິນເດຍເປີດເຜີຍວ່າ: ນະຄອນຫລວງ ນີວແດນລີຂອງອິນເດຍ ແລະ ເມືອງໃຫຍ່ ແຫ່ງຕ່າງໆພວມເດີນໜ້າຂະຫຍາຍການໃຫ້ ບໍລິການ ລົດໂດຍສານໄຟຟ້າ ແລະ ການໃຊ້ພະລັງງານ ແສງຕາເວັນເພີ່ມອີກ 3 ປີ ຕໍ່ໜ້າ ເພື່ອຄວບຄຸມມົນລະພິດທາງອາກາດ ໃຫ້ຫລຸດລົງຫລາຍທີ່ສຸດ ຫລັງຈາກບັນດາເມືອງໃຫຍ່ ມີມົນລະພິດຫລາຍທີ່ສຸດໃນໂລກຍ້ອນບັນຫາ ຄວັນໄຟໜາແໜ້ນ ໃນລະດູໜາວຂອງທຸກໆປີ ເນື່ອງຈາກ ອາກາດເຢັນ ແລະ ໜາແໜ້ນ ຈະດັກຈັບຂີ້ຝຸ່ນ ທີ່ມາຈາກ ການກໍ່ສ້າງ, ການປ່ອຍອາຍພິດຂອງຍານພາຫະນະ ແລະ ຄວັນໄຟ ເຮັດໃຫ້ ຊາວເມືອງ ຫລາຍກວ່າ 20 ລ້ານຄົນ ມີຄວາມສ່ຽງສູງ ທີ່ຈະເປັນພະຍາດ ທາງເດີນ ຫາຍໃຈ ຫລາຍຂຶ້ນ.
ຢ່າງໃດກໍ່ຕາມ, ຈາກການສະເໜີ ງົບປະມານຂອງນະຄອນຫລວງທ່ານ ໄກຣລາສ ກາຫລອດ(Kailas Gahlot),ລັດຖະມົນຕີ ກະຊວງ ການເງິນ ໄດ້ກ່າວເນັ້ນວ່າ: ຝຸ່ນລະອອງ ຂະໜາດນ້ອຍ ຫລື PM 2.5 ໄດ້ຫລຸດລົງ 30% ເມື່ອທຽບໃສ່ ໄລຍະ 8 ປີຜ່ານມາ. ຂະນະນີ້ ລັດຖະບານ ອິນເດຍ ພວມເລັ່ງຂະຫຍາຍ ການບໍລິການ ລົດໂດຍສານ ໄຟຟ້າ ໃນຕົວເມືອງ ເພີ່ມຂຶ້ນ 27 ເທົ່າ ເພື່ອຫລຸດ ການປ່ອຍອາຍຄາບອນ ໄດອອກໄຊ ດ້ວຍການເພີ່ມລົດໄຟຟ້າ ຈຳນວນ 8.280 ຄັນ ພາຍໃນ ທ້າຍປີ 2025 ຈາກ ປັດຈຸບັນ ມີຢູ່ ປະມານ 300 ຄັນ ຊຶ່ງຈະເຮັດໃຫ້ ການປ່ອຍ ຄາບອນ ໄດອອກໄຊ ປະມານ 4,6 ແສນໂຕນ ຫລຸດລົງ ໃນແຕ່ລະປີ.ນອກນີ້ ຍັງຈະໃຊ້ ພະລັງ ງານ ແສງຕາເວັນ ເພື່ອຕອບສະໜອງ ຄວາມຕ້ອງການ ໄຟຟ້າ ຕໍ່ປີ ຂອງເມືອງ ໃຫ້ໄດ້25% ໃນອີກ 3ປີຕໍ່ໜ້າ ເນື່ອງຈາກປັດຈຸບັນ ພະລັງງານ ແສງ ຕາເວັນ ມີສ່ວນຊ່ວຍ ໃນການ ຕອບສະໜອງ ຕໍ່ຄວາມຕ້ອງການ ດັ່ງກ່າວ ຂອງນະຄອນ ຫລວງ ນີວແດນລີ ລະດັບ 9%.
