ເປຣູກຽມມອບເງິນກວ່າ 1 ພັນລ້ານໂດລາ ເພື່ອຮັບມືບັນຫາໂລກປັ່ນປ່ວນ
ລັດຖະບານເປຣູກຽມມອບເງິນກວ່າ 1,06 ພັນລ້ານໂດລາ ເພື່ອອອກມາດຕະການແກ້ໄຂບັນຫາດ້ານສະພາບອາກາດ ໂດຍກຽມເດີນໜ້າປ້ອງກັນ ແລະ ຄວບຄຸມຜົນກະທົບທີ່ເກີດຈາກການປ່ຽນແປງຂອງສະພາບອາກາດ ລວມທັງປາກົດການເອລນີໂຢ.
ທັງນີ້, ເອລນີໂຢເປັນປາກົດການທາງທໍາມະຊາດທີ່ເກີດຂຶ້ນເມື່ອກະແສລົມມີກໍາລັງອ່ອນ ແລະ ພັດປ່ຽນທິດທາງຈາກທາງຕາເວັນອອກຂອງມະຫາສະໝຸດປາຊີຟິກໄປທາງຕາເວັນຕົກຂອງມະຫາສະໝຸດປາຊີຟິກ ເຮັດໃຫ້ກະແສນໍ້າອຸ່ນໄຫລໄປທະວີບອາເມລິກາໃຕ້ແທນ ເຊິ່ງຈະເຮັດໃຫ້ຝັ່ງຂອງອາຊີຕາເວັນອອກສຽງໃຕ້ ແລະ ອົດສະຕຣາລີເກີດສະພາບແຫ້ງແລ້ງ, ແຕ່ເຂດອາເມລິກາໃຕ້ພັດຜະເຊີນຝົນຕົກໜັກ ໂດຍເປຣູມັກຈະພົບບັນຫາຝົນຕົກໜັກ ຈົນເຮັດໃຫ້ເກີດນໍ້າຖ້ວມໃນໄລຍະເດືອນເມສາເປັນຕົ້ນໄປ.
ທ່ານ ອາເລັກ ຄອນເຕຣຣາສ ລັດຖະມົນຕີກະຊວງເສດຖະກິດ ໄດ້ປະກາດການຕັດສິນໃຈດັ່ງກ່າວໃນລະຫວ່າງກອງປະຊຸມຄະນະລັດຖະບານຮ່ວມກັບທ່ານ ນາງ ດີນາ ໂບລູອາເຕ ປະທານາທິບໍດີຂອງເປຣູ ໂດຍເນັ້ນເຖິງ “ຄວາມສ່ຽງທີ່ສໍາຄັນ” ຈາກສະພາບໂລກປັ່ນປ່ວນທີ່ອາດສົ່ງຜົນກະທົບຕໍ່ເສດຖະກິດຂອງປະເທດໄດ້.
ກ່ອນໜ້ານີ້, ເປຣູຜະເຊີນພາຍຸຢາຄູ ໂດຍອິດທິພົນຂອງພາຍຸໄດ້ເຮັດໃຫ້ເກີດລົມພັດແຮງ, ຝົນຕົກໜັກ ແລະ ມີນໍ້າຖ້ວມສູງ ທໍາລາຍເຮືອນຊານເສຍຫາຍຫລາຍຫລັງ. ອີກທັງຍັງມີຜູ້ເສຍຊີວິດຈາກເຫດການດັ່ງກ່າວ. ສໍາລັບຕົວເລກຄວາມເສຍຫາຍນັ້ນ ລັດຖະບານປະເມີນວ່າ: ສະເພາະໂຄງລ່າງພື້ນຖານທີ່ຕ້ອງສ້ອມແປງມີມູນຄ່າສູງກວ່າ 300 ລ້ານໂດລາແລ້ວ.
ອ້າງອີງ:
https://www.reuters.com/…/peru-spend-more-than-1-bln…/
