ແຂວງອັດຕະປື ພົບພະນັກງານພົວພັນສໍ້ລາດບັງຫລວງ 14 ຄົນ ມູນຄ່າເສຍຫາຍ 2,5 ຕື້ກວ່າກີບ ແລະ ພະນັກງານລັດພົວພັນກັບການຂຸດຄົ້ນແຮ່ທາດເກີນໂກຕ້າ 33 ຄົນ
ທ່ານ ມີໄຊ ສີສະແຫວງສຸກ ຮອງປະທານກວດກາພັກ ແຂວງອັດຕະປື ລາຍງານກອງປະຊຸມສະຫລຸບວຽກງານກວດກາປະຈຳປີ 2022 ແລະ ແຜນການປີ 2023 ໃນວັນທີ 24 ມີນາ 2023 ນີ້ວ່າ:
ຄະນະພັກແຕ່ລະຂັ້ນໄດ້ເຄື່ອນໄຫວ ນຳພາ-ຊີ້ນຳ ວຽກງານໃນຄວາມຮັບຜິດ ຊອບຂອງຂັ້ນຕົນຢ່າງຕັ້ງໜ້າ, ມີຄວາມເດັດຂາດ, ເຂັ້ມງວດດ້ານລະບຽບວິໄນ ແລະ ລະບຽບກົດໝາຍ ແລະ ແກ້ໄຂຜົນຂອງການຕິດຕາມກວດກາມີຄວາມສັກສິດ.
ອັນທີ່ພົ້ນເດັ່ນ ແມ່ນການຕິດຕາມກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຂອງແຂວງ, ເຊິ່ງໄດ້ ຊຸກຍູ້ ແລະ ຕິດຕາມຂະແໜງການກ່ຽວຂ້ອງ, ລົງກວດກາໂຄງການກໍ່ສ້າງທາງ 18A ປູຢາງ 2 ຊັ້ນ ມີ 12 ສັນຍາແຕ່ບ້ານປີນດົງ – ຫ້ວຍອຸກ ເມືອງສະໜາມໄຊ,ໄດ້ຊຸກຍູ້ ຕິດຕາມພາກສ່ວນທີ່ກ່ຽວຂ້ອງລົງກວດກາ ເກັບກໍາຂໍ້ມູນການຈັບຈ່ອງດິນຂອງປະຊາຊົນຢູ່ເຂດພື້ນທີ່ສະໜາມກີລາຂອງແຂວງຢູ່ບ້ານພອກ, ເມືອງໄຊເສດຖາ ມີການບຸກເບີກຂອງປະຊາຊົນ 13 ຄອບຄົວເນື້ອທີ່ 5 ກວ່າເຮັກຕາ.
ວຽກງານຕ້ານ ແລະ ສອບສວນການສໍ້ລາດບັງຫຼວງ ໄດ້ກວດກາພົບເຫັນພະນັກງານລັດ ທີ່ມີພຶດຕິກໍາ ສໍ້ລາດບັງຫຼວງ ແລະ ດຳເນີນການສືບສວນ-ສອບສວນຈຳນວນ 2 ກໍລະນີ ຄືພະນັກງານການເງິນເມືອງພູວົງ ພົບເຫັນຄວາມເສຍຫາຍເປັນເງິນ 1,5 ຕື້ກວ່າກີບ, ແລະ ເກັບກູ້ຄືນໄດ້ແລ້ວ 160 ລ້ານກີບ, ຍັງຄ້າງ 1,3 ຕື້ກວ່າກີບ ຕໍ່ກັບຄະດີດັ່ງກ່າວ ໄດ້ເຮັດບົດສະຫລຸບຊັດມ້ຽນຄະດີ ເພາະວ່າຜູ້ກ່ຽວແມ່ນເສຍຊີວິດຢູ່ໃນຄ້າຍຄຸມຂັງຊ່ວງດຳເນີນ ການສືບສວນ-ສອບສວນ ແລະ ມີ 14 ຄົນ ທີ່ກ່ຽວພັນ ແມ່ນຢູ່ໃນຂັ້ນຕອນກະກຽມສົ່ງສຳນວນໃຫ້ອົງການໄອຍະການປະຊາຊົນແຂວງ ເພື່ອດໍາເນີນຕາມກົດໝາຍ, ພົບພະນັກງານລັດສັງກັດຢູ່ພະແນກກະສິກຳ-ປ່າໄມ້ແຂວງ ພົບເຫັນຜົນເສຍຫາຍເປັນເງິນຈຳນວນ 1,5 ຕື້ກວ່າກີບ, ເກັບກູ້ຄືນໄດ້ 284 ລ້ານກວ່າກີບ, ຍັງຄ້າງ 1,2 ຕື້ກວ່າກີບ, ສຳນວນຄະດີດັ່ງກ່າວ ແມ່ນໄດ້ສົ່ງໃຫ້ອົງການໄອຍະການປະຊາຊົນ ແຂວງ ເພື່ອດໍາເນີນຕາມກົດໝາຍ ລໍຖ້າແຕ່ສານຕັດສິນ.
ນອກນັ້ນຍັງໄດ້ຮ່ວມກັບໜ່ວຍງານສູນກາງດຳເນີນການກວດກາ ແລະ ສືບສວນ-ສອບສວນ ບໍລິສັດ ລາວຫວ້ານເລີ້ຍ ບໍ່ແຮ່ຈຳກັດ ທີ່ໄດ້ຮັບອະນຸຍາດເກັບກູ້-ປຸງແຕ່ງແຮ່ຄຳຢູ່ເຂດບ້ານ ນ້ຳຊວນ ເມືອງພູວົງ ພົບເຫັນບໍລິມາດແຮ່ຂຸດ ຄົ້ນເກີນອະນຸຍາດຈໍານວນ 71 ກວ່າແມັດກ້ອນ, ມູນຄ່າ 6 ແສນກວ່າໂດລາ ແລະ ມີພະນັກງງານລັດຂັ້ນສູນກາງ ແລະ ແຂວງກ່ຽວພັນຈຳນວນ 33 ຄົນ, ໃນນີ້ ຂັ້ນແຂວງ 17 ຄົນ ຍັງຢູ່ຂັ້ນຕອນການປະຕິບັດຜົນຂອງການກວດກາ.
