ແຈ້ງການ ໃຫ້ຢຸດເຊົາຕະຫລາດກາງຄືນເຂດສີຫອມ
ວັນທີ 24 ມີນາ 2023, ທ່ານ ນັນຕາ ສານຸວົງ, ຮອງຫົວໜ້າພະແນກອຸດສາຫະກໍາ ແລະ ການຄ້ານະຄອນ ຫລວງວຽງຈັນ ຮ່ວມກັບຜູ້ຕາງໜ້າຈາກອົງການປົກຄອງເມືອງຈັນທະບູລີ ໄດ້ພ້ອມກັນຖະແຫລງຂ່າວຢູ່ພະແນກອຸດສາຫະກໍາ ແລະ ການຄ້ານະຄອນຫລວງວຽງຈັນ ກ່ຽວກັບກໍລະນີແຈ້ງໃຫ້ຢຸດເຊົາການຄ້ານ-ຂາຍຢູ່ຕະຫລາດກາງຄືນ ຖະໜົນແຫ່ງບຸນ ບ້ານຫາຍໂສກ, ເມືອງຈັນທະບູລີ.
ທ່ານໄດ້ຊີ້ແຈງວ່າ: ສາເຫດທີ່ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໄດ້ອອກແຈ້ງການ ເພື່ອຂໍຄວາມຮ່ວມມືໃຫ້ຢຸດເຊົາການດໍາເນີນທຸລະກິດຈັດສັນຕະຫຼາດກາງຄືນດັ່ງກ່າວ ແມ່ນເພື່ອເປັນການຜັນຂະຫຍາຍການຈັດຕັ້ງປະຕິບັດແຜນການພັດທະນານະຄອນຫຼວງວຽງຈັນ ຕາມທິດ 6 ສ ທີ່ໄດ້ວາງອອກ ແລະ ເພື່ອກະກຽມໃຫ້ແກ່ການຈັດສັນລະບົບການສັນຈອນພາຍໃນຕົວເມືອງຈັນທະບູລີ ໃຫ້ໄປຕາມແຜນການທີ່ໄດ້ອອກແບບ ແລະ ວາງໄວ້, ທັງເປັນການກຽມຄວາມພ້ອມໃຫ້ແກ່ການຕ້ອນຮັບແຂກໃນໄລຍະທີ່ ສປປ ລາວ ໄດ້ຮັບກຽດເປັນເຈົ້າພາບຈັດກອງປະ ຊຸມອາຊຽນທີ່ຈະມາເຖິງ.
ສະພາບການຄ້າ-ຂາຍຢູ່ຈຸດດັ່ງກ່າວ ປັດຈຸບັນມີທັງໝົດ 204 ຮ້ານ, ຈາກເບື້ອງຕົ້ນມີພຽງ 40 ຮ້ານ, ໃນນັ້ນ: ເບື້ອງທະນາຄານສົ່ງເສີມກະສິກຳ ມີ 88 ຮ້ານ, ເບື້ອງກົງກັນຂ້າມ ມີ 90 ຮ້ານ, ຂະຫຍາຍມາເບື້ອງຫໍວັດທະນະທຳແຫ່ງຊາດ 26 ຮ້ານ ( ໃນ 204 ຮ້ານ ແມ່ນຂາຍສິນຄ້າປະເພດ: ສິນຄ້າຜະລິດພາຍໃນ 45 ຮ້ານ) ຕາມການເກັບກຳຂໍ້ມູນເຈົ້າຂອງຮ້ານສ່ວນຫຼາຍແມ່ນຂີ່ລົດໃຫຍ່ມາຂາຍເຄື່ອງ (ປັດຈຸບັນ ຫໍວັດທະນະທຳແຫ່ງຊາດ ແມ່ນເປີດປະຕູໃຫ້ລົດເຂົ້າໄປຈອດ ແລະ ບໍລິການຝາກ), ລົດຈຳນວນໜຶ່ງແມ່ນຈອດຕາມທາງຮ່ອມທາງຊອຍ ແລະ ມີການປິດຊອຍນ້ອຍເພື່ອໃຫ້ລູກຄ້ານັ່ງກິນ ແລະ ຝາກລົດ 2 ຊອຍ ເຊິ່ງເຫັນວ່າບໍ່ມີຄວາມເປັນລະບຽບຮຽບຮ້ອຍ ເນື່ອງຈາກຢູ່ຈຸດດັ່ງກ່າວເປັນເສັ້ນທາງເຂດຊຸມຊົນ, ມີຜົນກະທົບຕໍ່ຜູ້ສັນຈອນຕາມທ້ອງຖະໜົນ, ສ້າງຄວາມເປິະເປື້ອນຍ້ອນບໍ່ມີຫ້ອງນໍ້າ ແລະ ບັນຫາອື່ນໆ.
ການຈັດຕັ້ງປະຕິບັດໃນຄັ້ງນີ້ ແມ່ນອີງໃສ່ກົດໝາຍວ່າດ້ວຍທາງຫຼວງ ( ສະບັບປັບປຸງ ) ເລກທີ 03/ສພຊ; ລົງວັນທີ 3 ພະຈິກ 2016 ແລະ ຂໍ້ຕົກລົງວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ສະບັບເລກທີ 1184 /ຈນວ, ລົງວັນ ທີ 20 ທັນວາ 2017 ພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ ໃນນາມຄະນະກໍາມະການຈັດສັນ, ຄຸ້ມຄອງຕະຫຼາດ, ສູນການຄ້າ ແລະ ຮ້ານສັບພະສິນຄ້ານະ ຄອນຫຼວງວຽງຈັນ ໄດ້ອອກແຈ້ງການ 02 ຄັ້ງ, ຄັ້ງທີ 1 ສະບັບເລກທີ 0193 /ພອຄ.ນວ.ຄພນ, ລົງວັນທີ 3 ກຸມພາ 2023 ແລະ ຄັ້ງທີ 2 ເລກທີ 0457 /ພອຄ.ນວ.ຄພນ, ລົງວັນທີ 23 ມີນາ 2023 ໂດຍມີເນື້ອໃນ ຄື:
– ຜູ້ປະກອບການ, ພໍ່ຄ້າຊາວຂາຍ ທີ່ດຳເນີນການບໍລິການ ແລະ ຂາຍໃນສະຖານທີ່ທາງຄົນຍ່າງ, ໃຊ້ເນື້ອທີ່ທາງເປັນບ່ອນບໍລິການຊື້ – ຂາຍ ໃຫ້ກະກຽມຢຸດເຊົາ ແລະ ຍົກຍ້າຍອອກໄປຂາຍຢູ່ສະຖານທີ່ໃໝ່ ທີ່ໄດ້ຮັບອະນຸຍາດ ເລີ່ມແຕ່ວັນທີ 24 ມີນາ 2023 ເປັນຕົ້ນໄປ.
– ສຳລັບຜູ້ປະກອບການ, ພໍ່ຄ້າຊາວຂາຍທີ່ເນີນການບໍລິການ ແລະ ຂາຍຢູ່ພາຍໃນອາຄານ ຫລື ຫ້ອງແຖວ ແມ່ນໃຫ້ເອົາ ໃຈໃສ່ຈັດສັນສິນຄ້າ ແລະ ການບໍລິການຢູ່ພາຍໃນພື້ນທີ່ຂອງຕົນເອງບໍ່ໃຫ້ລາມອອກມາໃສ່ທາງຍ່າງ ແລະ ເສັ້ນທາງເດັດ ຂາດ ພ້ອມທັງມີການຕົກແຕ່ງຮ້ານໃຫ້ມີຄວາມຈົບງາມ.
– ຜູ້ປະກອບການ, ພໍ່ຄ້າ, ຊາວຄ້າຂາຍທີ່ດໍາເນີນການບໍລິການຢູ່ຈຸດດັ່ງກ່າວ ຈົ່ງໃຫ້ການຮ່ວມມືກັບຄະນະກໍາມະການທີ່ລົງຈັດຕັ້ງປະຕິບັດໃນຄັ້ງນີ້.
– ການຈັດຕັ້ງທຸກພາກສ່ວນ, ຜູ້ປະກອບການ ແລະ ຊາວຄ້າຂາຍ ຈົ່ງໃຫ້ຄວາມຮ່ວມມືໃນການຈັດ ສັນໃນຄັ້ງນີ້. ຖ້າມີການລະເມີດຈະໄດ້ປະຕິບັດຕາມລະບຽບການ; ແຈ້ງການສະບັບນີ້ປ່ຽນແທນແຈ້ງການສະບັບເລກທີ 0193/ ພອຄ.ນວ.ຄພນ, ລົງວັນທີ 3 ກຸມພາ 2023.
ຫຼັງຈາກນັ້ນ, ໃນວັນທີ 23 ມີນາ 2023 ຄະນະກໍາມະການ ກໍ່ໄດ້ໄປລົງໂຄສະນາເຜີຍແຜ່ແຈ້ງການ ໂດຍນຳໃຊ້ລົດຕິດຕັ້ງໂທລະໂຄ່ງໄປໂຄສະນາ ໂດຍໄດ້ເອກະພາບກັນຢູ່ຫ້ອງການບ້ານກ່ອນຈະລົງໄປໂຄສະນາ, ສ່ວນວັນທີ 24 ມີນາ 2023 ທາງຄະນະກໍາມະການ ໄດ້ລົງປະຈຳຢູ່ພື້ນທີ່ດັ່ງກ່າວເພື່ອບໍ່ໃຫ້ຊາວຄ້າຂາຍມາຂາຍອີກ, ຖ້າຍັງມີບຸກຄົນໃດມາຂາຍຈະໄດ້ເຮັດບົດບັນທຶກ, ສຶກສາອົບຮົມກ່າວເຕືອນ, ຖ້າຍັງດື້ດ້ານຈະໄດ້ຍຶດເຄື່ອງຂອງ ແລະ ອຸປະກອນທີ່ນໍາໃຊ້ເຂົ້າໃນການຄ້າຂາຍ ຫຼື ອາດດຳເນີນການຕາມລະບຽບກົດໝາຍ.
ຮອງຫົວໜ້າພະແນກອຸດສາຫະກໍາ ແລະ ການຄ້ານະຄອນຫລວງວຽງຈັນ ໃຫ້ຮູ້ຕື່ມວ່າ: ເພື່ອໃຫ້ຊາວຄ້າ-ຂາຍໄດ້ເຂົ້າໄປຂາຍສິນຄ້າໃນຈຸດອື່ນໆ ທາງພະແນກຈະໄດ້ປະສານສົມທົບກັບເມືອງໃກ້ຄຽງ ຄື: ເມືອງສີສັດຕະນາກ ແລະເມືອງສີໂຄດຕະບອງ ເພື່ອກຽມຮັບເອົາຊາວຄ້າຂາຍ ແລະ ບໍລິການ. ເຊີ່ງຈຸດທີ່ຍັງມີພື້ນທີ່ໃຫ້ເຂົ້າໄປຂາຍສະເພາະຂອງເມືອງຈັນທະບູລີ ທີ່ດໍາເນີນຢູ່ແມ່ນພັກລຸ່ມແຄມຂອງສວນເຈົ້າອານຸວົງ, ຈຸດຂາຍອາຫານຫຼັງໂຮງຮຽນວິຈິດສິນ, ສ່ວນຢູ່ເມືອງສີສັດຕະນາກ ແມ່ນຍັງຄົ້ນຄວ້ານໍາສະເໜີຢູ່ຄາດໄວ້ມີ 2 ຈຸດທີ່ບໍ່ໃຊ້ເສັ້ນທາງດຳເນີນທຸລະກິດ ມີຢູ່ແຄມຂອງ (ໂລກໃໝ່ແຫ່ງວຽງຈັນ ), ຂ້າງໂຄງການວຽງ ຈັນນິວໄລຟ. ສໍາລັບຢູ່ເມືອງສີໂຄດ ແມ່ນແຄມຂອງທີ່ມີການບໍລິການຢູ່.
