ບາເຢີນ ມິວນິກ ສັ່ງປົດດ່ວນ ນາເກລມັນ ກຽມຕັ້ງ ທູເຄິນ ຄຸມທີມແທນ
ບາເຢິນ ມິວນິກ ສະໂມສອນຍັກໃຫຍ່ຂອງ ບຸນເດສລີກາ ໄດ້ຕັດສິນໃຈປົດ ຈູລຽນ ນາເກລສມັນ ອອກຈາກຕຳແໜ່ງຜູ້ຈັດການທີມແລ້ວ, ໜັງສືພິມ Bild ຂອງເຢຍລະມັນ ລາຍງານ. ພ້ອມກຽມແຕ່ງຕັ້ງ ໂທມັສ ທູເຄິນ ອະດີດນາຍໃຫຍ່ຂອງ ໂບຣຸສເຊຍ ດັອດມຸນ, ປາຣີ ແຊັງ-ແຊັກແມັງ ແລະ ເຊວຊີ ເຂົ້າມາເຮັດໜ້າທີ່ແທນ.
ນາເກລສມັນ ອາຍຸ 35 ປີໄດ້ມາຄຸມ ບາເຢິນ ມິວນິກ ຕັ້ງແຕ່ປີ 2021 ແລະ ນໍາພາສະໂມສອນເປັນແຊ້ມ ບຸນເດສລີກາ ເປັນສະໄໝທີ່ 10 ຕິດຕໍ່ກັນໃນລະດູການທີ່ຜ່ານມາ. ແຕ່ຜົນງານຂອງທີມໃນລະດູການນີ້ຍັງບໍ່ເປັນທີ່ໜ້າພໍໃຈຂອງຄະນະບໍລິຫານງານ ໂດຍຫລ້າສຸດບຸກເສຍໃຫ້ ໄບເອີນ ເລເວີຄູເຊນ 1-2 ໃນເກມລີກເມື່ອທ້າຍອາທິດທີ່ຜ່ານມາ. ສົ່ງຜົນໃຫ້ທີມຕົກຈາກຕາຕະລາງ ໄລ່ຕາມຫລັງ ໂບຣຸສເຊຍ ດັອດມຸນ 1 ຄະແນນ, ຈົນນຳມາເຖິງການປົດອອກຈາກຕຳແໜ່ງ. ເຖິງແມ່ນວ່າຈະນໍາທີມໄປສູ່ຮອບກ່ອນຮອງຊະນະເລີດໃນ UEFA Champions League ກໍ່ຕາມ.
ຂະນະດຽວກັນ, ມີລາຍງານວ່າ “ເສືອໃຕ້” ກຽມແຕ່ງຕັ້ງ ໂທມັສ ທູເຄິນ ເປັນຄູຝຶກຄົນໃໝ່ຂອງທີມທັນທີ ແລະ ມີຂ່າວວ່າທັງສອງຝ່າຍໄດ້ບັນລຸຂໍ້ຕົກລົງແລ້ວໂດຍຄູຝຶກສອນອາຍຸ 49 ປີ ຖືກ ເຊວຊີ ປົດອອກຈາກຕຳແໜ່ງໃນຊ່ວງເລີ່ມຕົ້ນຂອງລະດູການນີ້. ແລະ ອາດຈະເຊັນສັນຍາຄຸມທັບໃນຖິ່ນ ອາລິອັນ ເປັນເວລາ 2 ປີ ແລະ ຈະເລີ່ມຄຸມທີມຝຶກຊ້ອມຕັ້ງແຕ່ວັນຈັນເປັນຕົ້ນໄປ.
