ປະທານສານປະຊາຊົນສູງສຸດ ເນັ້ນໃຫ້ສານປະຊາຊົນເຂດ IV ຕ້ອງເດັດດ່ຽວ ແລະ ເຂັ້ມງວດທີ່ສຸດໃນການ ຕັດສິນຄະດີ ເພື່ອຮັບປະກັນຄວາມເປັນເອກະພາບ

ວັນທີ 22 ມີນາ 2023 ຜ່ານມາ, ທ່ານ ສຈ ປອ ນາງ ວຽງທອງ ສີພັນດອນ ປະທານສານປະຊາຊົນສູງສຸດ (ສປຊສ) ລົງເຄື່ອນໄຫວຢ້ຽມຢາມ ແລະ ຊີ້ນໍາວຽກງານຢູ່ສານປະຊາຊົນເຂດ IV ນະຄອນຫລວງວຽງຈັນ ໂດຍການຕ້ອນຮັບຂອງທ່ານ ສົມພາວັນ ລາດຊະວົງ ຮັກສາການປະທານສານປະຊາຊົນເຂດ IV ນະຄອນຫລວງວຽງຈັນ, ມີຮອງປະທານສານປະຊາຊົນສູງສຸດ, ຄະນະປະຈໍາພັກເມືອງ, ຫົວໜ້າຫ້ອງການອ້ອມຂ້າງເມືອງ, ພະນັກງານ-ຜູ້ພິພາກສາຂອງສານປະຊາຊົນເຂດ IV ນວ ເຂົ້າຮ່ວມ.

ທ່ານ ນາງ ວຽງທອງ ສີພັນດອນ ເນັ້ນໃຫ້ຄະນະປະທານສານປະຊາຊົນເຂດ IV ນະຄອນຫລວງວຽງຈັນ (ນວ) ໂດຍສະເພາະແມ່ນພະນັກງານຂອງສານ ເອົາໃຈໃສ່ຕໍ່ຫລາຍບັນຫາທີ່ສໍາຄັນ ເປັນຕົ້ນແມ່ນ ກ່ອນອື່ນໝົດຕ້ອງສ້າງຄວາມຮັບຮູ້, ເຂົ້າໃຈທີ່ຖືກຕ້ອງ ແລະ ເປັນເອກະພາບສູງກ່ຽວກັບທັດສະນະທາດແທ້ອຸດົມການປະຕິວັດຂອງການປະຕິວັດພວກເຮົາທີ່ເປັນ “ອົງການຕຸລາການ ເຮັດໜ້າທີ່ໃນການຕັດສິນ, ພິພາກສາຄະດີ ຢູ່ ສປປ ລາວ, ເຊິ່ງມີແຕ່ສານເທົ່ານັ້ນ ທີ່ມີສິດອໍານາດໃນການພິຈາລະນາຕັດສິນຄະດີ. ສະນັ້ນ, ຄະນະພັກສານປະຊາຊົນເຂດ IV ນວ ຕ້ອງໄດ້ເດັດດ່ຽວ ແລະ ເຂັ້ມງວດທີ່ສຸດໃນການຕັດສິນ, ພິພາກສາຄະດີ ໃຫ້ສອດຄ່ອງຕາມຫຼັກການນຳພາຂອງພັກ, ຮັບປະກັນຄວາມເປັນເອກະພາບ, ນຳພາເປັນໝູ່ຄະນະ, ຄົ້ນຄວ້າບັນຫາຄະດີຢ່າງພາວະວິໄສ, ມີຄວາມໂປ່ງໃສໃນທຸກຂັ້ນຕອນ, ຖືກຕ້ອງຕາມຂໍ້ມູນຫຼັກຖານ ແລະ ກົດໝາຍກໍານົດໄວ້.

ນອກຈາກນີ້, ຕ້ອງໄດ້ສ້າງຄວາມເຂັ້ມແຂງໃຫ້ໄດ້ເປັນຜູ້ບໍລິການດີ, ບໍລິຫານທີ່ບໍລິສຸດໂປ່ງໃສ, ຊື່ສັດບໍລິສຸດ ສັດຊື່ຕໍ່ວິຊາຊີບ, ບັນຫາໜຶ່ງແມ່ນສານປະຊາຊົນເຂດຍັງບໍ່ທົ່ວເຖິງ, ບໍ່ມີຄົບຖ້ວນທຸກເມືອງ ເຮັດໃຫ້ປະຊາຊົນເຂົ້າຫາຍາກ ກໍຕ້ອງໄດ້ຄົ້ນຄວ້າເງື່ອນໄຂຄວາມເປັນຈິງ, ຈັດວາງຜູ້ພິພາກສາ, ພະນັກງານສານ ໃຫ້ມີຄວາມເໝາະສົມ ເພື່ອຮັບປະກັນການຕັດສິນຄະດີໃຫ້ມີຄວາມລະອຽດ, ຮອບຄອບ ແລະ ຖືກຕ້ອງຢູ່ສານຂັ້ນຕົ້ນ, ເພື່ອບໍ່ໃຫ້ສານຂັ້ນເທິງປ່ຽນແປງການຕັດສິນ ຫຼື ສົ່ງຄະດີກັບໄປກັບມາເລື້ອຍໆ, ພ້ອມນີ້, ກໍຕ້ອງເອົາໃຈໃສ່ບຳລຸງສ້າງພະນັກງານຂອງສານ ໃຫ້ມີຄວາມຮູ້ຄວາມສາມາດ, ຈັນຍາບັນ-ຈັນຍາທໍາ ແລະ ເປັນມືອາຊີບ ໃນການປະຕິບັດໜ້າທີ່ວຽກງານ ໂດຍສະເພາະຜູ້ພິພາກສາ ທີ່ເປັນຜູ້ຕັດສິນຊີ້ຂາດກຽວກັບຄະດີ ຖືວ່າມີຄວາມສໍາຄັນຫຼາຍເພາະການຕັດສິນ, ຊີ້ຂາດດັ່ງກ່າວແຕະຕ້ອງເຖິງຊີວິດ, ສຸຂະພາບ, ອິດສະລະພາບ, ກຽດສັກສີ ແລະ ສິດ, ຜົນປະໂຫຍດອັນຊອບທໍາຂອງພົນລະເມືອງ; ພ້ອມກັນນີ້, ກໍຕ້ອງປະສານສົມທົບ ແລະ ປຶກສາຫາລື ກັບພາກສ່ວນທີ່ກ່ຽວຂ້ອງຂອງການດໍາເນີນຄະດີຕາມຂະບວນຍຸຕິທຳ ເປັນຕົ້ນ: ອົງການໄອຍະການປະຊາຊົນເຂດ, ຫ້ອງການຍຸຕິທໍາເມືອງ, ເຈົ້າໜ້າທີ່ ປກສ ແລະ ພາກສ່ວນອື່ນທີ່ກ່ຽວຂ້ອງກັບການພິຈາລະນາແກ້ໄຂຄະດີທີ່ມີຄວາມຫຍຸ້ງຍາກ, ສັບສົນ, ພົວພັນກັບຫຼາຍບັນຫາ ຕ້ອງໄດ້ປະສານສົມທົບ ແລະ ປຶກສາຫາລືແກ້ໄຂບັນຫາຮ່ວມກັນ ເພື່ອຮັບປະກັນໃຫ້ການດໍາເນີນຄະດີມີຄວາມຮັດກຸມ, ເປັນທີ່ເຊື່ອຖື ແລະ ຍອມຮັບຂອງປະຊາຊົນ.