ກະຊວງແຮງງານ ແລະ ສະຫວັດດີການສັງຄົມ ເປີດກອງປະຊຸມຄະນະ ກໍາມະການແຮງງານແຫ່ງຊາດ ຄັ້ງທີ 1

ທ່ານນາງ ໃບຄໍາ ຂັດທິຍະ ໄດ້ໃຫ້ຮູ້ວ່າ: ກອງປະຊຸມໃນຄັ້ງນີ້, ຈະໄດ້ພ້ອມກັນລົງເລິກ ສະຫລຸບຕີລາຄາຜົນຂອງການຈັດຕັ້ງປະຕິບັດ ກອງປະຊຸມສາມຝ່າຍກ່ຽວກັບ ວຽກງານສາຍພົວພັນແຮງງານຄັ້ງທີ 20 ທີ່ໄດ້ກໍານົດບັນດາໜ້າວຽກອັນສໍາຄັນຕ່າງໆ ຂອງສາມຝ່າຍ ທີ່ໄດ້ກໍານົດໄວ້ຜ່ານມາ ໂດຍຊອກໃຫ້ເຫັນຈຸດດີ, ດ້ານຕັ້ງໜ້າ ແລະ ດ້ານຂໍ້ຄົງຄ້າງ ເພື່ອພ້ອມກັນພິຈາລະນາ ແລະ ເອກະພາບສູງໃນການເສີມຂະຫຍາຍດ້ານດີ ແລະ ຈໍາກັດບັນດາບັນຫາທີ່ເປັນຈຸດອ່ອນຂໍ້ຄົງຄ້າງ, ຄຽງຄູ່ກັນນັ້ນ ພວກເຮົາຍັງຈະຕ້ອງໄດ້ພ້ອມກັນກຳນົດທິດທາງແຜນການຈຸດສຸມໃນປີ 2023 ໃຫ້ແທດເໝາະກັບສະພາບ ແລະ ເງື່ອນໄຂຕົວຈິງ ໂດຍລົງເລິກຜັນຂະຫຍາຍ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ແລະ ວາລະແຫ່ງຊາດໃຫ້ເປັນອັນລະອຽດ ໂດຍສະເພາະແມ່ນການຂຶ້ນທະບຽນແຮງງານລາວ ແລະ ແຮງງານຕ່າງປະເທດ, ການປັບປຸງຄ່າແຮງງານຂັ້ນຕໍ່າ, ບັນຫາການຂາດ ແຄນແຮງງານ ແລະ ການສ້າງຂະບວນການ ເພື່ອເປັນການສະເຫລີມສະຫລອງວັນກໍາມະກອນສາກົນ ຄົບຮອບ 137 ປີ.

ທ່ານນາງ ໃບຄໍາ ຂັດທິຍະ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມ ກອງປະຊຸມຕ້ອງໄດ້ເບິ່ງບັນຫາທີ່ເປັນບູລິມະສິດອັນຮີບດ່ວນ ເປັນບັນຫາທີ່ເກີດຜົນປະໂຫຍດໃຫ້ແກ່ ສາມຝ່າຍໃຫ້ຫລາຍທີ່ສຸດ ທັງຜູ້ອອກແຮງງານ, ຜູ້ໃຊ້ແຮງງານ ແລະ ຜົນປະໂຫຍດລວມຂອງລັດ ຕົ້ນຕໍແມ່ນການປັບປຸງຄ່າແຮງງານຂັ້ນຕໍ່າ, ການຂຶ້ນທະບຽນແຮງງານຕາມວາລະແຫ່ງຊາດ, ບັນຫາການຂາດແຄນແຮງງານ ສາເຫດມັນແມ່ນອັນໃດ, ແມ່ນບໍວ່າຍ້ອນຄ່າແຮງງານຂັ້ນຕໍ່າສຸດ ທີ່ຫລາຍພາກສ່ວນໃຫ້ຄວາມສົນໃຈ ຫລື ແມ່ນຍ້ອນບັນຫາອື່ນໆ, ພ້ອມທັງຮຽກຮ້ອງ ໃຫ້ປະກອບຄຳເຫັນນຳກັນຢ່າງກົງໄປກົງມາ ໂດຍສະເໜີໃຫ້ເຫັນບັນຫາ ແລະ ວິທີການແກ້ໄຂໄປພ້ອມ ເພື່ອໃຫ້ຄະນະນຳຂອງສາມຝ່າຍພວກເຮົາໄດ້ພິຈາລະນາຮັບຮອງ ແລະ ເພື່ອນຳໄປຈັດຕັ້ງປະຕິບັດໃຫ້ໄດ້ຕົວຈິງ.

ທ່ານນາງ ໃບຄໍາ ຂັດທິຍະ ໃຫ້ຮູ້ອີກວ່າ: ຄະນະກໍາມະການແຮງງານແຫ່ງຊາດ ແມ່ນການ ຈັດຕັ້ງໜຶ່ງຂອງລັດ ທີ່ບໍ່ປະຈໍາການມີພາລະບົດບາດ ເປັນເສນາທິການໃຫ້ລັດຖະບານ, ແມ່ນໜ່ວຍງານໜຶ່ງທີ່ເຄື່ອນໄຫວວຽກງານດ້ານແຮງງານຮ່ວມກັນ ລະຫວ່າງກະຊວງແຮງງານ ແລະ ສະຫວັດດີການສັງຄົມ ໃນນາມອົງການລັດ, ສູນກາງສະຫະພັນກຳມະບານລາວ ໃນນາມອົງການຜູ້ຕາງໜ້າຜູ້ອອກແຮງງານ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວ ໃນນາມອົງການຜູ້ຕາງໜ້າຜູ້ໃຊ້ແຮງງານ ຕາມຫລັກການດ້ານແຮງງານທີ່ກຳນົດໄວ້ໃນ ຫລັກການສາກົົນ, ກົດໝາຍວ່າດ້ວຍແຮງງານ ແລະ ບັນດານິຕິກຳລຸ່ມກົດໝາຍ ທີ່ໄດ້ກຳນົດອອກຢ່າງເໝາະສົມ ແລະ ພຽງພໍໃຫ້ແກ່ການເຄື່ອນໄຫວ. ໃນລະດັບສາກົນ ອົງການສາມຝ່າຍ ຂອງ ສປປ ລາວ ກໍໄດ້ໃຫ້ສັດຕະຍາບັນຕໍ່ສົນທິສັນຍາວ່າດ້ວຍການປຶກສາຫາລືສາມຝ່າຍ ສະບັບເລກທີ 144 ມາແລ້ວ ຊຶ່ງເປັນການຢັ້ງຢືນໄດ້ວ່າ ພວກເຮົາເຄົາລົບ ແລະ ນໍາໃຊ້ກົນໄກສາມຝ່າຍ ເຄື່ອນໄຫວດ້ານແຮງງານຢູ່ພາຍໃນປະເທດເຮົາຢ່າງຕັ້ງໜ້າ.

ພາບຂ່າວ: ຂປລ