ແຈ້ງເຕືອນມົນລະພິດໝອກຄວັນ ຫລື ຝຸ່ນລະອອງຂະໜາດນ້ອຍກວ່າ 2.5 ໄມຄອນ (PM2.5) !!! ຊ່ວງລະດູແລ້ງ (ເດືອນ ມັງກອນ-ມີນາ)
ວັນທີ 23 ມີນາ 2023 ນີ້ ຫ້ອງການກະຊວງ ຊັບພະຍາກອນ ແລະ ສິ່ງແວດລ້ອມອອກແຈ້ງເຕືອນມົນລະພິດໝອກຄວັນ ຫລື ຝຸ່ນລະອອງຂະໜາດນ້ອຍກວ່າ 2.5 ໄມຄອນ (PM2.5) !!! ຊ່ວງລະດູແລ້ງ (ເດືອນ ມັງກອນ-ມີນາ) ປີ 2023 ວ່າ: ອີງໃສ່ສະພາບອາກາດຮ້ອນ ພ້ອມນັ້ນກໍ່ເກີດມີສະພາບໄຟໄໝ້ປ່າ, ມີການຈູດເພື່ອການລ່າສັດ, ຈູດເພື່ອການເຮັດກະສິກໍາ ເຊັ່ນ ຖາງປ່າເຮັດໄຮ່, ກະກຽມພື້ນທີ່ປູກເຂົ້າ, ປູກຝັງ, ປູກພືດເສດຖະກິດ ແລະ ການຈູດຂີ້ເຫຍື້ອຄົວ ເຮືອນ, ຈູດເຜົາໃບໄມ້, ຕົ້ນໄມ້ແຫ້ງ, ເສດວັດຖຸຕ່າງໆ. ຜ່ານການຕິດຕາມຈາກຂໍ້ມູນດາວທຽມພົບຈຸດສະສົມຄວາມ ຮ້ອນ (Hotspot) ແຜ່ກະຈາຍໄປທົ່ວປະເທດ ຈຶ່ງພາໃຫ້ເກີດມີໝອກຄວັນ.
ສະນັ້ນ, ໃນການຕິດຕາມ ແລະ ວັດແທກ ຄຸນນະພາບອາກາດ ໃນເດືອນມັງກອນ – ມີນາ 2023. ເຫັນວ່າຜົນຂອງການວັດແທກ PM2.5 ຂອງແຕ່ລະສະຖານີ ມີຄ່າສະເລ່ຍເປັນລາຍເດືອນ ແມ່ນ ເກີນມາດຕະຖານ (>50 ug/m3/24h) ຖ້າທຽບກັບ ລະດັບດັດຊະນີຄຸນນະພາບ ອາກາດ (AQI) ແມ່ນ ມີຜົນກະທົບຕໍ່ສຸຂະພາບ ແລະ ພົບຊ່ວງວິກິດໃນຕົ້ນເດືອນມີນາ ດັ່ງລາຍລະອຽດລຸ່ມນີ້:
- ສະຖານີ ຫລວງພະບາງ ວັດແທກໄດ້ຕໍ່າສຸດ-ສູງສຸດ 67-159/ug/m3/24
- ສະຖານີ ອຸດົມໄຊ ວັດແທກໄດ້ຕໍ່າສຸດ-ສູງສຸດ 29-71 ug/m3/24
- ສະຖານີ ຫລວງນໍ້າທາ ວັດແທກໄດ້ຕໍ່າສຸດ-ສູງສຸດ 24-57 ug/m3/24
- ສະຖານີ ບໍ່ແກ້ວ ວັດແທກໄດ້ຕໍ່າສຸດ-ສູງສຸດ 26-91ug/m3/24h
- ສະຖານີ ນະຄອນຫລວງວຽງຈັນ ວັດແທກໄດ້ຕໍ່າສຸດ-ສູງສຸດ 25-61 ug/m3/24h
- ສະຖານີ ຄໍາມ່ວນ ວັດແທກໄດ້ຕໍ່າສຸດ-ສູງສຸດ 39-82 ug/m3/24h
- ສະຖານີ ສະຫວັນະເຂດ ວັດແທກໄດ້ຕໍ່າສຸດ-ສູງສຸດ 26-65 ug/m3/24h
ມາດຕະການປ້ອງກັນ:
- ຫ້າມຈູດເຜົາຂີ້ເຫຍື້ອທຸກປະເພດຊ່ວງລະດູແລ້ງເພື່ອຫຼຸດຜ່ອນແຫຼ່ງເກີດມົນລະພິດທາງອາກາດ;
- ຫຼີກລ້ຽງ ຫລື ຫຼຸດຜ່ອນ ການເຄື່ອນໄຫວກາງແຈ້ງ;
- ໃສ່ຜ້າອັດປາກເມື່ອອອກນອກເຮືອນ ແລະ ອາຄານ;
- ຄວນດື່ມນໍ້າໃຫ້ຫລາຍກວ່າເກົ່າ.
ດັ່ງນັ້ນ, ຈຶ່ງແຈ້ງເຕືອນເຖິງອໍານາດການປົກຄອງທຸກພາກສ່ວນ ແລະ ປະຊາຊົນທົ່ວປະເທດ ເຝົ້າລະວັງ ສະຖານະການຢ່າງໃກ້ຊິດ.
