AFC ກຽມຈັບສະຫລາກແບ່ງສາຍ ແຂ່ງຂັນບານເຕະຊີງແຊ໋ມອາຊີ 2023 U17 ຮອບສຸດທ້າຍ

ວັນທີ 23 ມີນາ 2023 ສະຫະພັນບານເຕະອາຊີ AFC ໄດ້ແຈ້ງໃຫ້ຮູ້ວ່າ, ສະຫະພັນບານເຕະ ອາຊີ ຫລື AFC ກຽມຈັບສະຫລາກແບ່ງສາຍການແຂ່ງຂັນບານເຕະຊີງແຊ໋ມອາຊີປະຈຳປີ 2023 ຮຸ່ນອາຍຸບໍ່ເກີນ 17 ປິ ຮອບສຸດທ້າຍ ຫລື AFC U17 ASIAN CUP THAILAND 2023 Final ໂດຍ ປະເທດໄທ ໄດ້ຮັບກຽດເປັນເຈົ້າພາບ ໂດຍຈະແຂ່ງຂັນໃນລະຫວ່າງວັນທີ 15 ມິຖຸນາ ຫາ 2 ກໍລະກົດ 2023 ເຊິ່ງຈະຈັບສະຫລາກໃນ ວັນທີ 30 ມີນາ 2023 ເວລາ 14:00 ຢູ່ທີ່ນະຄອນຫລວງບາງກອກ ປະເທດໄທ.

ສຳລັບຜົນງານຂອງທີມຊາດລາວ U17 ຮອບຄັດເລືອກ ສ້າງຜົນງານຜ່ານເຂົ້າຮອບ 16 ທີມສຸດທ້າຍ ການແຂ່ງຂັນບານເຕ ຊີງແຊ໋ມອາຊີປິ 2022 ຮອບຄັດເລືອກ ກຸ່ມ I ຫລື “AFC U17 Asian Cup 2023 Qualifiers Group I” ທີ່ຈັດຂຶ້ນລະຫວ່າງ ວັນທີ 5-9 ຕຸລາ 2022 ທີ່ປະເທດກຽກກິດສະຖານ ລົງແຂ່ງຂັນ 3 ນັດ ໃນກຸ່ມ I ຮອບຄັດເລືອກ ໂດຍຜົນງານນັດທໍາອິດU17 ລາວ ເສຍໃຫ້ ທີມຊາດອີຣານ 0-3, ນັດທີ 2 ຊະນະ ເຂດປົກຄອງພິເສດຮົງກົງ 5-0 ແລະ ນັດສຸດທ້າຍ ຊະນະ ເຈົ້າພາບ ກຽກກິດສະຖານ 2-1 ລວມມີ 6 ຄະແນນ ໄດ້ອັນດັບສອງຂອງກຸ່ມ ແລະ ເປັນອັນດັບສອງທີ່ມີຄະແນນດີສຸດທີມທີ 6 ຈາກ 10 ກຸ່ມ ເຂົ້າຮອບສຸດທ້າຍ.

ປະຫວັດຜົນງານຂອງ ທີມຊາດລາວU17 ປີຜ່ານມາ ເຄີຍຜ່ານການຄັດເລືອກເຂົ້າແຂ່ງຂັນຮອບສຸດທ້າຍ 2 ຄັ້ງ ກໍຄື ໃນປີ 2004 ແລະ 2012.

ທີມຊາດລາວ U17 ໄດ້ເລີ່ມເກັບຕົວຝຶກຊ້ອມມາຕັ້ງແຕ່ວັນທີ06 ມີນາ2023 ເປັນຕົ້ນມາ ໂດຍແມ່ນທ່ານ ກັນລະຍາ ສີສົມຫວັງ ເປັນຫົວຫນ້າຄູຝຶກ ໂດຍໄດ້ຮຽກຕົວນັກກິລາເຍົາວະຊົນ ຈໍານວນ 35 ຄົນ ຈາກບັນດາແຂວງ, ສະໂມສອນສອນຕ່າງໆ ທັງພາຍໃນ ແລະ ຕ່າງປະເທດ ເຊັ່ນ:ສະຫວັນນະເຂດ, ໄຊຍະບູລີ, ອຸດົມໄຊ, ເຊກອງ, ສາລະວັນ, ສະໂມສອນກິລາບານເຕະເອສະຣາ, ວຽງຈັນ, ຈັນທະບູລີ, ຈໍາປາສັກ , ນໍ້າທາ, ຊ້າງນ້ອຍ ເອັຟຊີ, ເມືອງຫາດ ແລະ ນັກກິລາລາວທີ່ສະໂມສອນນົນທະບູລີ(ປະເທດໄທ). ສໍາລັບນັກກິລາຫລັກທີ່ຮຽກຕົວມາກໍ່ຍັງເປັນນັກກິລາຊຸດເກົ່າທີ່ໄປແຂ່ງຂັນ AFC U17 ຮອບຄັດເລືອກທີ່ ປະເທດ ກຽກກີກິດສະຖານ(Kyrgyzstan) ຈົນສາມາດຜ່ານເຂົ້າສູ່ຮອບ 16 ທີມສຸດທ້າຍໄດ້ ແລະ ນອກນັ້ນ, ຍັງໄດ້ເປີດໂອກາດໃຫ້ນັກກິລາເຍົາວະຊົນທີ່່ມີທັກສະຄວາມສາມາດທີ່ໂດດເດັ່່ນ ທີ່ບໍ່ເຄີຍຕິດທີມຊາດມາກ່ອນໄດ້ຖືກຄັດເລືອກໃຫ້ເຂົ້າຮ່ວມຝຶກແອບໃນຄັ້ງນີ້ອີກຈໍານວນ

ໜຶ່ງ.