ແມນ ຢູໄນເຕັດ ເລື່ອນເວລາຂາຍທີມອອກໄປ ເປີດໂອກາດໃຫ້ ເຊີຈິມ-ຊີກກາຕ້າ ປັບຂໍ້ສະເໜີກ່ອນຍື່ນຄັ້ງສຸດທ້າຍ
ແມນເຊສເຕີ ຢູໄນເຕັດ ຍອມເລື່ອນໄລຍະເວລາເສັ້ນຕາຍການຍື່ນຂໍ້ສະເໜີຊື້ກິດຈະການສະໂມສອນຕາມທີ່ 2 ກຸ່ມທຶນໃຫຍ່ຮ້ອງຂໍ ເຖິງຈະມີກຸ່ມທຶນອື່ນຍື່ນມາຕາມກຳນົດແລ້ວກໍຕາມ.
ສຳນັກຂ່າວ ບີບີຊີ ລາຍງານວ່າ ແມນເຊສເຕີ ຢູໄນເຕັດ ທີມດັງແຫ່ງພຣີເມຍລີກ ອັງກິດ ຕັດສິນໃຈຍືດໄລຍະເວລາເສັ້ນຕາຍການຍື່ນຂໍ້ສະເໜີຊື້ກິດຈະການສະໂມສອນ ໂດຍທີ່ 2 ກຸ່ມທຶນໃຫຍ່ຕ່າງລໍຖ້າຢືນຢັນຂໍ້ສະເໜີນຳ.
ກ່ອນໜ້ານີ້ ແມນຢູ ເປີດໃຫ້ກຸ່ມທຶນຍື່ນຂໍ້ສະເໜີຊື້ກິດຈະການຮອບທຳອິດໄປແລ້ວ ຈາກນັ້ນຈຶ່ງກຳນົດເສັ້ນຕາຍຍື່ນຂໍ້ສະເໜີໃຫມ່ທີ່ສູງຂຶ້ນຮອບສອງບໍ່ເກີນເວລາ 21:00 ຂອງວັນທີ 22 ມີນາ ຕາມເວລາທ້ອງຖິ່ນ.
ແນວໃດກໍຕາມ ເຣນ ກຣຸບ ບໍລິສັດທີ່ເບິ່ງແຍງເລື່ອງການຊື້ກິດຈະການແມນຢູ ລະບຸວ່າ ບໍ່ມີການຍື່ນຂໍ້ສະເໜີຈາກທາງ ເຊີຈິມ ແຣດຄລິຟ ມະຫາເສດຖີຊາວອັງກິດ ແລະ ຊີກຈັດສຊິມ ບິນ ຮາຫມັດ ອັລ ທານີ ນັກທຸລະກິດໃຫຍ່ແຫ່ງປະເທດກາຕ້າ ໃນໄລຍະເວລາເສັ້ນຕາຍ.
ລາຍງານລະບຸວ່າ ທັງ ແຣດຄລິຟ ແລະ ຊິກຈັສຊິມ ຕ່າງຂໍໃຫ້ມີການຍືດໄລຍະເວລາເປັນພິເສດ ເຊິ່ງຄຳຮ້ອງຂໍໄດ້ຮັບການອະນຸມັດ ແຕ່ບໍ່ມີການຢືນຢັນວ່າກຳນົດເສັ້ນຕາຍໃຫມ່ຈະເປັນເມື່ອໃດ ເຖິງມີຂ່າວວ່າເວລາຖືກຍືດໄປເຖິງ 21:00 ຂອງວັນທີ 24 ມີນາ ຕາມເວລາທ້ອງຖິ່ນກໍຕາມ.
ນອກຈາກ ແຣດຄລິຟ ແລະ ຊິກຈັສຊິມ ທີ່ຄາດວ່າກຽມຈະຢືນຢັນຂໍ້ສະເໜີແລ້ວ ຍັງລະບຸວ່າມີກຸ່ມທຶນອື່ນທີ່ຍື່ນຂໍ້ສະເໜີໃຫມ່ທັນຕາມກຳນົດເສັ້ນຕາຍ ໂດຍຄາດວ່າມີທັງຫມົດ 8 ເຈົ້າເລີຍ.
ນອກຈາກນີ້ ລາຍງານຍັງລະບຸວ່າສະກຸນເກລເຊີ ຄອບຄົວມະຫາເສດຖີອາເມຣິກັນ ເຊິ່ງຄອບຄອງແມນຢູໃນເວລານີ້ ກໍພ້ອມຂາຍທີມເຊັ່ນດຽວ ເຖິງຈະມີການຢືນຢັນຕົວເລກເງິນທີ່ສະກຸນນີ້ຕ້ອງການກໍຕາມ.
