ເອແດສັນ ກ່າວມີສິດໄດ້ ອັນເຊລັອດຕິ ວ່າທີ່ຜູ້ຈັດການທີມຊາດບຣາຊິລ ຄົນໃຫມ່

ເອແດສັນ ຜູ້ຮັກສາປະຕູ ແມນເຊສເຕີ ຊິຕີ ແລະ ທີມຊາດ ບຣາຊິລ ກ່າວວ່າມີສິດໄດ້ ຄາໂລ ອັນເຊລັອດຕິ ຜູ້ຈັດການທີມປະສົບການຫລາຍຊາວອີຕາລີ ເຂົ້າມາຮັບໜ້າທີ່ຜູ້ຈັດການທີມບຣາຊິລ ຄົນໃຫມ່.

“ ຂ້ອຍໄດ້ເຈລະຈາກັບ ຄາເຊມິໂຣ, ວິນິຊີອຸສ ຈູເນຍ ແລະ ມິລິເຕົາ ແດ່ແລ້ວ ມັນກໍມີໂອກາດທີ່ຈະເປັນໄປໄດ້ທີ່ລາວຈະເຂົ້າມາທີມຂອງຂ້ອຍ ອາດຈະຈັດການ ຣຽວ ມາດຣິດ ບໍ່ແນ່ອນ ອັນເຊລັອດຕິ ອາດຈະມາບຣາຊິລ ກໍເປັນໄດ້ ”.

“ ຈາກປະສົບການການເຮັດວຽກຂອງລາວ ຂ້ອຍຄິດວ່າບໍ່ຊ້າກໍໄວ ມັນກໍຄົງຈະເກີດຂຶ້ນ ເຮົາຢາກໄດ້ຄູຝຶກຄົນໃຫມ່ໄວໆນີ້ ມີຂ່າວລືຫລາຍຢ່າງວ່າ ບຣາຊິລ ຈະໃຊ້ຄູຝຶກຕ່າງຊາດ ເຮົາຕ່າງກໍຢູ່ກັບຄວາມວິຕົກກັງວົນທັງນັ້ນ ”.

ສຳລັບ ອັນເຊລັອດຕິ ຜູ້ຈັດການທີມອາຍຸ 63 ປີ ມີໂອກາດແຍກທາງກັບ ຣຽວ ມາດຣິດ ເນື່ອງຈາກມີຄະແນນຫ່າງຈາກ ບາເຊໂລນາ ທີມຜູ້ນຳເຖິງ 12 ຄະແນນ ແລະ ເຫລືອຄວາມຫວັງດຽວໃນຢູຟາ ແຊ໊ມປຽນ ລີກ ເຊິ່ງ ຣຽວ ມາດຣິດ ຈະພົບກັບ ເຊລຊີ ແລະ ຫາກຜ່ານເຂົ້າຮອບໄປຈະມີໂອກາດພົບກັບ ແມນຊິຕີ ໃນຮອບ ຕັດເຊືອກ.