ປິດສາກອາຊີບນັກເຕະ, ເມຊຸດ ໂອຊິລ ປະກາດແຂວນສະຕັດໃນໄວອາຍຸ 34 ປີ
ເມຊຸດ ໂອຊິລ ອະດີດກອງກາງ ຣຽວ ມາດຣິດ ແລະ ອາເຊນອລ ປະກາດແຂວນສະຕັດຢ່າງເປັນທາງການໃນໄວ 34 ປີ.
ສຳລັບ ໂອຊິລ ເລີ່ມຕົ້ນອາຊີບນັກເຕະກັບ ຊາລເກ 04 ເມື່ອປີ 2006 ກ່ອນຈະຍ້າຍໄປຫລິ້ນໃຫ້ ແວເດີ ເບຣເມນ ໃນປີ 2008 ເຊິ່ງຜົນງານຂອງລາວກັບສະໂມສອນດັ່ງກ່າວໄປເຂົ້າຕາ ຣຽວ ມາດຣິດ ຈົນ ສຸດທ້າຍດຶງຕົວໄປເສີມທີມໃນປີ 2010 ແລະ ຄວ້າແຊ໊ມກັບທີມ 3 ລາຍການ ຄື : ລາ ລີກາ ສະເປນ, ໂກປາ ເດລ ເຣ ແລະ ສະແປນນິສ ຊຸບເປີ ຄັບ.
ກ່ອນປີ 2013 ອາເຊນອລ ຈະຊື້ກອງກາງທີມຊາດເຢຍລະມັນລາຍນີ້ໄປຮ່ວມທີມ ເຊິ່ງກັບ ອາເຊນອລ ລາວສ້າງຜົນງານໄດ້ຢ່າງສຸດຍອດຈາກການລົງສະໜາມ 184 ນັດລວມທຸກລາຍການລະຫວ່າງປີ 2013-2021 ເຮັດໄດ້ 33 ປະຕູ ພ້ອມມີສ່ວນສຳຄັນຊ່ວຍຕົ້ນສັງກັດຄວ້າແຊ໊ມ ເອຟເອ ຄັບ ມາຄອງເຖິງ 4 ສະໄຫມ.
ຈາກນັ້ນໃນປີ 2021 ໂອຊິລ ຍ້າຍໄປຫລິ້ນໃຫ້ກັບ ເຟເນບາເຊ ໃນຕວກກີ ກ່ອນຮ່ວມທີມກັບ ອິສຕັນບູລ ບາຊັກເຊຮີ ໃນປີ 2022.
ແນວໃດກໍຕາມຫລ້າສຸດເມື່ອວັນທີ 22 ມີນາ ໂອຊິລ ອາຍຸ 34 ປີ ໄດ້ປະກາດຜ່ານສັງຄົມອອນລາຍ ໃນການອຳລາອາຊີບນັກເຕະຮຽບຮ້ອຍແລ້ວ. “ ສະບາຍດີທຸກຄົນ ຫລັງຈາກພິຈາລະນາຢ່າງຖີ່ຖ້ວນແລ້ວ ຂ້ອຍຂໍປະກາດເຊົາຫລິ້ນບານເຕະອາຊີບທັນທີ ”.
“ ຂ້ອຍໄດ້ຮັບສິດທິພິເສດໃນການເປັນນັກເຕະບານອາຊີບມາເກືອບ 17 ປີແລ້ວ ແລະ ຂ້ອຍຮູ້ສຶກຂອບໃຈສຳລັບໂອກາດນີ້ ແຕ່ໃນໄລຍະຫລາຍອາທິດ ແລະ ຫລາຍເດືອນທີ່ຜ່ານມາ ຫລັງຈາກໄດ້ຮັບບາດເຈັບຢູ່ ກໍຍິ່ງຈະແຈ້ງຫລາຍຂຶ້ນວ່າເຖິງເວລາຕ້ອງອອກຈາກເວທີໃຫຍ່ຂອງບານເຕະແລ້ວ ”.
“ ມັນເປັນການເດີນທາງທີ່ໜ້າມະຫັດຈັນ ທີ່ເຕັມໄປດ້ວຍໄລຍະເວລາ ແລະ ອາລົມທີ່ຍາກຈະລືມ ຂ້ອຍຢາກຈະຂອບໃຈສະໂມສອນຂອງຂ້ອຍ ຊາລເກ 04, ແວເດີ ເບຣເມນ, ຣຽວ ມາດຣິດ, ອາເຊນອລ, ເຟເນບາເຊ, ບາຊັກເຊຮີ ແລະ ຄູຝຶກທີ່ສະໜັບສະໜູນຂ້ອຍ ລວມເຖິງຫມູ່ຮ່ວມທີມທີ່ກາຍມາເປັນຫມູ່ກັນ ”.
ສຳລັບກັບທີມຊາດເຢຍລະມັນ ໂອຊິລ ຕິດທີມຊາດໄປທັງຫມົດ 92 ນັດ ລະຫວ່າງປີ 2009-2018 ແລະ ຢູ່ໃນທີມຊຸດຄວ້າແຊ໊ມບານໂລກໃນປີ 2014 ດ້ວຍ.
