ຄະນະກຳມະການຄຸ້ມຄອງອິນເຕີເນັດແຫ່ງຊາດ ສະຫຼຸບວຽກງານ ປະຈໍາປີ 2022

ວັນທີ 22 ມີນາ 2023 ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ (ຄຄອຊ) ສະຫຼຸບວຽກງານ ປະຈຳປີ 2022 ແລະ ວາງທິດທາງແຜນການ ປະຈໍາປີ 2023 ໂດຍການເປັນປະທານຂອງ ພົອ ວິໄລ ຫຼ້າຄຳຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ, ລັດຖະມົນຕີ ກະຊວງ ປກສ, ປະທານຄະນະກຳມະການຄຸ້ມຄອງອິນເຕີເນັດ ແຫ່ງຊາດ, ມີລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຮອງປະທານ-ຜູ້ປະຈຳການ, ບັນດາທ່ານຮອງລັດຖະມົນຕີ ແລະ ຫົວໜ້າກົມ, ອົງການ ແລະ ທຽບເທົ່າ ຈາກບັນດາກະຊວງທີ່ກ່ຽວຂ້ອງ ພ້ອມດ້ວຍການເຂົ້າຮ່ວມຜ່ານລະບົບກອງປະຊຸມທາງໄກຂອງບັນດາທ່ານຮອງເຈົ້າແຂວງ, ຫົວໜ້າ-ຮອງຫົວໜ້າຫ້ອງວ່າການປົກຄອງແຂວງ, ຄະນະກໍາມະການຄຸ້ມຄອງອິນເຕີເນັດຂັ້ນແຂວງໃນທົ່ວປະເທດເຂົ້າຮ່ວມ.

ທ່ານ ມີນາໄຊ ພິລາວົງ, ຫົວໜ້າສູນອິນເຕີເນັດແຫ່ງຊາດ, ກະຊວງເຕັກໂນໂລຊີ ແລະ ການສື່ສານ ຫົວໜ້າຫ້ອງການກອງເລຂາ ຄະນະກຳມະການຄຸ້ມຄອງອິນເຕີເນັດ ແຫ່ງຊາດ ໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະກຳມະການຄຸ້ມຄອງອິນເຕີເນັດ ແຫ່ງຊາດ ສະບັບເລກທີ 19/ນຍ, ລົງວັນທີ 30 ມັງກອນ 2023 ແລະ ຜ່ານບົດສະຫຼຸບການຈັດຕັ້ງວຽກງານ ຄຄອຊ ປີ 2022 ແລະ ທິດທາງແຜນການໃນປີ 2023 ວ່າ ຕະຫຼອດໄລຍະ 1 ປີຜ່ານມາຄະນະກຳມະການຄຸ້ມຄອງອິນເຕີເນັດ ແຫ່ງຊາດ ເອົາໃຈໃສ່ຈັດຕັ້ງປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ ແນໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ-ລັດ ໃນການຄຸ້ມຄອງ ແລະ ຊຸກຍູ້ ສົ່ງເສີມກ່ຽວກັບວຽກງານອິນເຕີເນັດ, ເຕັກໂນໂລຊີການສື່ສານຂໍ້ມູນ-ຂ່າວສານ, ຄວາມປອດໄພທາງໄຊເບີ, ການຫັນເປັນດິຈິຕອນ, ການສ້າງລັດຖະບານດິຈິຕອນ, ການພັດທະນາເສດຖະກິດດິຈິຕອນ ແລະ ອຸດສາຫະກຳ 4.0, ແລະ ຊີ້ນໍາທຸກຂະແໜງການທີ່ກ່ຽວຂ້ອງໃນ ຄຄອຊ ຜັນຂະຫຍາຍວຽກງານໃຫ້ຕິດພັນກັບ 2 ວາລະແຫ່ງຊາດຄື: ການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ. ນອກນັ້ນ, ບັນດາທ່ານໃນຄະນະກຳມະການຄຸ້ມຄອງອິນເຕີເນັດ ແຫ່ງຊາດ ແລະ ປະກອບຄຳເຫັນຢ່າງກົງໄປກົງມາ ເພື່ອຮ່ວມກັນຕີລາຄາ ແລະ ຖອດຖອນບົດຮຽນ ຈາກການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ຮ່ວມກັນວາງທິດທາງແຜນການໃນຕໍ່ໜ້າ ເພື່ອເຮັດໃຫ້ວຽກງານການຄຸ້ມຄອງອິນເຕີເນັດ ພາຍໃນປະເທດມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.

ໃນໂອກາດດັ່ງກ່ານທ່ານປະທານຄະນະກຳມະການຄຸ້ມຄອງອິນເຕີເນັດແຫ່ງຊາດ ໄດ້ມີຄໍາເຫັນ ແລະ ຕີລາຄາສູງຕໍ່ການຄົ້ນຄວ້າ, ການກຳນົດບັນດາເປົ້າໝາຍທີ່ມີຄວາມສຳຄັນ ແລະ ຈຳເປັນທີ່ຈະຕ້ອງຄຸ້ມຄອງ ແລະ ພັດທະນາ ເພື່ອເຮັດໃຫ້ອິນເຕີເນັດ ແລະ ເຕັກໂນໂລຊີດິຈິຕອນ ສາມາດປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕິດພັນກັບ 2 ວາລະແຫ່ງຊາດຄື: ການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ປັບປຸງການຈັດຕັ້ງ; ການແບ່ງຄວາມຮັບຜິດຊອບ; ການປັບປຸງຂັ້ນຕອນ ແລະ ຂອດການປະສານງານຂອງບັນດາກະຊວງ ທັງຢູ່ສູນກາງ ແລະ ຢູ່ທ້ອງຖິ່ນ; ຊຸກຍູ້ໃຫ້ມີການສ້າງ ແລະ ປັບປຸງຄະນະກໍາມະການຄຸ້ມຄອງອິນເຕີເນັດຂັ້ນແຂວງ ແລະ ຝຶກອົບຮົມສ້າງຄວາມເຂັ້ມແຂງໃຫ້ ຄຄອຊ ໃນທົ່ວປະເທດ; ປັບປຸງພື້ນຖານໂຄງລ່າງໂທລະຄົມມະນາຄົມ ແລະ ອິນເຕີເນັດ ໃຫ້ຄອບຄຸມທົ່ວປະເທດ, ຍົກລະດັບຄຸນນະພາບ ແລະ ການບໍລິການດ້ານໂທລະຄົມມະນາຄົມ, ອິນເຕີເນັດ ແລະ ເຕັກນິກໂນໂລຊີດິຈິຕອນ; ຄຸ້ມຄອງ, ຕິດຕາມ ແລະ ກວດກາປາກົດການຫຍໍ້ທໍ້, ຫາງສຽງ, ຂ່າວປອມ, ການຕົວະຍົວະຫຼອກລວງຜ່ານສື່ສັງຄົມອອນລາຍ; ການໂຈມຕີຕໍ່ບັນດາໂຄງລ່າງພື້ນຖານຂໍ້ມູນ-ຂ່າວສານທີ່ສໍາຄັນ; ເຜີຍແຜ່ ແລະ ປູກຈິດສໍານຶກໃຫ້ຜູ້ນໍາໃຊ້ອິນເຕີເນັດ ແລະ ສື່ສັງຄົມອອນລາຍມີຄວາມປອດໄພ ແລະ ເກີດຜົນປະໂຫຍດ; ກຽມຄວາມພ້ອມຮັບມືກັບບັນດາເຕັກໂນໂລຊີດິຈິຕອນໃໝ່ທີ່ຈະເກີດຂຶ້ນ ເປັນຕົ້ນປັນຍາປະດິດ (AI), ອິນເຕີເນັດຜ່ານດາວທຽມ; ການຫັນເປັນດິຈິຕອນເພື່ອສ້າງໃຫ້ ສປປ ລາວ ໃຫ້ກາຍເປັນລັດຖະບານດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຕອນ; ການຮ່ວມມືແລກປ່ຽນບົດຮຽນກັບປະເທດຄູ່ຮ່ວມມືຍຸດທະສາດໃນພາກພື້ນ ແລະ ອົງການສາກົນຕ່າງໆໃນວຽກງານການພັດທະນາ ແລະ ຄຸ້ມຄອງອິນເຕີເນັດຢ່າງເຂັ້ມງວດ.

ພາບຂ່າວ: ວາລະສານປ້ອງກັນຄວາມສະຫງົບ