ເຈົ້າໜ້າທີ່ໄທ ເຂົ້າຈັບຕົວນາຣາເຄບກະເທີຍ ໂຄສະນາຂາຍກ່ອງສຸ່ມ ແຕ່ບໍ່ສົ່ງກ່ອງສຸ່ມໃຫ້ລູກຄ້າ

ສຳນັກຂ່າວຊ່ອງ3ໄທລາຍງານວ່າ: ວັນທີ 21 ມີນາ 2023 ຜ່ານມາ, ຕຳຫລວດກອງບັງຄັບການປາບປາມການກະທຳຄວາມຜິດກ່ຽວກັບການຄຸ້ມຄອງຜູ້ບໍລິໂພກ ຄວບຄຸມຕົວ ທ້າວ ອະນິວັດ ປະທຸມຖິ່ນ ຫລື ນາຣາ ເຄບກະເທີຍ ຜູ້ຖືກຫາຕາມໝາຍຈັບສານອາຍາໄດ້ທີ່ບ້ານພັກໃນພື້ນທີ່ ອຳເພີ ບາງປະອິນ, ຈັງຫວັດພະນະຄອນສີອະຍຸດທະຍາ ພ້ອມຢຶດໂທລະສັບມືຖື 4 ໜ່ວຍ, ໄອແພັດ 1 ໜ່ວຍ ແລະ ປື້ມບັນຊີທະນາຄານ 6 ຫົວ ໄວ້ເພື່ອກວດສອບ ກ່ອນນຳໄປກວດຄົ້ນອີກອາຄານໜຶ່ງໃນພື້ນທີ່ດຽວກັນ ທີ່ຖືກໃຊ້ເປັນສະຖານທີ່ເກັບສິນຄ້າ ແລະ ສະຖານທີ່ໄລ້ສົດກ່ອງສຸ່ມ, ເຊິ່ງພົບກ່ອງພັດສະດຸພາຍໃນເຮືອນເປັນຈຳນວນຫລາຍ ດັ່ງນັ້ນເຈົ້້າໜ້າທີ່ຈຶ່ງຢຶດໄວ້ເພື່ອກວດສອບ.

ຂະນະທີ່ຖືກຄວບຄຸມຕົວ ນາຣາ ໄດ້ອັດຄຣິບວີດີໂອວ່າ: ຂະນະນີ້ຖືກຕຳຫລວດຄວບຄຸມຕົວແລ້ວ ເພາະວ່າມີຜູ້ເສຍຫາຍໄດ້ຮ້ອງຮຽນກັບຕຳຫລວດ ແລະ ແຈ້ງຄວາມທາງອອນລາຍ ຫລື ໄປຟ້ອງຢູ່ກອງປາບ ຕຳຫລວດກໍໄດ້ຈັບຕາມໜ້າທີ່, ພ້ອມທັງກ່າວວ່າຈະຍື່ນປະກັນຕົວເພື່ອອອກມາສູ້ຄະດີ ແລະ ເຮັດວຽກຂາຍເຄື່ອງເພື່ອຊົດໃຊ້ໜີ້ກັບທຸກຄົນ, ຫລັງຈາກນັ້ນ ນາຣາ ໄດ້ເດີນທາງມາຮອດສະຖານີຕຳຫລວດສື່ມວນຊົນພະຍາຍາມຖາມວ່າເປັນຄວາມຈິງຫລືບໍ? ແຕ່ນາຣາ ກັບເວົ້າເຖິງການໂຄສະນາສິນຄ້າຂອງຕົນເອງ ແລະ ບອກສັ້ນໆວ່າ ຈະຫາເງິິນໄປໃຊ້ໜີ້ ແລະ ຮ້ອງເພງກ່ອນເຂົ້າຫ້ອງໄປພົບພະນັກງານສອບສວນ.

ເຈົ້າໜ້າທີ່ຕຳຫລວດຄວບຄຸມ ນາຣາ ມາຮັບຂໍ້ກ່າວຫາ ແລະ ສືບສວນເພີ່ມເຕີມ ເຊິ່ງຖືກແຈ້ງ 4 ຂໍ້ກ່າວຫາຄື: ໂຄສະນາເພື່ອສະໜັບສະໜູນໃຫ້ມີການກະທຳຜິດທາງກົດໝາຍ, ສໍ້ໂກງປະຊາຊົນ, ທຸຈະລິດ ຫລື ຫລອກລວງໂດຍການນຳເຂົ້າສູ່ລະບົບຄອມພິວເຕີເຊິ່ງເປັນຂໍ້ມູນເທັດ, ກູ້ຢືມເງິນທີ່ເປັນການສໍ້ໂກງປະຊາຊົນ.