ຣາຟາເອລ ນາດາລ ບໍ່ຕິດ 1 ໃນ 10 ອັນດັບໂລກ ຄັ້ງທຳອິດຮອບ 18 ປີ

ຣາຟາເອລ ນາດາລ ນັກເທັນນິສຊື່ດັງຊາວສະເປນຫລຸດຕຳແໜ່ງ 10 ອັນດັບຂອງໂລກຄັ້ງທຳອິດໃນຮອບ 18 ປີ ຫລື ນັບຕັ້ງແຕ່ປີ 2005.

ສຳລັບ ນາດາລ ສ້າງຜົນງານໄດ້ຢ່າງໂດດເດັ່ນໃນລະດູການຜ່ານມາ ດ້ວຍການຄວ້າແຊ໊ມແກຣນສະແລມມາຄອງເຖິງ 2 ລາຍການ ນັ້ນກໍຄື ອອສເຕຣລຽນ ໂອເພັນ ແລະ ເຟຣັນ ໂອເພັນ ຈົນຂຶ້ນມາຄອງຕຳແໜ່ງມື 2 ຂອງໂລກ ຫລັງຈົບປີ.

ແນວໃດກໍຕາມນັກເຕະເທັນນິສອາຍຸ 36 ປີ ກັບມີບັນຫາອາການບາດເຈັບກະໂພກລົບກວນມາຕັ້ງແຕ່ໄລຍະຕົ້ນລະດູການ ຫລື ຫລັງຈາກລົງແຂ່ງຂັນໃນ ອອສເຕຣລຽນ ໂອເພັນ 2023 ແລະ ຫລັງຈາກນັ້ນລາວກໍຍັງບໍ່ສາມາດກັບມາລົງສະໜາມໄດ້ເລີຍ.

ແລະ ຈາກການທີ່ລາວຖອນຕົວຈາກເທັນນິສ ອິນດຽນ ເວລ ມາສເຕີ 2023 ລາຍການໃຫຍ່ທີ່ປະເທດສະຫະລັດ ອາເມຣິກາ ສົ່ງຜົນໃຫ້ການຈັດອັນດັບໂລກຫລ້າສຸດນັ້ນ ນາດາລ ທີ່ກ່ອນໜ້ານີ້ຢູ່ໃນອັນດັບ 9 ຂອງໂລກຕົກມາຢູ່ໃນອັນດັບທີ 13 ຂອງໂລກເປັນທີ່ຮຽບຮ້ອຍ.

ຈາກອັນດັບທີ່ເກີດຂຶ້ນເຮັດໃຫ້ແຊ໊ມແກຣນສະແລມ 22 ສະໄຫມລາຍນີ້ຫລຸດອັນດັບ 10 ໂລກເປັນຄັ້ງທຳອິດໃນຮອບ 18 ປີ ຫລື ນັບຕັ້ງແຕ່ປີ 2005 ເຊິ່ງຫາກທຽບເວລາແລ້ວໃນຂະນະນັ້ນ ຄາລອສ ອັລຄາຣາສ ນັກເທັນນິສມື 1 ຂອງໂລກຄົນປັດຈຸບັນມີອາຍຸພຽງ 2 ປີເທົ່ານັ້ນ.

ທັງນີ້ຄາດວ່າ ນາດາລ ຈະກັບມາລົງຊີງໄຊອີກຄັ້ງໃນລາຍການ ມອນຕິ ຄາໂລ ມາສເຕີ 2023 ລະຫວ່າງວັນທີ 8-16 ເມສານີ້.