ຄະນະກຳມະການຄຸ້ມຄອງໄພພິບັດ ແຂວງຈຳປາສັກ ຮຽນຮູ້ທັກສະການກູ້ໄພ ແລະ ຄົ້ນຫາ ທາງບົກ-ທາງນ້ຳ

ການຝຶກຊ້ອມວິທີກູ້ໄພ ແລະ ຄົ້ນຫາ ທາງບົກ ແລະ ທາງນ້ຳ ລະຫວ່າງ ອົງການກາແດງແຫ່ງຊາດລາວ ແລະ ຄະນະກຳມະການຄຸ້ມຄອງໄພພິບັດ ແຂວງຈຳປາສັກ ໄດ້ຈັດຂຶ້ນໃນວັນທີ 17 ມີນາ 2023 ທີ່ ບ້ານ ຄັນແຍງ ເມືອງ ໂພນທອງ ແຂວງຈຳປາສັກ, ໂດຍການເປັນປະທານ ທ່ານ ດຣ ສິງ ເມໂນລາດ ຮອງປະທານອົງການກາແດງແຫ່ງຊາດລາວ ແລະ ທ່ານ ດຣ ບົວເພັດ ສີບຸນເຮືອງ ຮອງພະແນກແຮງງານ ແລະ ສະຫວັດດີການສັງຄົມແຂວງຈຳປາສັກ.

ການຝຶກຊ້ອມຮ່ວມຄັ້ງນີ້ແມ່ນເພື່ອສ້າງຂີດຄວາມສາມາດໃຫ້ແກ່ພະນັກງານ-ອາສາສະ ໝັກກາແດງແຂວງ ແລະ ຄະນະກໍາມະການຄູ້ມຄອງໄພພິບັດເມືອງໂພນທອງ ແລະ ພາກສ່ວນທີ່ກ່ຽວຂ້ອງ, ທັງເປັນການກະກຽມຄວາມພ້ອມໃນການຮັບມືກັບໄພພິບັດທີ່ຈະເກີດຂຶ້ນໃນອະນາຄົດ, ເພື່ອຮຽນຮູ້ທາງດ້ານການວາງແຜນການນຳໃຊ້ອຸປະກອນ, ບຸກຄະລາກອນໃນການຄວບຄຸມບັນຊາການ, ການປະສານງານ ແລະ ການຈັດຕັ້ງປະຕິບັດ, ເປັນການຖ່າຍຖອດບົດຮຽນໃຫ້ແກ່ພະນັກງານກາແດງແຂວງ, ຄະນະກຳມະການ ຄຸ້ມຄອງໄພພິບັດ ແລະ ພາກສ່ວນທີ່ກ່ຽວຂ້ອງພາຍໃນເມືອງ ໃນເວລາເກີດໄພພິບັດ ແລະ ສະພາບຕົວຈິງຢູ່ທ້ອງຖິ່ນນັ້ນ, ເພື່ອແນໃສ່ຫລຸດຜ່ອນການສູນເສຍທາງດ້ານຊິວິດ ແລະ ຊັບສິນ ຂອງປະຊາຊົນໃນທ້ອງຖິ່ນດັ່ງກ່າວ. ນອນນັ້ນ, ຍັງໄດ້ຮຽນຮູ້ການປະຖົມພະຍາບານ ແລະ ບົດຮຽນອື່ນໆ, ເຊິ່ງການຝຶກຊ້ອມຮ່ວມໃນຄັ້ງນີ້ໄດ້ຮັບການສະໜັບສະໜູນງົບປະມານຈາກ ກາແດງສະວິດ໌ສ ຈຳນວນ 108.747.000 ກີບ.