ຊົມເຊີຍ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ
March 21, 2023 - 1:30 PM
ການສ້າງຕັ້ງພັກປະຊາຊົນ ປະຕິວັດລາວ ໃນວັນທີ 22 ມີນາ ປີ 1955 ແມ່ນເຫດການການເມືອງສຳຄັນອັນຍິ່ງໃຫຍ່ ແລະ ເປັນບາດລ້ຽວຕັດສິນໃນປະຫວັດສາດແຫ່ງການຄົງຕົວ ແລະ ຂະຫຍາຍຕົວຂອງຊາດລາວເຮົາ. ນັບແຕ່ນັ້ນມາ, ພາລະກິດປະຕິວັດຢູ່ປະເທດເຮົາ ໄດ້ມີການນຳພາໂດຍກົງຂອງພັກປະຕິວັດ ຂອງຊົນຊັ້ນກຳມະກອນລາວເຮົາ ແລະ ເຮັດໃຫ້ຂະບວນການຕໍ່ສູ້ກູ້ຊາດຂອງປະຊາຊົນເຮົາມີບາດກ້າວຂະ ຫຍາຍຕົວທາງດ້ານຄຸນນະພາບ. ການສ້າງຕັ້ງພັກ ແມ່ນການລວມຍອດຂອງມູນເຊື້ອຮັກຊາດອັນສູງສົ່ງ ແລະ ນ້ຳໃຈຕໍ່ສູ້ອັນອົງອາດກ້າແກ່ນເດັດຂາດ ບໍ່ອ່ອນຍອມຂອງຊາດລາວເຮົາ ທີ່ໄດ້ຜ່ານການທົດສອບອັນລະອິດລະອ້ຽວຂ້ຽວຂາດ ໃນການຕໍ່ສູ້ເພື່ອປົກປັກຮັກສາ ແລະ ສ້າງສາປະເທດຊາດ.
ພັກປະຊາຊົນ ປະຕິວັດລາວ ທີ່ມີກຽດສະຫງ່າ, ຜູ້ຈັດຕັ້ງ ແລະ ນຳພາທຸກໄຊຊະນະຂອງການປະຕິວັດລາວ, ຜູ້ທີ່ໄດ້ນຳພາປະຊາຊົນລາວບັນດາເຜົ່າ ຂຽນໜ້າປະຫວັດສາດຍຸກໃໝ່ ອັນສະຫວ່າງສະໄຫວຂອງຊາດລາວເຮົາ ໄດ້ໝູນວຽນມາບັນຈົບຄົບຮອບ 68 ປີ (22/3/1955-22/3/2023). ການສະເຫຼີມສະຫຼອງວັນປະຫວັດສາດສຳຄັນດັ່ງກ່າວ ໄດ້ດຳເນີນໃນທ່າມກາງບັນຍາກາດທີ່ທົ່ວພັກ, ທົ່ວກອງ ທັບ ແລະ ປວງຊົນລາວເຮົາ ພວມອອກແຮງແຂ່ງຂັນຢ່າງເປັນຂະບວນກວ້າງຂວາງ ແລະ ຟົດຟື້ນຂອງທົ່ວສັງຄົມ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຕິດພັນກັບ 2 ວາລະແຫ່ງຊາດ, ກອງປະຊຸມສະຫຼຸບວຽກງານກວດກາທົ່ວປະເທດປະຈໍາປີ 2022, ກອງປະຊຸມວຽກງານການເມືອງແນວຄິດທົ່ວປະເທດ ຄັ້ງທີ V, ກອງປະຊຸມມຽກງານຈັດຕັ້ງທົ່ວປະເທດ, ການກະກຽມໃຫ້ແກ່ກອງປະຊຸມກາງສະໃໝ ແລະ ພາກພູມໃຈເປັນຢ່າງຍິ່ງທີ່ໄດ້ສຳເລັດການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 74 ປີ. ພິເສດ ພວກເຮົາໄດ້ສໍາເລັດການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022.
68 ປີ ກ່ອນໜ້ານີ້, ກອງປະຊຸມໃຫຍ່ຜູ້ແທນທົ່ວປະເທດຄັ້ງທຳອິດ ໄດ້ຈັດຂຶ້ນໃນວັນທີ 22/3-6/4/1955 ທີ່ແຂວງຫົວພັນ ຊຶ່ງມີຜູ້ແທນສົມບູນເຂົ້າຮ່ວມຈຳນວນ 20 ສະຫາຍ ຊຶ່ງຕາງໜ້າໃຫ້ສະມາຊິກພັກເກືອບ 400 ສະຫາຍໃນທົ່ວປະເທດ ໂດຍແມ່ນທ່ານ ໄກສອນ ພົມວິຫານ ເປັນປະທານ. ກອງປະຊຸມດັ່ງກ່າວ ແມ່ນມີຄວາມໝາຍສຳຄັນຫຼາຍດ້ານຄື: ແມ່ນເປັນການປະກາດສ້າງຕັ້ງພັກປະຕິວັດ ຊຶ່ງເປັນຕົວແທນຂອງຊົນຊັ້ນກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ. ແມ່ນເປັນການສະແດງໃຫ້ເຫັນວ່າ ການກຳເນີດຂອງພັກປະຕິວັດ ແມ່ນຜົນຂອງການປະສານສົມທົບ ລະຫວ່າງລັດທິມາກ-ເລນິນ, ຂະບວນກຳມະກອນ ແລະ ຊາວຜູ້ອອກແຮງງານລາວທີ່ຮັກຊາດ. ພັກກຳເນີດຂຶ້ນ ໄດ້ວາງແນວທາງການເມືອງອອກຢ່າງຖືກຕ້ອງ ແລະ ສອດຄ່ອງກັບຍຸກສະໄໝ ໂດຍນຳພາທົ່ວປວງຊົນລາວ ສາມັກຄີຕໍ່ສູ້ເຮັດສຳເລັດພາລະກິດປົດປ່ອຍຊາດ, ສ້າງປະເທດລາວໃຫ້ເປັນປະເທດສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ.
ນັບຕັ້ງແຕ່ມື້ກຳເນີດເກີດຂຶ້ນ, ພັກໄດ້ວາງໂຄງການການເມືອງອັນຖືກຕ້ອງ, ນຳພາ-ຊີ້ນຳ ຂະບວນການຕໍ່ສູ້ປົດປ່ອຍຊາດ, ສາມາດເຕົ້າໂຮມຄວາມສາມັກຄີ, ການສະໜັບສະໜູນຂອງຊັ້ນຄົນຕ່າງໆ ເຂົ້າຮ່ວມການຕໍ່ສູ້ຢ່າງອົງອາດກ້າຫານ ແລະ ສາມາດຕີເອົາຊະນະຈັກກະພັດຜູ້ຮຸກຮານ ທີ່ມີກຳລັງແຮງລື່ນພວກເຮົາຫຼາຍເທົ່າ. ປັດຈຸບັນນີ້ ແມ່ນພວມນຳພາ-ຊີ້ນຳ ຈັດຕັ້ງປະຕິບັດແນວທາງປ່ຽນແປງໃໝ່ ເພື່ອນຳເອົາປະເທດຊາດຫຼຸດພົ້ນຈາກການດ້ອຍພັດທະນາ.
ຕະຫຼອດໄລຍະ 68 ປີແຫ່ງການເຕີບໃຫຍ່ຂະຫຍາຍຕົວ ແລະ ນຳພາ ພາລະກິດປະຕິວັດອັນສູງສົ່ງ, ພັກເຮົາ ຍາມໃດກໍເປັນເສນາທິການທາງການເມືອງທີ່ສະຫຼາດສ່ອງໃສ, ເປັນກອງນຳໜ້າທີ່ແໜ້ນແກ່ນ, ເປັນຕົວແທນແຫ່ງຜົນປະໂຫຍດຂອງຊາດ ແລະ ຊາວຜູ້ອອກແຮງງານທີ່ຮັກຊາດ ແລະ ກ້າວໜ້າ, ເປັນແກນນຳໃນລະບົບການເມືອງແຫ່ງລະບອບປະຊາທິປະໄຕ ປະຊາຊົນ ອັນເຂັ້ມແຂງ ແລະ ເປັນກຳລັງການເມືອງອັນໜຶ່ງອັນດຽວ, ມີຄວາມສາມາດປະຕິບັດບົດບາດນຳພາຕໍ່ທົ່ວສັງຄົມ, ນຳພາປະເທດຊາດໄປສູ່ຄວາມຈະເລີນຮຸ່ງ ເຮືອງ.
ພັກສາມາດສ້າງໄດ້ຜົນງານ ແລະ ມູນເຊື້ອອັນສະຫງ່າງາມ, ພັກໄດ້ວາງຍຸດທະສາດ, ຍຸດທະວິທີປະຕິວັດທີ່ສະຫຼາດສ່ອງໃສ, ນຳພາການຕໍ່ສູ້ປົດປ່ອຍຊາດຂອງປະຊາຊົນລາວບັນດາເຜົ່າ ອອກຈາກແອກຄອບຄອງຂອງພວກຈັກກະພັດລ່າເມືອງຂຶ້ນແບບເກົ່າ ແລະ ໃໝ່ ຢ່າງຍືດເຍື້ອຍາວນານ ແລະ ມີໄຊຍິ່ງໃຫຍ່. ພັກໄດ້ນຳພາສ້າງຕັ້ງກອງທັບ ແລະ ບັນດາກຳລັງປະກອບອາວຸດປະຕິວັດຂອງປະຊາຊົນ, ທັງໄດ້ເອົາໃຈໃສ່ກໍ່ສ້າງ ແລະ ປັບປຸງໃຫ້ເຕີບໃຫຍ່ເຂັ້ມແຂງ, ເປັນກຳລັງຫຼັກແຫຼ່ງໃນວຽກງານປ້ອງກັນຊາດ-ປ້ອງກັນຄວາມສະຫງົບ. ພັກເຮົາ ໄດ້ສ້າງກາລະໂອກາດ ແລະ ຂະຫຍາຍກຳລັງຕົວຈິງຂອງການປະຕິວັດ, ຕີສັດຕູໃຫ້ຖອຍໄປເທື່ອລະກ້າວ, ຍາດເອົາໄຊຊະນະຢ່າງຕໍ່ເນື່ອງ ກ້າວຂຶ້ນຍາດເອົາໄຊຊະນະຢ່າງສົມບູນດ້ວຍ 3 ບາດຄ້ອນຍຸດທະສາດ ແລະ ລຸກຮື້ຂຶ້ນຢຶດອຳນາດໂດຍສັນຕິວິທີ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975 ສ້າງລະບົບອຳນາດການປົກຄອງປະຕິວັດຂຶ້ນໃນທົ່ວປະເທດ, ພັກນຳພາ ພາລະກິດປ່ຽນແປງໃໝ່ຢ່າງຮອບດ້ານ, ມີຫຼັກການ ໄດ້ຮັບຜົນສຳເລັດອັນສຳຄັນຫຼາຍປະການ, ສ້າງບັນດາປະຖົມປັດໄຈຂອງລະບອບສັງຄົມນິຍົມໃຫ້ປະກົດຂຶ້ນເປັນກ້າວໆ. ພັກໄດ້ກຳນົດ ແລະ ນຳພາປະຕິບັດຍຸດທະສາດ, ຍຸດໂທບາຍ ແລະ ນະໂຍບາຍຕ່າງໆ ດ້ານການພົວພັນຕ່າງປະເທດ ໃນແຕ່ລະໄລຍະຢ່າງຖືກຕ້ອງ ເຮັດໃຫ້ປະເທດເຮົາມີເພື່ອນມິດທັງຢູ່ໃກ້ ແລະ ໄກ ນັບມື້ນັບຫຼາຍ, ບົດບາດຂອງປະເທດເຮົາໃນເວທີສາກົນ ກໍໄດ້ຮັບການເຊີດຊູນັບມື້ນັບສູງຂຶ້ນ.
ເພື່ອເຊີດຊູເສີມຂະຫຍາຍຜົນງານ ແລະ ມູນເຊື້ອຂອງພັກປະຊາຊົນ ປະຕິວັດລາວ ພັກຕ້ອງສືບຕໍ່ປັບປຸງຕົນເອງ, ເຊີດຊູບົດບາດນຳພາ, ສ້າງພັກໃຫ້ປອດໃສ ເຂັ້ມແຂງ, ເພີ່ມທະວີຄວາມສາມັກຄີພາຍໃນພັກ, ຢຶດໝັ້ນຫຼັກການລວມສູນປະຊາທິປະໄຕ, ບຸກບືນສູ້ຊົນໃນການຈັດຕັ້ງປະຕິບັດບັນດາທິດທາງໜ້າທີ່ ແລະ ຄາດໝາຍສູ້ຊົນທີ່ກອງປະຊຸມໃຫຍ່ ຄັ້ງ XI ຂອງພັກວາງອອກ, ຊຸກຍູ້ສົ່ງເສີມການຜະລິດເປັນສິນຄ້າ ຕິດພັນກັບການແກ້ໄຂຄວາມທຸກຍາກຂອງປະຊາຊົນ, ສຸມໃສ່ປັບປຸງປົວແປງຊີວິດການເປັນຢູ່ໃຫ້ດີຂຶ້ນ, ພັກຕ້ອງຍົກສູງຄວາມສາມາດນຳພາ ອຳນາດການປົກຄອງ ເພື່ອເຮັດໃຫ້ອຳນາດການປົກຄອງເສີມຂະຫຍາຍທາດແທ້ຂອງລັດເຮົາທີ່ເປັນລັດຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ, ກໍ່ສ້າງກົງຈັກໃຫ້ປອດໃສຂາວສະອາດຢ່າງແທ້ຈິງ, ສືບຕໍ່ຮັບປະກັນຄວາມສະຫງົບທາງການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ, ຕັ້ງໜ້າປະຕິບັດມາດຕະການຍຸດທະສາດຫັນລົງຮາກຖານ, ລະດົມປະຊາຊົນກໍ່ສ້າງຮາກຖານການເມືອງໃຫ້ເຂັ້ມແຂງ ຕິດພັນກັບການສ້າງບ້ານ, ກຸ່ມບ້ານພັດທະນາໃນແຕ່ລະທ້ອງຖິ່ນ ໃຫ້ນັບມື້ເພີ່ມຂຶ້ນ, ແກ້ໄຂຄວາມຫຍຸ້ງຍາກຕ່າງໆ ກໍຄືຕ້ານທຸກປະກົດການຫຍໍ້ທໍ້ໃນກົງຈັກການຈັດຕັ້ງພັກ-ລັດ ແລະ ມະຫາຊົນທາງດ້ານການສໍ້ລາດບັງຫຼວງ, ການຟຸ່ມເຟືອຍ, ອາດຍາສິດ, ຍົກສູງປະສິດທິຜົນ ແລະ ກຳລັງແຮງແຫ່ງການບໍລິຫານຂອງລັດໃຫ້ສູງຂຶ້ນ.
ສະມາຊິກພັກ, ພະນັກງານ ຈົ່ງຕັ້ງໜ້າຝຶກຝົນຫຼໍ່ຫຼອມຕົນເອງ, ປັບປຸງແກ້ໄຂຈຸດອ່ອນ ແລະ ຂໍ້ຄົງຄ້າງຕ່າງໆ, ຍົກລະດັບຄຸນທາດການເມືອງ ແລະ ຄຸນສົມບັດສິນທຳປະຕິວັດໃຫ້ສູງຂຶ້ນ, ເພີ່ມທະວີຄວາມສາມັກຄີເປັນເອກະພາບ, ຄວາມເປັນແບບຢ່າງນຳໜ້າ ແລະ ຄວາມຮັບຜິດຊອບການເມືອງຂຶ້ນຕື່ມ ເພື່ອຮ່ວມກັນສ້າງກຳລັງແຮງໃຫ້ພັກ ເຮັດຫຼ້ອນພາລະກຳປະຫວັດສາດໃນເງື່ອນໄຂໃໝ່ໃຫ້ນັບມື້ສູງເດັ່ນຂຶ້ນ.
ພັກປະຊາຊົນ ປະຕິວັດລາວ ທີ່ມີກຽດສະຫງ່າ ໝັ້ນຍືນ !
