ອຸດົມໄຊ ສຳຫລວດແລວທາງເຊື່ອມຕໍ່ບ້ານຫາດເຕິ ເມືອງງາ ຫາ ບ້ານມົກຫລັກ ເຂດນ້ຳພວນ ເມືອງຮຸນ

ເມື່ອບໍ່ດົນຜ່ານມາ, ທີມງານຍ່າງສຳຫລວດແລວທາງເຊື່ອມຕໍ່ລະຫວ່າງບ້ານຫາດເຕິ ເມືອງງາ ຫາ ບ້ານມົກຫລັກ ເຂດນ້ຳພວນ ເມືອງຮຸນ ແຂວງອຸດົມໄຊ ນຳໂດຍທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ, ມີທ່ານ ນາງ ມະນີຈັນ ວິໄລຈິດ ເຈົ້າເມືອງງາ ພ້ອມດ້ວຍຄະນະ.

ການຍ່າງສຳຫລວດແລວເສັ້ນທາງຄັ້ງນີ້, ກໍເພື່ອສຶກສາຄວາມເປັນໄປໄດ້ໃນການສ້າງເສັ້ນທາງເຊື່ອມຕໍ່ລະຫວ່າງ ບ້ານຕໍ່ບ້ານ ເມືອງຕໍ່ເມືອງ ໃຫ້ມີການໄປມາສະດວກສະບາຍ ຄ້າຂາຍແລກປ່ຽນສິນຄ້າ, ວັດທະນະທຳ ແລະ ວຽກງານອື່ນໆໃຫ້ມີຄວາມຄ່ອງແຄ້ວ, ທັງເປັນການປະຕິບັດແຜນພັດທະນາເສດຖະກິດຂອງແຂວງອຸດົມໄຊ ທີ່ຈະຂະຫຍາຍເສັ້ນທາງອອກສູ່ເຂດຊົນນະບົດຫ່າງໄກສອກຫລີກ ໃຫ້ມີເສັ້ນທາງໃຊ້ໄປມາຫາສູ່ກັນ.

ການຍ່າງສຳຫລວດຄັ້ງນີ້, ມີໄລຍະທາງຍາວປະມານ 18 ກິໂລແມັດ. ໃນນີ້, ຜ່ານເຂດທົ່ງພຽງ 8,5 ກິໂລແມັດ, ຜ່ານເຂດພູສູງ 9,5 ກິໂລແມັດ ຊຶ່ງມີຄວາມເປັນໄປໄດ້ສູງໃນການສ້າງເສັ້ນທາງເຊື່ອມຕໍ່ລະຫວ່າງສອງບ້ານ ສອງເມືອງເຂົ້າຫາກັນ.