ລີເວີພູລ ອາດຈະພາດໄດ້ ຈູດ ເບລລິງແຮມ ໃນຕະຫລາດລະດູການນີ້ ເນື່ອງຈາກບັນຫາການເງິນ

ສື່ຊື່ດັງລາຍງານວ່າ ລີເວີພູລ ອາດຈະພາດໃນການເຊັນສັນຍາກັບ ຈູດ ເບລລິງແຮມ ກອງກາງໂບຣຸສເຊຍ ດອດມຸນ ມາຮ່ວມທີມໃນຕະຫລາດນັກເຕະລະດູການນີ້ເນື່ອງຈາກບັນຫາການເງິນ ໂດຍ ແມນເຊສເຕີ ຊິຕີ ແລະ ຣຽວ ມາດຣິດ ຂຶ້ນມາມີຄວາມຫວັງໃນການໄດ້ແທນ.

ສຳລັບ ເບລລິງແຮມ ຖືເປັນເປົ້າຫມາຍອັນດັບຫນຶ່ງໃນການເສີມທີມຂອງ ເຈີເກັນ ຄລອບ ຜູ້ຈັດການທີມລີເວີພູລ ມາຢ່າງຍາວນານ ແລະ ມີລາຍງານວ່າພວກເຂົາກຽມດຳເນີນການເພື່ອປິດບັນຊີການຊື້ຂາຍດາວເຕະອາຍຸ 19 ປີ ລາຍນີ້ມາຮ່ວມທີມໃຫ້ໄດ້ໃນຕະຫລາດນັກເຕະທີ່ພວມມາເຖິງ.

ແຕ່ຫລ້າສຸດ ເດວິດ ອອນສະໄຕ ນັກຂ່າວຄົນດັງຂອງ The Athletic ເປີດເຜີຍວ່າ ໂອກາດຫລາຍຂຶ້ນເລື້ອຍໆທີ່ລີເວີພູລ ຈະບໍ່ສາມາດຄວ້າ ເບລລິງແຮມ ມາເສີມແດນກາງ ເນື່ອງຈາກບັນຫາທາງດ້ານການເງິນ ຫລັງພວກເຂົາກຽມທີ່ຈະບໍ່ໄດ້ໄປຫລິ້ນໃນຢູຟາ ແຊ໊ມປຽນລີກ ໃນລະດູການໜ້າ ຂະນະທີ່ນັກເຕະຍັງມີສັນຍາກັບ ດອດມຸນ ເຖິງປີ 2025 ນຳອີກ.

ໂດຍມີລາຍງານເພີ່ມຕື່ມວ່າ ແມນເຊສເຕີ ຊິຕີ ແລະ ຣຽວ ມາດຣິດ ຢູ່ໃນຕຳແໜ່ງທີ່ດີກວ່າ ລີເວີພູລ ໃນການເຊັນກອງກາງທີມຊາດອັງກິດລາຍນີ້.

ສຳລັບ ເບລລິງແຮມ ຈະຕັດສິນໃຈຂັ້ນສຸດທ້າຍກ່ຽວກັບອະນາຄົດຂອງລາວໃນອີກບໍ່ເທົ່າໃດອາທິດຂ້າງໜ້າ.