ເກືອແຮ່ມີປະໂຫຍດຕໍ່ຮ່າງກາຍຄົນເຮົາແນວໃດ ?

ຮ່າງກາຍຄົນເຮົາຈຳເປັນຕ້ອງໄດ້ຮັບສານອາຫານທີ່ສຳຄັນຄົບທັງ 6 ປະພດ ໄດ້ແກ່ : ໂປຣຕິນ, ຄາໂບໄຮເດຣດ, ໄຂມັນ, ວິຕາມິນ, ເກືອແຮ່ ແລະ ນຳ້ ຈຶ່ງຈະເຮັດໃຫ້ອະໄວຍະວະຕ່າງໆເຮັດໜ້າທີ່ໄດ້ຕາມປົກກະຕິ.

ຮ່າງກາຍຈະມີເກືອແຮ່ຢູ່ 4 – 5% ຂອງນຳ້ໜັກຕົວ ແລະ ສາມາດແບ່ງເກືອແຮ່ທີ່ຄົນຕ້ອງການອອກເປັນ 2 ປະເພດ ຄື :

1. ເກືອແຮ່ທີ່ຕ້ອງການໃນຂະໜາດຫລາຍ ໝາຍເຖິງ ຮ່າງກາຍຕ້ອງການມື້ລະຫລາຍກ່ວາ 100 ມິນລີກຣາມ ເຊັ່ນ: ທາດການຊຽມ, ຟົສຟໍ, ໂປຣຕັສຊຽມ ເປັນຕົ້ນ.
2. ເກືອແຮ່ທີ່ຕ້ອງການໃນຂະໜາດໜ້ອຍ ໝາຍເຖິງ ຮ່າງກາຍຕ້ອງການມື້ລະໜ້ອຍກ່ວາ 15 ມິນລີກຣາມ ເຊັ່ນ: ທາດເຫລັກ, ສັງກະສີ, ໄອໂອດີນ, ຟລູອໍຣີນ ເປັນຕົ້ນ.

• ຄວາມສຳຄັນຂອງເກືອແຮ່ຕໍ່ຮ່າງກາຍ ສາມາດສະຫລຸບໄດ້ 5 ປະການ ຄື :

1. ເປັນສ່ວນປະກອບຂອງກະດູກ ແລະ ແຂ້ວ ເຊັ່ນ: ທາດການຊຽມ, ຟົສຟໍ ແລະ ແມັກນີຊຽມ.
2. ເປັນສ່ວນປະກອບຂອງໂປຣຕິນ, ຮໍໂມນ ເຊັ່ນ: ທາດເຫລັກ ເປັນສ່ວນປະກອບຂອງສານທີ່ເຮັດໜ້າທີ່ຂົນຖ່າຍອົກຊີແຊນໄປຍັງພາກສ່ວນຕ່າງໆທົ່ວຮ່າງກາຍ.
3. ຄວບຄຸມຄວາມເປັນກົດດ່າງຂອງຮ່າງກາຍ ເພື່ອຄວາມດຸ່ນດ່ຽງໃນການເຮັດວຽກຂອງແຊນຕ່າງໆ.
4. ຄວບຄຸມຄວາມດຸ່ນດ່ຽງຂອງນຳ້ທີ່ຢູ່ພາຍໃນຮ່າງກາຍ.
5. ເກືອແຮ່ຫລາຍຊະນິດເຮັດໜ້າທີ່ເປັນຕົວເລັ່ງປະຕິກິລິຍາພາຍໃນຮ່າງກາຍ.

• ຮ່າງກາຍຄົນເຮົາປຽບດັ່ງໂຮງງານໃຫຍ່ທີ່ຕ້ອງມີການເຮັດວຽກຂອງອະໄວຍະວະຕ່າງໆ ປະສານສຳພັນກັນຢູ່ຕະຫລອດເວລາ ດັ່ງນັ້ນ ເກືອແຮ່ທີ່ເຮັດໜ້າທີ່ດັ່ງກ່າວມາແລ້ວ ຈຶ່ງມີຄວາມຈຳເປັນຕໍ່ຮ່າງກາຍ ທີ່ເຮົາບໍ່ຄວນຈະຖືເບົາ.