ຕົວແທນ ຊາລາ ປະຕິເສດຂ່າວກຽມຍ້າຍໜີລີເວີພູລ

ຣາມີ ອັບບາສ ຕົວແທນສ່ວນຕົວຂອງ ໂມຮາເຫມັດ ຊາລາ ກອງໜ້າທີມຊາດອີຢິບ ອອກມາຕອບໂຕ້ຂ່າວລືວ່າ ດາວຍິງລາຍນີ້ຈະຍ້າຍອອກຈາກ ລີເວີພູລ ຕົ້ນສັງກິດໃນພຣີເມຍລີກ ອັງກິດ ເມື່ອຈົບການແຂ່ງຂັນລະດູການນີ້.

ກ່ອນໜ້ານີ້ມີກະແສວ່າ ໂມຮາເຫມັດ ຊາລາ ດາວຍິງດີກຣີ ທີມຊາດອີຢິບ ຈະຍ້າຍອອກຈາກຖິ່ນແອນຟິລ ເມື່ອຈົບການແຂ່ງຂັນລະດູການນີ້ ເພື່ອຍ້າຍໄປຫາຄວາມທ້າທາຍຄັ້ງໃຫມ່ ກັບສະໂມສອນໃນ ລາ ລີກາ ສະເປນ ແນວໃດກໍຕາມຫລ້າສຸດ ຣາມີ ອັບບາສ ຕົວແທນສ່ວນຕົວຂອງນັກເຕະລາຍນີ້ ອອກມາຕອບໂຕ້ຂ່າວດັ່ງກ່າວ ຜ່ານທາງທະວິດເຕີວ່າ.

“ ເຈົ້າໄປເອົາເລື່ອງນີ້ມາຈາກໃສ ເພາະມັນບໍ່ໄດ້ມາຈາກທັງ ຊາລາ ແລະ ຂ້ອຍທີ່ເວົ້າເຖິງ ຂໍຮ້ອງບອກພວກເຮົາແດ່ ”.

ເຊິ່ງຖືເປັນຄັ້ງທີ 2 ໃນຮອບ 3 ອາທິດ ທີ່ ຣາມີ ອອກມາໂຕ້ຕອບໃນປະເດັນການຍ້າຍທີມຂອງຊາລາ ຫລັງຈາກທີ່ກ່ອນໜ້ານີ້ລາວເຄີຍອອກມາກ່າວເຖິງຂ່າວການຍ້າຍທີມຂອງນັກເຕະໃນສັງກັດວ່າເປັນເລື່ອງບໍ່ມີສາລະ ໂດຍ ດາວຍິງອາຍຸ 30 ປີ ຫາກໍຈະຕໍ່ສັນຍາໃຫມ່ກັບ ລີເວີພູລ ໄປເມື່ອລະດູການຜ່ານມາ ແລະ ຍັງມີສັນຍາໃນຖິ່ນແອນຟິວ ເຖິງປີ 2025.

ສຳລັບ ຊາລາ ຍ້າຍຈາກໂຣມາ ມາຢູ່ກັບ ລີເວີພູລ ເມື່ອປີ 2017 ກ່ອນຈະກາຍເປັນນັກເຕະຄົນສຳຄັນຂອງທີມ ແລະ ລະດູການນີ້ ລາວຍິງປະຕູໃນພຣີເມຍລີກໄປແລ້ວ 11 ປະຕູ.