ຫວຽດນາມຈັບຜູ້ໃຊ້ເຟສບຸກ ຂໍ້ຫາກຽມກໍ່ລັດຖະປະຫານ

ຕໍາຫລວດຫວຽດນາມຕິດຕາມຈັບຜູ້ໃຊ້ເຟສບຸກຄົນໜຶ່ງ ເຊິ່ງຖືກຕັ້ງຂໍ້ຫາວ່າ ພະຍາຍາມຈະຍຶດອໍານາດຜູ້ນໍາປະເທດ ໂດຍການໂພສເລື່ອງເສື່ອມເສຍຂອງຜູ້ນໍາ ເຊິ່ງທາງການລະບຸວ່າເປັນການໃສ່ຮ້າຍ.

ວັນທີ 17 ມີນາ, ກະຊວງຄວາມໝັ້ນຄົງແຫ່ງຊາດຫວຽດນາມຖະແຫລງວ່າ: ເຈົ້າໜ້າທີ່ຕໍາຫລວດໄດ້ຈັບຜູ້ໃຊ້ເຟສບຸກຄົນໜຶ່ງ ເຊິ່ງທາງການຂອງຫວຽດນາມກ່າວຫາວ່າ: “ພະຍາຍາມກໍ່ລັດຖະປະຫານ” ໂດຍການເຜີຍແພ່ເນື້ອຫາເຮັດໃຫ້ກຸ່ມຜູ້ນໍາໃນພັກກອມມູນິດເສື່ອມເສຍຊື່ສຽງ.

ຜູ້ຕ້ອງຫາຊື່ທ້າວ ຟານຖືທັນຢາ ອາຍຸ 39 ປີ ຖືກກ່າວຫາວ່າ: ເປັນຜູ້ໂພສ ແລະ ແຊຣ໌ຂໍ້ຄວາມ ຫລື ບົດຄວາມ ແລະ ວິດີໂອ 25 ອັນ ນັບແຕ່ປີ 2018 ໂດຍມີເປົ້າໝາຍເພື່ອບິດເບືອນຂໍ້ມູນຄວາມຈິງ ແລະ ສ້າງຄວາມເສື່ອມເສຍຊື່ສຽງຕໍ່ກຸ່ມຜູ້ນໍາຂອງພັກກອມມູນິດຫວຽດນາມ ແລະ ຂອງປະເທດ.

ທ້າວ ຟານຖືທັນຢາ ຍັງຖືກເຈົ້າໜ້າທີ່ຕໍາຫລວດກ່າວຫາວ່າ: ເຂົ້າຮ່ວມກຸ່ມ ແລະ ເປັນຜູ້ຊັກຊວນຄົນອື່ນໆໃຫ້ເຂົ້າຮ່ວມກຸ່ມ Provisional National Government of Vietnam ເຊິ່ງມີຖານຢູ່ອາເມລິກາ ໂດຍກຸ່ມນີ້ຢູ່ໃນລາຍຊື່ອົງກອນຂອງຜູ້ກໍ່ການຮ້າຍຂອງຫວຽດນາມ.