ລະວັງ ! ຮ້ານແລກປ່ຽນເງິນຕາຈະຫວນມາໃນຄວາມມືດ

ບົດທິດກໍ່າ

ໃນອາທິດຜ່ານມາ, ມີໝູ່ຂອງທິດກໍ່າໄດ້ມາເລົ່າສູ່ຟັງວ່າ: ລາວໄດ້ເອົາເງິນບາດໄປແລກປ່ຽນເອົາເງິນກີບຢູ່ຮ້ານທີ່ເຄີຍປ່ຽນ ຫລື ເອີ້ນຢ່າງໜຶ່ງວ່າ: ຮ້ານຂາປະຈໍາ. ໃນຂະນະທີ່ລາວໄປຮອດ ເຫັນຮ້ານອັດປະຕູປິດແຈບ ແຕ່ກໍໄດ້ຍິນສຽງຄົນລົມກັນຢູ່ຂ້າງໃນຈຶ່ງຕັດສິນໃຈເຄາະປະຕູ ທັນໃດກໍມີຄົນມາໄຂປະຕູສ່ອງເບິ່ງ ລາວຈຶ່ງຖາມທັນທີວ່າ: “ຮ້ານເຮົາຍັງຮັບປ່ຽນເງິນຢູ່ບໍ່” ທັນໃດກໍໄດ້ຍິນຄໍາຕອບຈາກຄົນນັ້ນວ່າ “ຍັງປ່ຽນຢູ່” ລາວຈຶ່ງຟ້າວຈົກເງິນອອກມາຍື່ນໃຫ້ເຂົາປ່ຽນໃຫ້ແລ້ວກໍຟ້າວກັບ. ສ່ວນວ່າຮ້ານຢູ່ໝ້ອງໃດແຈໃດ ທິດກໍ່າຂໍເອົາໄວ້ໃນບັ້ງອົດກ່ອນ ຖ້າມື້ໃດບັ້ງອົດແຕກຈຶ່ງຄ່ອຍວ່າກັນ, ແຕ່ທີ່ຢາກເວົ້າກໍຄືມັນແມ່ນປາກົດການໃໝ່ອ່ຽມຂອງຮ້ານແລກປ່ຽນເງິນຕາທີ່ມາໃນຄວາມມືດ ແລະ ອາດມີຫລາຍໆຮ້ານໃນນະຄອນຫລວງວຽງຈັນ ຫລື ໃນທົ່ວປະເທດອາດເປັນມືດຄືແບບນີ້.

ກໍດັ່ງພວກເຮົາຮູ້ນໍາກັນແລ້ວວ່າ, ພາຍຫລັງມີແຈ້ງການຢຸດການອະນຸຍາດດໍາເນີນທຸລະກິດແລກປ່ຽນເງິນຕາທີ່ເປັນຕົວແທນຂອງບັນດາທະນາຄານທຸລະກິດ ເຊິ່ງມີຜົນສັກສິດມາແຕ່ວັນທີ 13 ມັງກອນ 2023 ຕາມແຈ້ງການສະບັບເລກທີ 01/ທຫລ ບັນດາຮ້ານແລກປ່ຽນເງິນຕາຈໍານວນ 170 ກວ່າຮ້ານ ທີ່ເປັນສາຂາຂອງທະນາຄານທຸລະກິດໃນທົ່ວປະເທດກໍໄດ້ເລີ່ມທະຍອຍກັນຢຸດການເຄື່ອນໄຫວ, ມີຫລາຍຮ້ານກໍອັດປະຕູໃສ່ໄລກອນ, ບາງຮ້ານກໍປົດປ້າຍໂຄສະນາ, ປ້າຍຊື່ຂອງຮ້ານອອກ ເຊິ່ງເບິ່ງຢ່າງໜຶ່ງຄືຈະໄດ້ຮັບໝາກຮັບຜົນຕາມເນື້ອໃນຈິດໃຈຂອງຄໍາສັ່ງສະບັບດັ່ງກ່າວ.

ແຕ່ວ່າອະນິຈາ ສິ່ງທີ່ບໍ່ຄາດຄິດມັນກໍເລີ່ມກໍາເລີບເຕີບສານມີໝັດມວຍແບບບັງພັນມາໃຫ້ເຮົາເຫັນຫລາຍຮູບຫລາຍສີ. ເມື່ອເປັນຄືດັ່ງວ່ານີ້ ນິຕິກໍາ ຫລືວ່າ ແຈ້ງການສະບັບດັ່ງກ່າວ ກໍເປັນພຽງຄໍາພິທີໄຮ້ທຽມທານ, ເປັນເອກະສານທີ່ຢູ່ໃນຕູ້ຢ່າງມິດງຽບ ແລະ ໄຮ້ຄວາມໝາຍ. ຫາກຕັ້ງໂຈດກັນວ່າ, ເຮັດແນວໃດມັນຈຶ່ງຈະໄດ້ຮັບໝາກຮັບຜົນ. ວິທີແກ້ທີ່ໄດ້ຮັບຜົນ ກໍຄືຜູ້ອອກຄໍາສັ່ງຕ້ອງເປັນສິນໄຊທີ່ມີພະລັງແຮງໄຮ້ທຽມທານ, ມືຂວາຈັບດາບສະມູໄລ, ມືຊ້າຍຖືໝາຍເຊີນຂອງຕໍາຫລວດເສດຖະກິດ ຫລື ຈາກໄອຍະການໄປຈຸດເປົ້າໝາຍ ແລ້ວກໍໃຊ້ມາດຕະການທາງວິຊາສະເພາະຢ່າງເຕັມຕົວ, ແຕ່ກໍຂໍໃຫ້ລະວັງ ແລະ ມີສະຕິເປັນເລີດ ເພາະຜູ້ທີ່ຈະເຂົ້າໄປປະຈັນບານເຊິ່ງໜ້ານັ້ນຢ້ານຖືກປືນລູກອັດທີ່ບໍ່ມີສຽງ.

ສ່ວນວິທີອັນທີສອງນັ້ນ ຜູ້ເຮັດວຽກດ້ານນີ້ຕ້ອງເກັ່ງ, ບໍ່ຢ້ານ, ບໍ່ກະຈອກ ທັງມີຄວາມຊື່ສັດບໍລິສຸດ, ບໍ່ເຫັນແກ່ເງິນແສນໄຖ່, ຕ້ອງເຫັນແກ່ໄພ່ແສນເມືອງ, ຕ້ອງເຮັດວຽກເພື່ອຊາດ ແລະ ເພື່ອປະຊາຊົນອີ່ຫລີຈຶ່ງຈະສາມາດເອົາຊະນະກັບໂຈນຫ້າຮ້ອຍທີ່ຄອຍເອົາຜົນປະໂຫຍດສ່ວນຕົນເປັນທີ່ຕັ້ງ ບໍ່ເຫັນຜົນຮ້າຍແກ່ຊາດບ້ານເມືອງ. ຕົວຢ່າງມາຮອດວັນທີ 17 ມີນາ 2023 ອັດຕາແລກປ່ຽນຊື້ຂາຍລະຫວ່າງເງິນກີບກັບເງິນບາດພຸ້ງຂຶ້ນຕິກໆ ຄືຈາກ 1 ພັນບາດເກີນ 5 ແສນກີບແລ້ວ. ລາຄາສິນຄ້າໃນທ້ອງຕະຫລາດຂຶ້ນຕິກໆ. ສົງຄາມເສດຖະກິດອາດເຮັດໃຫ້ຊາດເສຍເອກະລາດ, ຂາດສະຖຽນລະພາບ ແລະ ຄວາມໝັ້ນຄົງຍືນຍົງ. ນີ້ລະຄືຜົນຮ້າຍຈາກການນິຍົມບໍລິໂພກແຕ່ຂອງໝູ່ເປັນສ່ວນໃຫຍ່.