3 ບັນຫາໃຫຍ່ ທີ່ ແຂວງຫລວງພະບາງຈະເລັ່ງປັບປຸງ ເພື່ອຮອງຮັບນັກທ່ອງທ່ຽວທີ່ເພີ່ມຂຶ້ນໂດຍສະເພາະໄລຍະບຸນປີໃໝ່ລາວມາຈະມາເຖິງນີ້
ວັນທີ 16 ມີນາ 2023 ຜ່ານມາ, ທ່ານ ນາງ ສຸດາພອນ ຄົມທະວົງ ຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງຫຼວງພະບາງ ໃຫ້ຮູ້ວ່າ: ປີນີ້ຫລວງພະບາງຈະສະເຫລີມສະຫລອງບຸນປີໃໝ່ລາວ ພສ 2565 ເຕັມຮູບແບບເປັນເວລາ 10 ວັນ. ດັ່ງນັ້ນ, ພະແນກ ຖວທ ຈະເລັ່ງປັບປຸງສະຖານທີ່ພັກເຊົາ, ຮ້ານອາຫານ ເພື່ອອໍານວຍຄວາມສະດວກໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດທີ່ມາທ່ຽວຫລວງພະບາງ ໂດຍສະເພາະໄລຍະບຸນປີໃໝ່ລາວທີ່ຈະມາເຖິງນີ້ ໂດຍຈະເລັ່ງປັບປຸງໃສ່ 3 ບັນຫາໃຫຍ່ຄື:
- ປັບປຸງສິ່ງອໍານວຍຄວາມສະດວກຢູ່ໃນແຫລ່ງທອ່ງທ່ຽວໃຫ້ມີຄຸນນະພາບມີຄວາມຫລາກຫລາຍຂຶ້ນ.
- ປັບປຸງຄຸນນະພາບການໃຫ້ບໍລິການຢູ່ໃນແຫລ່ງທ່ອງທ່ຽວ ແລະ ລວມເຖິງຄຸນນະພາບການບໍລິການຢູ່ບັນດາຫົວໜ່ວຍທຸລະກິດຕ່າງໆເຊັ່ນ: ໂຮງແຮມ, ເຮືອນພັກ, ຮ້ານອາຫານ ຜູ້ໃຫ້ບໍລິການໂດຍທາງກົງ ແລະ ທາງອ້ອມກ່ຽວກັບການທ່ອງທ່ຽວ.
- ປັບປຸງພື້ນຖານໂຄງລ່າງຂະໜາດນ້ອຍ ຖະໜົນຫົນທາງ, ທາງຍ່າງ, ໄຟຟ້າ, ລະບົບສິ່ງແວດລ້ອມ,ປັບປຸງສວນສາທາລະນະຂະໜາດນ້ອຍຢູ່ຕາມຕົວເມືອງ ລວມເຖິງການໃຫ້ອະນຸຍາດມີການເປີດກວ້າງໃຫ້ນັກລົງທຶນເຂົ້າມາລົງທຶນຢູ່ພາຍໃນແຂວງຫລວງພະບາງໃຫ້ນັບມື້ຫລາຍຂຶ້ນ
ນອກນັ້ນ ທ່ານກ່າວອີກວ່າ: ປະຈຸບັນ,ທົ່ວແຂວງມີພະນັກງານນໍາທ່ຽວທັງໝົດ 553 ຄົນ, ໃນໄວໆນີ້, ຖວທ ຈະຈັດຝຶກອົບຮົມໃຫ້ຜູ້ນໍາທ່ຽວຂັ້ນແຂວງ ໂດຍຈະຈັດຝຶກອົບຮົມຕາມຫລັກສູດໂດຍໃຊ້ເວລາ 18 ວັນ ແລະ ກໍາລັງຢູ່ໃນຂັ້ນຕອນການຄົ້ນຄວ້າດ້ານເນື້ອໃນ, ເຊິ່ງຈະຈັດຝຶກອົບຮົມຜູ້ນໍາທ່ຽວເມືອງມໍລະດົກໂລກໂດຍສົມທົບກັບຂັ້ນແຂວງ ໂດຍສະເພາະແມ່ນຜູ້ນໍາທ່ຽວພາສາຈີນ ເພື່ອໃຫ້ຜູ້ເຂົ້າຮ່ວມໄດ້ມີຄວາມຮູ້ກ່ຽວກັບມໍລະດົກທາງດ້ານວັດທະນະທໍາຂອງແຂວງຫຼວງພະບາງ, ເຊິ່ງຈະເລີ່ມຮັບສະໝັກໃນມໍ່ໆນີ້.
