ກຽມຄວາມພ້ອມ ເປັນເຈົ້າພາບກອງປະຊຸມຮ່ວມມືສອງຝ່າຍ ລາວ-ກຳປູເຈຍ ປະຈຳປີ 2023
ວັນທີ 17 ມີນາ 2023 ຢູ່ກະຊວງ ປ້ອງກັນຄວາມສະຫງົບ (ປກສ), ຄະນະຜູ້ແທນປ້ອງກັນຄວາມສະຫງົບຝ່າຍລາວ ຈັດກອງປະຊຸມ ເພື່ອກຽມຄວາມພ້ອມກ່ອນເຂົ້າຮ່ວມກອງປະຊຸມ ຮ່ວມມືສອງຝ່າຍ ລະຫວ່າງ ກະຊວງ ປ້ອງກັນຄວາມສະຫງົບ ແຫ່ງ ສປປ ລາວ ກັບ ກະຊວງ ພາຍໃນ ແຫ່ງ ຣາຊະອານາຈັກກຳປູເຈຍ ປະຈຳປີ 2023 ທີ່ຈະຈັດຂຶ້ນໃນມໍ່ໆນີ້ ໂດຍການເປັນປະທານຂອງ ທ່ານ ພົຕ ວັນທອງ ກອງມະນີ ຮອງລັດຖະມົນຕີ ກະຊວງ ປກສ, ມີບັນດາອະນຸກຳມະການ, ຫົວໜ້າກອງບັນຊາການ ປກສ ແຂວງ ຈຳປາສັກ ແລະ ຫົວໜ້າ ປກສ ແຂວງ ອັດຕະປື ເຂົ້າຮ່ວມ.
ທ່ານ ພົຕ ສົມວັນ ສາຍລ້ອງພາ ຫົວໜ້າຫ້ອງວ່າການ ກະຊວງ ປກສ ໄດ້ລາຍງານການກະກຽມເປັນເຈົ້າພາບຈັດກອງປະຊຸມສອງຝ່າຍ ລາວ-ກຳປູເຈຍ ປະຈຳປີ 2023 ແລະ ແຜນການເຄື່ອນໄຫວຂອງກອງປະຊຸມ ໃນແຕ່ລະດ້ານ ແລະ ບັນດາວຽກ ແມ່ນສຳເລັດ ແລະ ມີຄວາມພ້ອມແລ້ວ. ຈາກນັ້ນ, ບັນດາອະນຸກຳມະການ ແລະ ຜູ້ແທນເຂົ້າຮ່ວມກອງປະຊຸມກໍໄດ້ປະກອບຄຳຄິດຄຳເຫັນໃສ່ແຕ່ລະດ້ານ ເພື່ອເຮັດໃຫ້ກອງປະຊຸມສອງຝ່າຍ ມີຜົນສຳເລັດຕາມຄາດໝາຍທີ່ວາງໄວ້ ແລະ ຮັກສາໄດ້ຄວາມສະຫງົບປອດໄພຮອບດ້ານ.
ໂອກາດດັ່ງກ່າວ, ທ່ານ ພົຕ ວັນທອງ ກອງມະນີ ກໍໄດ້ມີຄໍາເຫັນຊີ້ນໍາຕໍ່ຜູ້ແທນທີ່ເຂົ້າຮ່ວມກອງປະຊຸມ ພ້ອມກັນເອົາໃຈໃສ່ ຈັດຕັ້ງປະຕິບັດແຕ່ລະໜ້າວຽກຂອງແຕ່ລະອະນຸກຳມະການ, ໃຫ້ປະສານສົມທົບກັນຢ່າງລະ ອຽດໃນແຕ່ດ້ານ ເພື່ອເຮັດໃຫ້ກອງປະຊຸມສອງຝ່າຍລະຫວ່າງ ກະຊວງ ປ້ອງກັນຄວາມສະຫງົບ ແຫ່ງ ສປປ ລາວ ກັບ ກະຊວງພາຍໃນ ແຫ່ງ ຣາຊະອານາຈັກກຳປູເຈຍ ຄັ້ງນີ້ ມີຜົນສຳເລັດສູງ ເຊິ່ງຈະເປັນການປະກອບສ່ວນສຳຄັນເຂົ້າໃນການສືບຕໍ່ຮັດແໜ້ນສາຍພົວພັນມິດຕະພາບ ລະຫວ່າງ ສອງກະຊວງ ໃຫ້ນັບມື້ແໜ້ນແຟ້ນຍິ່ງໆຂຶ້ນ.
