ໃຜທີ່ມັກດື່ມນ້ຳອັດລົມຕ້ອງລະວັງ “ເຄື່ອງດື່ມທີ່ມີນ້ຳຕານສູງ” ມີສ່ວນເຮັດໃຫ້ຜົມຫລົ່ນ.
ໃຜທີ່ມັກດື່ມນ້ຳອັດລົມຕ້ອງລະວັງ “ເຄື່ອງດື່ມທີ່ມີນ້ຳຕານສູງ” ມີສ່ວນເຮັດໃຫ້ຜົມຫລົ່ນ.
ຜົນການວິໄຈຈາກ ມະຫາວິທະຍາໄລຊິນຫົວ ໃນນະຄອນຫລວງປັກກິ່ງ ພົບວ່າ ເຄື່ອງດື່ມທີ່ມີນ້ຳຕານສູງມີການສຳພັນກັນກັບອາການຜົມຫລົ່ນໃນກຸ່ມໄວໜຸ່ມຜູ້ຊາຍ.
ອາການຜົມຫລົ່ນແບບຜູ້ຊາຍ (MPHL) ເປັນຮູບແບບຜົມຫລົ່ນທີ່ພົບໄດ້ຫລາຍໃນກຸ່ມຜູ້ຊາຍ ປະມານ 95% ໂດຍອາການຈະມີຜົມຫລົ່ນ ຜົມບາງ ແລະ ເສັ້ນຜົມໜ້ອຍລົງ.
ນັກວິໄຈວິເຄາະວ່າ ຜູ້ຊາຍຈາກປະເທດຈີນ 1.028 ຄົນ ທີ່ມີອາຍຸສະເລ່ຍ 27,8 ປີ ມີພຶດຕິກຳດື່ມເຄື່ອງດື່ມ ທີ່ມີນ້ຳຕານ ຫລາຍປະເພດເຊັ່ນ ນ້ຳໝາກໄມ້ ນ້ຳອັດລົມ ຊາໃສ່ນ້ຳຕານ ຫລື ຊານົມ ແລະ ກາເຟ ພົບວ່າ 57,6% ຂອງຜູ້ເຂົ້າຮ່ວມສຳຫລວດມີອາການຜົມຫລົ່ນແບບຜູ້ຊາຍ.
ກຸ່ມຜູ້ເຂົ້າຮ່ວມສຳຫລວດ 44,6% ພວກເຂົາດື່ມເຄື່ອງດື່ມທີ່ມີນ້ຳຕານຫລາຍກວ່າ 7 ຄັ້ງຕໍ່ອາທິດ ເຊິ່ງຄະນະວິໄຈພົບວ່າ ຜູ້ທີ່ບໍລິໂພກເຄື່ອງດື່ມທີ່ມີນ້ຳຕານສູງຂຶ້ນຈະມີຄວາມສ່ຽງປະເຊີນກັບອາການຜົມຫລົ່ນແບບຜູ້ຊາຍຫລາຍຂຶ້ນ ລະດັບການບໍລິໂພກເຄື່ອງດື່ມທີ່ມີນ້ຳຕານຂອງກຸ່ມທີ່ຜົມຫລົ່ນ ສະເລ່ຍ 4,293 ມິນລີລິດຕໍ່ອາທິດ ສູງກວ່າລະດັບກຸ່ມປົກກະຕິ ທີ່ມີແຕ່ 2.513 ມິນລີລິດຕໍ່ອາທິດ.
