ປກສ ແຂວງຫລວງນໍ້າທາສຶກສາອົບຮົມກຸ່ມໄວໜຸ່ມຄ້າ-ຂາຍ, ມົ້ວສຸມ, ແລະ ດື່ມນໍ້າໃບກະທ່ອມ

ພັທ ຄໍາມະນີ ສີແສງພວງ ຫົວໜ້າພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ໄດ້ໃຫ້ຮູ້ວ່າ: ວັນທີ 7 ມີນາ 2023 ຜ່ານມາ ໄດ້ດຳເນີນເຄື່ອນໄຫວກວດກາຕາມການແຈ້ງເບາະແສ ກໍລະນີມີການຄ້າຂາຍ, ມົ້ວສຸມ ດື່ມນໍ້າກະທ່ອມ ເຊິ່ງ ສາມາດນໍາຕົວຜູ້ຄ້າຂາຍກຸ່ມແກ້ງ, ພັກພວກທີ່ມົ້ວສຸມ 18 ຄົນ, ຍິງ 9 ຄົນ (ອາຍຸລະຫວ່າງ 15-19 ປີ) ພ້ອມຂອງກາງນໍ້າໃບກະທ້ອມ 3 ຕຸກ, ໃບກະທ່ອມ 13 ຊຸດ, ນໍ້າຢາດີໄອ 14 ແກ້ວນ້ອຍ, ກະເຟປາຕີ້ 3 ຊອງ, ໄປດໍາເນີນການສອບສວນ.

ຜ່ານການເອົາຄໍາໃຫ້ການພວກກ່ຽວໄດ້ຮັບສາລະພາບວ່າ: ໃບກະທ່ອມ, ຢາສູບໄຟຟ້າ, ຢາດີໄອ ແລະ ກາເຟປາຕີ້ ທີ່ນໍາມາມົ້ວສຸມ ແມ່ນໄດ້ສັ່ງຊື້ທາງເຟສບຸກຈາກກຸ່ມຄ້າ-ຂາຍ ຢູ່ທາງນະຄອນຫລວງວຽງຈັນ ແລະ ແຂວງສະຫວັນນະເຂດ ພາຍຫລັງປະສານໄດ້ມາ ກໍພາກັນປະສົມຕາມສູດ, ຕົ້ມດື່ມ, ມົ້ວສຸມຕາມກະແສກຸ່ມໄວໜຸ່ມ ແລະ ໄດ້ຈັດເປັນຊຸດຂາຍໃຫ້ບັນດາກຸ່ມອື່ນ ໃນທົ່ວແຂວງ.

ພັທ ຄໍາແຝງ ວີປະເສີດ ຮອງຫົວໜ້າກອງບັນຊາການ ປກສ ແຂວງ ໄດ້ສຶກສາອົບຮົມ ແລະ ກ່າວເຕືອນ ນ້ອງນັກຮຽນທີ່ມີພຶດຕິກໍາເຄື່ອນໄຫວມົ້ວສຸມ ດື່ມນໍ້າໃບກະທ່ອມ, ດື່ມກາເຟປາຕີ້ ແລະ ສູບຢາສູບໄຟຟ້າ ໃຫ້ຢຸດເຊົາຕໍ່ພຶດຕິກໍາດັ່ງກ່າວ ເຊິ່ງມັນເປັນການສ້າງຄວາມບໍ່ສະຫງົບຢູ່ໃນສັງຄົມ, ຜິດຕໍ່ລະບຽບກົດໝາຍ ແລະ ລະເມີດຕໍ່ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ພ້ອມຮຽກຮ້ອງໃຫ້ພໍ່ແມ່ຜູ້ປົກຄອງ, ຄູ-ອາຈານ ຈົ່ງເອົາໃຈໃສ່ຕິດຕາມກວດກາສຶກສາອົບຮົມລູກຫຼານບໍ່ໃຫ້ເຂົາເຈົ້າເຄື່ອນໄຫວກະທໍາຜິດຕື່ມອີກ.