ຝຣັ່ງປະທ້ວງໜັກ ຫລັງລັດຖະບານໃຊ້ “ອໍານາດພິເສດ” ອອກກົດໝາຍເພີ່ມອາຍຸບໍານານ

ລັດຖະບານຝຣັ່ງໃຊ້ “ອໍານາດພິເສດ” ບັນຍັດກົດໝາຍເພີ່ມເພດານອາຍຸບໍານານຂອງແຮງງານໃນລະບົບເປັນ 64 ປີ ຮຽກສຽງປະນາມຢ່າງໜັກຈາກຝ່າຍຄ້ານ ແລະ ກາຍເປັນການຍົກລະດັບການປະທ້ວງ.

ວັນທີ 17 ມີນາ, ສໍານັກຂ່າວຕ່າງປະເທດລາຍງານວ່າ: ສະພາຜູ້ແທນລາສະດອນຂອງຝຣັ່ງປະຊຸມ ໃນວັນທີ 16 ມີນາ ເພື່ອອະພິປາຍ ແລະ ລົງມະຕິກ່ຽວກັບເນື້ອໃນທັງໝົດໃນແຜນປະຕິຮູບບໍານານ ເຊິ່ງສະເໜີໂດຍປະທານາທິບໍດີ ເອັມມານູເອລ ມາຄຣົງ.

ເນື້ອໃນສໍາຄັນຂອງແຜນດັ່ງກ່າວ ເຊິ່ງລັດຖະບານຝຣັ່ງຢືນຢັນ ເປັນຄວາມພະຍາຍາມຍົກລະດັບຄວາມເທົ່າທຽມ ແລະ ເພື່ອກາລັນຕີສິດຂັ້ນພື້ນຖານດ້ານແຮງງານທີ່ຄວບຄຸມໃຫ້ທຸກອາຊີບ ຄືບຸກຄົນເກີດກ່ອນປີ 1975 ສາມາດຮັບບໍານານໄດ້ຕອນອາຍຸ 62 ປີ.

ເຖິງຢ່າງໃດກໍຕາມ, ບຸກຄົນທີ່ເກີດຫລັງຈາກນັ້ນຈະຕ້ອງຢູ່ພາຍໃຕ້ເພດານການຮັບບໍານານໃໝ່ ຄື 64 ປີ ເພື່ອໃຫ້ໄດ້ຮັບສະຫວັດດີການຫລັງອາຍຸບໍານານແບບເຕັມຈໍານວນ ໂດຍເງິນບໍານານຂັ້ນຕໍ່າຈະເພີ່ມຂຶ້ນຈາກ 1.000 ເອີໂຣຕໍ່ເດືອນ ເປັນເດືອນລະ 1.200 ເອີໂຣ ຄວບຄຸມໄລຍະເວລາ 43 ປີ.

ທັງນີ້, ເນື້ອໃນທັງໝົດຜ່ານການອະພິປາຍ ແລະ ລົງມະຕິໂດຍວຸດທິສະພາແລ້ວ ໃນວັນທີ 11 ມີນາຜ່ານມາ, ແຕ່ການອະພິປາຍໃນຊັ້ນສະພາຕໍ່າ ເພື່ອໃຫ້ແຜນດັ່ງກ່າວໄດ້ຮັບການບັນຍັດເປັນກົດໝາຍນັ້ນ ເປັນໄປດ້ວຍຄວາມວຸ້ນວາຍ ເນື່ອງຈາກຝ່າຍຄ້ານບໍ່ເຫັນພ້ອມຕໍ່ແຜນນີ້. ດັ່ງນັ້ນ ນາຍົກລັດຖະມົນຕີ ເອລິຊາເບດ ບອນ ຈຶ່ງຕັດສິນໃຈໃຊ້ອໍານາດຕາມມາດຕາ 49 : 3 ຕາມລັດຖະທໍາມະນູນຝຣັ່ງ ທີ່ໃຫ້ສິດລັດຖະບານກາງໃນການຜ່ານຮ່າງກົດໝາຍໄດ້ຢ່າງອັດຕະໂນມັດ ໂດຍບໍ່ຈໍາເປັນຕ້ອງໄດ້ຜ່ານການລົງມະຕິຈາກສະພາ.

ສະຖານະການທີ່ເກີດຂຶ້ນກະຕຸ້ນໃຫ້ເກີດການປະທ້ວງຄັ້ງໃຫຍ່ຕາມຄວາມຄາດໝາຍຂອງທຸກຝ່າຍ ໂດຍສະຖານະການຮຸນແຮງທີ່ສຸດໃນນະຄອນຫລວງປາຣີ ມີຜູ້ຖືກຈັບຫລາຍກວ່າ 120 ຄົນ. ຂະນະທີ່ພັນທະມິດສະຫະພາບແຮງງານຫລາຍສາຂາອາຊີບປະກາດກຽມພັກວຽກປະທ້ວງຄັ້ງໃຫຍ່ຮ່ວມກັນຄັ້ງໃໝ່ ໃນວັນທີ 23 ມີນານີ້.