ຈະລຶບລ້າງໃບອະນຸຍາດນຳໃຊ້ທີ່ດິນເຂດອຸທິຍານພູເຂົາຄວາຍ ແລະ ປ່າສະຫງວນພູພະນັງ ພ້ອມປະຕິບັດວິໄນຕໍ່ຜູ້ລະເມີດຢ່າງເຂັ້ມງວດ

ວັນທີ 13 ມີນາ 2023 ຜ່ານມາ, ພະແນກກະສິກຳປ່າໄມ້ ນະຄອນຫລວງວຽງຈັນ ຈັດກອງປະຊຸມປະເມີນການຈັດຕັ້ງປະຕິບັດວຽກງານ ສ.ສີຂຽວ ແລະ ຜັນຂະຫຍາຍຄຳສັ່ງວ່າດ້ວຍການປົກປັກຮັກສາປ່າສະຫງວນແຫ່ງຊາດພູພະນັງ ແລະ ພູເຂົາຄວາຍໃນຂອບເຂດນະຄອນຫລວງວຽງຈັນ ໂດຍການເປັນປະທານຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ.
ທ່ານ ແສງອາລຸນ ສຸລິຍະວົງ ຫົວໜ້າພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ລາຍງານວ່າ: ບັນຫາການບຸກລຸກທີ່ດິນປ່າໄມ້, ການລັກລອບຕັດໄມ້ທຳລາຍປ່າ, ຄ້າຂາຍສັດປ່າທີ່ໃກ້ຈະສູນພັນໃນນະຄອນຫລວງວຽງຈັນ ໂດຍໄດ້ມີມາດຕະການແກ້ໄຂຢ່າງເປັນລະບົບຄື: ນຳເອົາວຽກງານໂຄສະນາເຜີຍແຜ່ບັນດາກົດໝາຍ ແລະ ນິຕິກຳລຸ່ມກົດໝາຍລົງສູ່ບ້ານໃຫ້ທົ່ວເຖິງ ໂດຍແນໃສ່ບ້ານທີ່ມີຂອບເຂດ ,ແດນຕິດກັບປ່າໄມ້. ສ່ວນບຸກຄົນ, ນິຕິບຸກຄົນ ແລະ ການຈັດຕັ້ງທີ່ໄປຈັບຈອງທີ່ດິນຢູ່ປ່າສະຫງວນແຫ່ງຊາດພູພະນັງ, ເຂດອຸທິຍານແຫ່ງຊາດພູເຂົາຄວາຍ ແມ່ນໃຫ້ຢຸດຕິກິດຈະກຳຢູ່ໃນເນື້ອທີ່ດັ່ງກ່າວຢ່າງຖາວອນ ແລະ ສະເໜີຂະແໜງການທີ່ກ່ຽວຂ້ອງລຶບລ້າງໃບອະນຸຍາດນຳໃຊ້ທີ່ດິນ ພ້ອມທັງດຳເນີນການກວດກາ ແລະ ປະຕິບັດວິໄນຕໍ່ຜູ້ລະເມີດຢ່າງເຂັ້ມງວດ-ເດັດຂາດ ແລະ ເປັນເຈົ້າການໃນການລົງຕິດຕາມ, ກວດກາ ສະກັດກັ້ນໂດຍສົມທົບກັບກົມຄຸ້ມຄອງປ່າສະຫງວນ ແລະ ປ່າປ້ອງກັນ, ຫ້ອງການກະສິກຳ ແລະ ປ່າໄມ້ 9 ເມືອງ, ອຳນາດການປົກຄອງບ້ານ ພ້ອມຕິດຕາມກວດກາ ເພື່ອໃຫ້ວຽກງານນີ້ມີປະສິດທິຜົນສູງ ແລະ ຫລຸດໜ້ອຍຖອຍລົງເທື່ອລະກ້າວ ແລະ ນຳເອົາຜູ້ກະທຳຜິດມາລົງໂທດຕາມກົດໝາຍ, ການກວດກາ ແລະ ການດຳເນີນຄະດີ ແມ່ນໃຫ້ເປັນໄປຕາມລະບຽບກົດໝາຍ.
ໂອກາດນີ້, ທ່ານເຈົ້າຄອງນະຄອນຫລວງວຽງຈັນ ໄດ້ຊີ້ນຳໃຫ້ພາກສ່ວນທີ່ກ່ຽວຂ້ອງສືບຕໍ່ແກ້ໄຂບັນຫາການບຸກລຸກ ແລະ ຈັບຈອງທີ່ດິນປ່າໄມ້ ໂດຍສະເພາະເຂດອຸທິຍານແຫ່ງຊາດພູເຂົາຄວາຍ ແລະ ເຂດປ່າສະຫງວນພູພະນັງ ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງໃນການຄຸ້ມຄອງໃຫ້ມີປະສິດທິຜົນ, ປະຕິບັດຕາມພາລະບົດບາດຂອງຂະແໜງຕົນຢ່າງເຂັ້ມງວດໃນການນຳໃຊ້ທີ່ດິນເຂົ້າໃນການຜະລິດກະສິກຳ ຕ້ອງໄປຕາມແບບແຜນຈັດສັນທີ່ດິນທີ່ໄດ້ກຳນົດໄວ້ໃນເບື້ອງຕົ້ນ, ນຳເອົາວຽກງານໂຄສະນາເຜີຍແຜ່ກົດໝາຍປ່າໄມ້ ແລະ ນິຕິກຳລຸ່ມກົດໝາຍລົງສູ່ບ້ານໃຫ້ທົ່ວເຖິງ, ຕ້ອງຈັດສັນທີ່ດິນຂັ້ນບ້ານຄືນໃໝ່ ໂດຍສະເພາະດິນທີ່ກຳນົດເປັນເຂດຟື້ນຟູປ່າໄມ້ ພ້ອມທັງປັບປຸງລະບົບການຄຸ້ມຄອງໃຫ່ສອດຄ່ອງກັບການພັດທະນາປ່າໄມ້ແບບຍືນຍົງໃນຕໍ່ໜ້າ ແລະ ຍາວນານ, ຖືເອົາການສະກັດກັ້ນ ແລະ ດັບມອດໄຟປ່າ ແລະ ການຟື້ນຟູປ່າເປັນວຽກງານສຳຄັນໃນການຄຸ້ມຄອງ ອຸທິຍານແຫ່ງຊາດ, ປ່າສະຫງວນແຫ່ງຊາດ ແລະ ປ່າປ້ອງກັນ ປະເພດອື່ນໆໃຫ້ຫລາຍຂຶ້ນ.