ບໍລິສັດຍີ່ປຸ່ນປະກາດຂຶ້ນຄ່າແຮງຄັ້ງໃຫຍ່ໃນຮອບ 20 ກວ່າປີ ຊ່ວຍພະນັກງານສູ້ໄພເງິນເຟີ້
ບໍລິສັດຍັກໃຫຍ່ຂອງຍີ່ປຸ່ນເຫັນພ້ອມປັບຂຶ້ນຄ່າແຮງໃຫ້ພະນັກງານສູງສຸດໃນຮອບຫລາຍສິບປີ ລະຫວ່າງການເຈລະຈາກັບສະຫະພາບແຮງງານໃນວັນທີ 15 ມີນາ ຫລັງທ່ານ ຟູມິໂອະ ຄິຊິດະ ນາຍົກລັດຖະມົນຕີຍີ່ປຸ່ນ ໄດ້ຮຽກຮ້ອງໃຫ້ຜູ້ປະກອບການປັບຂຶ້ນຄ່າແຮງງານ ເພື່ອຊ່ວຍເຫລືອປະຊາຊົນໃຫ້ສາມາດຮັບມືຕໍ່ອັດຕາເງິນເຟີ້ທີ່ເພີ່ມສູງຂຶ້ນໄດ້.
ນັບແຕ່ປີ 1990 ອັດຕາຄ່າແຮງງານຂອງພະນັກງານກິນເງິນເດືອນໃນຍີ່ປຸ່ນເກືອບຈະບໍ່ຂຶ້ນເລີຍ ໂດຍຂໍ້ມູນຈາກອົງການເພື່ອການຮ່ວມມື ແລະ ການພັດທະນາທາງເສດຖະກິດ (OECD) ລະບຸວ່າ: ຄ່າແຮງງານສະເລ່ຍຂອງຍີ່ປຸ່ນປັບຂຶ້ນພຽງ 6,3% ນັບແຕ່ປີ 1990-2021. ຂະນະທີ່ປະເທດກຸ່ມ G7 ອື່ນໆເຊັ່ນ: ອາເມລິກາ ແລະ ອັງກິດ ຄ່າແຮງຂອງປະຊາຊົນເພີ່ມຂຶ້ນກວ່າ 50% ໃນໄລຍະເວລາດຽວກັນ.
ເຖິງຢ່າງໃດກໍຕາມ, ປັດຈຸບັນອັດຕາເງິນເຟີ້ຂອງຍີ່ປຸ່ນເພີ່ມຂຶ້ນສູງສຸດໃນຮອບ 40 ກວ່າປີ ໂດຍລາຄາຜູ້ບໍລິໂພກພື້ນຖານຂອງຍີ່ປຸ່ນເພີ່ມຂຶ້ນ 4,2% ໃນເດືອນມັງກອນເມື່ອທຽບໃສ່ແຕ່ລະປີ ແລະ ເປັນການຂະຫຍາຍຕົວຢ່າງວ່ອງໄວທີ່ສຸດນັບແຕ່ເດືອນກັນຍາ 1981 ຫລັງໄດ້ຮັບແຮງກົດດັນຈາກການອ່ອນຄ່າຂອງເງິນເຢນ ບວກກັບຕົ້ນທຶນສິນຄ້າປັບສູງຂຶ້ນ ສົ່ງຜົນໃຫ້ໄລຍະຜ່ານມາລັດຖະບານຂອງທ່ານ ຄິຊິດະ ໄດ້ພະຍາຍາມຊຸກຍູ້ໃຫ້ບັນດາຜູ້ປະກອບການປັບຂຶ້ນຄ່າແຮງງານໃຫ້ພະນັກງານຂອງຕົນເອງ.
Nissan ປະກາດວ່າ: ຈະປັບຂຶ້ນເງິນເດືອນປະມານ 12.000 ເຢນ ເຊິ່ງຖືເປັນການປັບຂຶ້ນສູງສຸດນັບແຕ່ປີງົບການເງິນ 2004. ນອກຈາກນີ້ ບໍລິສັດຍັງກຽມປັບຂຶ້ນໂບນັດ 5,5 ເດືອນຕາມຂໍ້ຮຽກຮ້ອງຂອງສະຫະພາບແຮງງານ, ສ່ວນ Toyoto Motor ກຽມຂຶ້ນເງິນເດືອນສູງສຸດໃນຮອບ 20 ປີ. ຂະນະທີ່ Honda Motor ຕົກລົງຈະປັບຂຶ້ນຄ່າແຮງງານສູງສຸດໃນຮອບ 30 ປີ.
ນອກຈາກອຸດສາຫະກໍາລົດຍົນແລ້ວ, ບໍລິສັດເຄື່ອງໃຊ້ໄຟຟ້າຊື່ດັງເຊັ່ນ Hitachi ກໍຕັດສິນໃຈຈະປັບຖານເງິນເດືອນຂຶ້ນ 7.000 ເຢນ ຫລື ເປັນລະດັບສູງສຸດນັບແຕ່ປີ 1998, ສ່ວນຍີ່ຫໍ້ເຄື່ອງດື່ມ Sapporo ກຽມຂຶ້ນຖານເງິນເດືອນ 9.000 ເຢນ ສູງສຸດໃນຮອບ 40 ປີ.
ເຖິງຢ່າງໃດກໍຕາມ, ຍັງບໍ່ແນ່ນອນວ່າບໍລິສັດຂະໜາດນ້ອຍຈະມີນະໂຍບາຍປັບຂຶ້ນຄ່າແຮງງານນໍາ ຫລື ບໍ່ ເນື່ອງຈາກພວກເຂົາຍອມຮັບວ່າ: ຮູ້ສຶກກັງວົນຖ້າຈະຕ້ອງປ່ອຍໃຫ້ລູກຄ້າເປັນຜູ້ແບກຮັບຕົ້ນທຶນທີ່ສູງຂຶ້ນ.
ອ້າງອີງ:
https://english.kyodonews.net/…/3d87b05ab5d3-major…
https://www.reuters.com/…/japans-big-firms-set-offer…/
