12 ບັນຫາສຳຄັນ ທີ່ປະທານສະພາແຫ່ງຊາດໃຫ້ທິດຊີ້ນໍາຕໍ່ ແຂວງຜົ້ງສາລີ ເພື່ອນຳໄປປະຕິບັດ

ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ ລະຫວ່າງວັນທີ 14-16 ມີນາ 2023 ນີ້, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາ 12 ບັນຫາສຳຄັນ ຕໍ່ຄະນະພັກ, ອົງການປົກຄອງ ແຂວງຜົ້ງສາລີ ຄື:

1. ຕ້ອງໄດ້ເພີ່ມທະວີຄວາມສາມັກຄີ, ຄວາມເປັນເອກະພາບພາຍໃນ ບົນພື້ນຖານແນວທາງນະໂຍບາຍຂອງພັກ, ມະຕິ, ຄໍາສັ່ງ, ລະບຽບກົດໝາຍ ແລະ ລະບຽບການ, ກົນໄກວິທີການເຮັດວຽກທີ່ວາງອອກ; ເພີ່ມທະວີຄວາມຮັບຜິດຊອບການເມືອງ, ຄວາມຮັບຜິດຊອບທີ່ໄດ້ຮັບການມອບໝາຍໃຫ້ສູງຂຶ້ນ ແລະ ປັບປຸງແບບແຜນການນໍາພາ-ຊີ້ນໍາ, ແບບແຜນວິທີເຮັດວຽກ ໃຫ້ແທດຕົວຈິງ, ມີວິທະຍາສາດ; ກໍາແໜ້ນແນວທາງ, ມະຕິ, ຄໍາສັ່ງ ຂອງພັກ, ລະບຽບກົດໝາຍຂອງລັດ ແລະ ກໍາແໜ້ນພາລະບົດບາດ, ສິດ ແລະ ໜ້າທີ່ ຂອງຄະນະພັກ, ອໍານາດການປົກຄອງແຕ່ລະຂັ້ນ ແລະ ການເຮັດແທ້ທໍາຈິງ ເພື່ອປະເທດຊາດ, ເພື່ອປະຊາຊົນ; ເພີ່ມທະວີຄວາມອົດທົນ, ຄວາມເສຍ ສະຫລະເພື່ອສ່ວນລວມ; ຄວາມອົດທົນ ແລະ ຄວາມເປັນແບບຢ່າງ ຂອງພະນັກງານ, ສະມາຊິກພັກ ແລະ ນັກຮົບ ໃຫ້ແກ່ມະຫາຊົນ, ສັງຄົມ, ປະຊາຊົນ ແລະ ປະດິດສ້າງ, ນໍາພາປະຊາຊົນເຮັດຕົວຈິງໃຫ້ຫລາຍ ເພື່ອໃຫ້ປະຊາຊົນພົ້ນຈາກຄວາມທຸກຍາກ.
2. ຈົ່ງພ້ອມກັນຫັນທີ່ຕັ້ງຂອງແຂວງ ຈາກທີ່ຕັ້ງຍຸດທະສາດດ້ານການທະຫານ ມາເປັນທີ່ຕັ້ງຍຸດທະສາດທາງດ້ານເສດຖະກິດ ດ້ວຍການເພີ່ມທະວີການພົວພັນຮ່ວມມືກັບ ບັນດາແຂວງຂອງ ສປ ຈີນ, ສສ ຫວຽດນາມ ໃນການສະໜອງຜົນຜະລິດດ້ານກະສິກໍາ ແລະ ດ້ານອື່ນໆ ໃຫ້ແກ່ຕະຫລາດຂອງສອງປະເທດ.
3. ເພີ່ມທະວິີການພົວພັນຮ່ວມມືກັບ ອົງການປົກຄອງຂອງບັນດາແຂວງ ສອງປະເທດ ທີ່ມີຊາຍແດນຕິດຈອດກັບແຂວງຜົ້ງສາລີ ເພື່ອຜູກແໜ້ນການຮ່ວມມື, ສ້າງຄວາມເຊື່ອໝັ້ນ, ຄວາມໄວ້ເນື້ອເຊື່ອໃຈ ເຊິ່ງກັນ ແລະ ກັນ ໃຫ້ຫລາຍຂຶ້ນ ເຊິ່ງຈະເປັນບ່ອນອີງໃຫ້ແກ່ການຮ່ວມມືທາງດ້ານເສດຖະກິດ ຂອງພາກລັດ ແລະ ພາກເອກະຊົນຂອງສອງຝ່າຍ ເພື່ອເລັ່ງພັດທະນາເສດຖະກິດ, ຍາດແຍ່ງເອົາທຶນຮອນ, ເຕັກນິກວິຊາການ.
4. ເອົາໃຈໃສ່ສຶກສາອົບຮົມ ໃຫ້ປະຊາຊົນບັນດາເຜົ່າ ມີຄວາມສາມັກຄີປອງດອງ, ມີນໍ້າໃຈຮັກຊາດ ແລະ ມີນໍ້າໃຈເສຍສະຫລະ ເພື່ອຜົນປະໂຫຍດສ່ວນລວມ, ດຸໝັ່ນຂະຫຍັນພຽນ, ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ ຕາມກົດໝາຍກໍານົດ.
5. ເພີ່ມທະວີການນໍາພາ, ສຶກສາອົບຮົມບົ່ມເພາະ ສອງກໍາລັງ ຢ່າງໃກ້ສິດ, ເຖິິງຖອງ, ຝຶກຝົນຫລໍ່ຫລອມໃຫ້ເປັນກໍາລັງທີ່ຈົງຮັກພັກດີ, ຮັບໃຊ້ປະຊາຊົນ, ຮັບໃຊ້ປະເທດຊາດ ດ້ວຍຄວາມບໍລິສຸດຜ່ອງໃສ, ມີຄວາມຮັບຜິດຊອບສູງຕໍ່ໜ້າທີ່ວຽກງານ; ການເຄື່ອນໄຫວປະຕິບັດໜ້າທີ່ວຽກງານ ຕ້ອງຢູ່ບົນຈິດໃຈຮັບໃຊ້ ປະເທດຊາດ ແລະ ປະຊາຊົນ.
6. ເພີ່ມທະວີການນໍາພາ-ຊີ້ນໍາອົງການປົກຄອງທ້ອງຖິ່ນແຕ່ລະຂັ້ນ ກໍຄື ປະຊາຊົນ ໃຫ້ມີຄວາມເຂັ້ມງວດ ໃນການປົກປັກຮັກສາປ່າໄມ້, ສະກັດກັ້ນການຕັດໄມ້ທໍາລາຍປ່າ ເຊິ່ງຈະສົ່ງຜົນກະທົບເຮັດໃຫ້ແມ່ນໍ້າ, ຫ້ວຍຮ່ອງ ເກີດການບົກແຫ້ງ, ສົ່ງຜົນກະທົບຕໍ່ຄວາມສົມດຸນຂອງລະບົບນິເວດ ແລະ ກະທົບຕໍ່ການຜະລິດ, ການດໍາລົງຊີວິດຂອງປະຊາຊົນ;
7. ສະເໜີໃຫ້ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ, ອົງການປົກຄອງທ້ອງຖິ່ນທຸກຂັ້ນຕິດຕາມ, ຊຸກຍູ້ຂະແໜງການທີ່ກ່ຽວຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດກະສິກໍາໃຫ້ເໝາະສົມ, ຄົ້ນຄວ້າກໍານົດທ່າແຮງບົ່ມຊ້ອນທາງດ້ານການຜະລິດກະສິກໍາຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເພື່ອສ້າງອາຊີບ ແລະ ລາຍຮັບອັນໝັ້ນຄົງໃຫ້ພໍ່ແມ່ປະຊາຊົນ.
8. ເອົາໃຈໃສ່ນໍາພາຊີ້ນໍາ ໃນການປົກປັກຮັກສາ, ພັດທະນາແຫລ່ງທ່ອງທ່ຽວໃຫ້ຍືນຍົງ ແລະ ພັດທະນາຄຸນຄ່າຂອງແຫລ່ງທ່ອງທ່ຽວ ໃຫ້ຄົງຢູ່ຍາວນານກັບປະເທດລາວເຮົາຕະຫລອດໄປ;
9. ເອົາໃຈໃສ່ ລົງເລິກຕິດຕາມ, ຊຸກຍູ້ ເພື່ອເຮັດໃຫ້ການຈັດຕັ້ງປະຕິບັດບັນດາຕົວຊີ້ວັດຕ່າງໆ ໄດ້ບັນລຸຕາມຄາດໝາຍນັບມື້ເພີ່ມຂຶ້ນ; ການພັດທະນາການສຶກສາຂອງຂະແໜງວິຊາສະເພາະດ້ານຕ່າງໆ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມ, ສ້າງວຽກເຮັດງານທໍາໃຫ້ແກ່ລູກຫລານ ທີ່ຮຽນຈົບວິຊາສະເພາະຂະແໜງຕ່າງໆ ໃຫ້ມີວຽກເຮັດງານທໍາ, ແກ້ໄຂການໄປອອກແຮງານຢູ່ຕົວເມືອງໃຫຍ່ ຫລື ຢູ່ປະເທດໃກ້ຄຽງ.
10. ເພີ່ມທະວີຄວາມເອົາໃຈໃສ່ວຽກງານການກໍ່ສ້າງຮາກຖານການເມືອງ, ລົງໃກ້ສິດຕິດແທດພໍ່ແມ່ປະຊາຊົນ, ຮັບຟັງຄໍາສະເໜີ, ຄວາມຂັດຂ້ອງ ໝອງໃຈຂອງປະຊາຊົນ ຢ່າງເປັນປົກກະຕິ; ສ້າງເງື່ອນໄຂໃຫ້ພໍ່ແມ່ປະຊາຊົນໄດ້ປະກອບຄໍາຄິດຄໍາເຫັນຕໍ່ການຄຸ້ມຄອງລັດ-ຄຸ້ມຄອງເສດຖະກິດ-ສັງຄົມ ເພື່ອເປັນຂໍ້ມູນໃນການປັບປຸງແກ້ໄຂ.
11. ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເປັນວຽກງານທີ່ມີຄວາມສໍາຄັນ ຈຶ່ງສະເໜີໃຫ້ບັນດາສະຫາຍ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີການນໍາພາ-ຊີ້ນໍາຈັດຕັ້ງປະຕິບັດ ແລະ ຖືເອົາວາລະແຫ່ງຊາດເປັນພາລະກິດທົ່ວປວງຊົນ
12. ທຸກພາກສ່ວນໃນສັງຄົມຈະຕ້ອງໄດ້ພ້ອມກັນເຂົ້າຮ່ວມໃນການ ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ບໍ່ປະໃຫ້ແຕ່ສອງກໍາລັງເປັນຜູ້ຈັດຕັ້ງປະຕິບັດ; ຖືເອົາການແກ້ໄຂບັນຫາຢາເສບຕິດ ຕິດພັນກັບວຽກງານພັດທະນາຊົນນະ ບົດ ແລະ ແກ້ໄຂຄວາມທຸກຍາກ, ການສົ່ງເສີມການຜະລິດ, ສ້າງວຽກເຮັດງານທໍາ, ການສ້າງລາຍໄດ້ແກ່ປະຊາຊົນ, ປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ.