ທາງເລືອກທີ່ຫນ້າສົນໃຈ! ສະເປີ ສົນໃຈເລັງ ເອັນຣິເກ້ ຄຸມແທນຫາກ ຄອນເຕ້ ລາທີມ

ທັອດແນມ ຮັອດສະເປີ ສະໂມສອນດັງໃນພຣີເມຍລີກ ອັງກິດ ກຳລັງຈັບຕາເບິ່ງ ຫລຸຍ ເອັນຣິເກ້ ຄູຝຶກຊາວສະເປນ ເຂົ້າມາແທນທີ່ ອັນໂຕນິໂອ ຄອນເຕ້ ເຊິ່ງມີແນວໂນ້ມທີ່ຈະອຳລາສະໂມສອນຫລັງຈົບລະດູການນີ້.

ຊ່ວງເວລາທີ່ຜ່ານມາ, ມີກະແສຂ່າວລະບຸວ່າ ຄອນເຕ້ ພ້ອມແລ້ວທີ່ຈະລາອອກຈາກຕຳແໜ່ງຫົວໜ້າຄູຝຶກ “ໄກ່ເດືອຍທອງ” ຫລັງສັນຍາໝົດໃນລະດູຮ້ອນນີ້. ເຖິງແມ່ນວ່າມີທາງເລືອກທີ່ຈະຂະຫຍາຍສັນຍາອອກໄປອີກ 1 ປີກໍ່ຕາມ.

ໃນຂະນະທີ່ ຜົນງານຂອງ ຄູຝຶກສອນຊາວອິຕາລີ ບໍ່ຄ່ອຍເຂົ້າຕາຂອງຄະນະບໍລິຫານຂອງ ສະເປີ. ໂດຍສະເພາະການຕົກຮອບ 16 ທີມສຸດທ້າຍໃນ ຢູຟາ ແຊ້ມປ້ຽນລີກ ເມື່ອອາທິດທີ່ຜ່ານມາ. ເຮັດໃຫ້ຕອນນີ້ພວກເຂົາເລີ່ມຊອກຫາທາງເລືອກໃໝ່ສໍາລັບລະດູການຕໍ່ໄປ.