ປີຜ່ານມາ ແຂວງວຽງຈັນ ໄດ້ຮັບແຈ້ງຄວາມລົດເສຍ 57 ຄັນ ແລະ ມີຜູ້ເສຍຊີວິດຈາກອຸບັດຕິເຫດ 33 ຄົນ
ທ່ານ ພັທ ກົງຈັນ ສີວິໄລວົງ ຮອງຫົວໜ້າພະແນກຕໍາຫລວດຈະລາຈອນ ປກສ ແຂວງວຽງຈັນ ລາຍງານໃນກອງປະຊຸມສະຫລຸບວຽກງານວິຊາສະເພາະຈະລາຈອນປະຈຳປີ 2022 ແລະ ວາງທິດທາງແຜນການປີ 2023 ໃນວັນທີ 13 ມີນາ 2023 ວ່າ: ໃນ 1 ປີຜ່ານມາທົ່ວແຂວງວຽງຈັນ ມີອຸບັດຕິເຫດເກີດຂຶ້ນ ທັງໝົດ 531 ລາຍ, ໄດ້ຮັບບາດເຈັບ 849 ຄົນ, ຍິງ 216 ຄົນ, ບາດເຈັບເລັກນ້ອຍ 399 ຄົນ, ຍິງ 108 ຄົນ, ບາດເຈັບສົມຄວນ 323 ຄົນ, ຍິງ 86 ຄົນ, ບາດເຈັບສາຫັດ 77 ຄົນ, ຍິງ 17 ຄົນ, ເສຍຊີວິດ 33 ຄົນ, ຍິງ 7 ຄົນ, ມີພາຫະນາເປ່ເພທັງໝົດ 952 ຄັນ, ເປ່ເພເລັກນ້ອຍ 525 ຄັນ, ເປ່ເພສົມຄວນ 414 ຄັນ, ເປ່ເພໃຊ້ການບໍ່ໄດ້ 13 ຄັນ ປະເມີນມູນຄ່າເສຍຫາຍທັງໝົດ 15.858.000.000 ກີບ, ຄະດີທີ່ເຈົ້າໜ້າທີ່ໄດ້ດຳເນີນທັງໝົດ 403 ລາຍ, ແຂວງດຳເນີນ 45 ລາຍ, ເມືອງດຳເນີນ 358 ລາຍ, ແກ້ໄຂຂັ້ນພື້ນຖານ 128 ລາຍ, ສົ່ງໄອຍະການປະຊາຊົນແຂວງ 23 ລາຍ, ຊັດມ້ຽນຂັ້ນເຈົ້າໜ້າທີ່ 21 ລາຍ.
ພ້ອມນີ້, ກໍໄດ້ຫັນເອົາກຳລັງຕຳຫລວດຈະລາຈອນ ລົງປະຈຳການຢູ່ປ້ອມຈະລາຈອນຄອຍເຫດ ຈຳນວນ 4 ຈຸດ ຄື: ເສັ້ນທາງເລກທີ 10 ຢູ່ບ້ານດົງ ເມືອງທຸລະຄົມ, ເສັ້ນທາງເລກທີ 11 ຢູ່ບ້ານນ້ຳຮີ້ ເມືອງໝື່ນ ແລະ ເສັ້ນທາງເລກທີ 13 ເໜືອ ສອງຈຸດຢູ່ບ້ານໂພນໄຊ ເມືອງໂພນໂຮງ, ແລະ ຢູ່ບ້ານໜອງຄຳ ເມືອງກາສີ ເຮັດໜ້າທີ່ປະຈຳການຕະຫລອດ 24 ຊົ່ວໂມງ, ຮັບແຈ້ງຄວາມລົດເສຍ 57 ຄັນ, ລົງປ້ອງກັນສະຖານທີ່ເກີດອຸປະຕິເຫດ 84 ຄັ້ງ ແລະ ຊັນນະສູດສະຖານທີ່ເກີດເຫດ 33 ຄັ້ງ, ກວດກາພາຫະນະທັງໝົດ 892 ຄັ້ງ, ພົບເຫັນຜູ້ລະເມີດທັງໝົດ 6.184 ຄົນ, ຍິງ 1.527 ຄົນ, ສຶກສາອົບຮົມກ່າວເຕືອນ 3.805 ຄົນ, ຍິງ 953 ຄົນ, ຂຽນໃບກ່າວເຕືອນ 1.686 ໃບ, ຂຽນໃບຮັບສາລະພາບກັກເອກະສານທັງໝົດ 118 ໃບ, ກັກລົດໄດ້ທັງໝົດ 25 ຄັນ, ຂຽນບິນປັບໄໝ 427 ໃບ, ປະສານສົມທົບກັບພາກສ່ວນທີ່ກ່ຽວຂ້ອງ ຕິດຕາມກວດກາລົດກຸ່ມເປົ້າໝາຍຄ້າຂາຍຢາເສບຕິດ 4 ຄັ້ງ, ກັກຢາເສບຕິດໄດ້ທັງໝົດ 3.398.578 ເມັດ.
ສຶກສາອົບຮົມນັກຂັບຂີ່ດັດແປງສະພາບເຕັກນິກລົດ 28 ຄັ້ງ, ລົງຈັດສັນຄວາມເປັນລະບຽບຮຽບຮ້ອຍຂອງການສັນຈອນ ໄດ້ 9 ຄັ້ງ, ປ້ອງກັນເປີດທາງອຳນວຍຄວາມສະດວກໃຫ້ແກ່ຜູ້ນຳພັກ-ລັດ ຈຳນວນ 12 ຄັ້ງ, ໄດ້ເອົາໃຈໃສ່ໃນການຄຸ້ມຄອງປ້າຍ, ຕິດປ້າຍໃຫ້ຜູ້ມາໃຊ້ບໍລິການມີຄວາມສະດວກວ່ອງໄວ ແລະ ຖືກຕ້ອງຕາມລະບຽບຫລັກການ ວິຊາສະເພາະຄື: ຕິດປ້າຍລົດທັງໝົດ 4.966 ຄັນ, ເຂົ້າຮ່ວມເປັນຄະນະສອບເສັງໃບຂັບຂີ່ທັງໝົດ 6 ຄັ້ງ, ມີຜູ້ສອບເສັງທັງໝົດ 1.338 ຄົນ, ຍິງ 318 ຄົນ.
