ແມ່ຍິງລາວກັບການສ້າງບົດບາດຊື່ສຽງໃຫ້ຕົນເອງ ແລະ ປະເທດຊາດ

ໂດຍ: ທິດກໍ່າ

ເຖິງແມ່ນວ່າ ວັນແມ່ຍິງສາກົນ ວັນທີ 8 ມີນາ 2023 ອັນເປັນມື້ຄົບຮອບ 113 ປີ ຈະຜ່ານພົ້ນໄປແລ້ວກໍຕາມ ແຕ່ໃນຄວາມຊົງຈໍາຂອງແມ່ຍິງລາວ ກໍຄືແມ່ຍິງໃນທົ່ວໂລກຍັງຄົງສະຖິດໝັ້ນໃນອຸດົມການ ແລະ ຄວາມໝາຍອັນຍິ່ງໃຫຍ່ຕະຫລອດໄປ. ສະເພາະແມ່ຍິງລາວເມື່ອເຖິງວັນທີ 8 ມີນາຂອງທຸກໆປີ ກໍໄດ້ມີກິດຈະກໍາຂອງຕົນເພື່ອສະຫລອງວັນດັ່ງກ່າວຢ່າງມີຄວາມໝາຍ ແລະ ເບີກບານມ່ວນຊື່ນ ເຊິ່ງໜຶ່ງໃນບັນດາກິດຈະກໍາຕ່າງໆທີ່ຂາດບໍ່ໄດ້ກໍຄືໄດ້ພັກລັດຖະການ ຫລືວ່າ ເວົ້າອີກຢ່າງໜຶ່ງກໍແມ່ນຢຸດການທໍາງານຢ່າງເປັນທາງການໃນທົ່ວປະເທດ ເພາະວັນແມ່ຍິງສາກົນເປັນວັນພັກວັນໜຶ່ງທີ່ໄດ້ກໍານົດຢູ່ໃນດໍາລັດເລກທີ 366/ລບ, ລົງວັນທີ 15 ທັນວາ 2017 ໃນຈໍານວນ 5 ວັນພັກທາງລັດຖະການຄື: ວັນພັກປີໃໝ່ສາກົນ 1 ວັນ, ວັນແມ່ຍິງສາກົນ 1 ວັນ, ວັນພັກປີໃໝ່ລາວ 3 ວັນ ໄດ້ແກ່ສັງຂານລ່ວງ, ສັງຂານເນົາ ແລະ ສັງຂານຂຶ້ນ, ວັນກໍາມະກອນສາກົນ 1 ວັນ ແລະ ວັນສ້າງຕັ້ງ ສປປ ລາວ 2 ທັນວາ ຈໍານວນ 1 ວັນ. ນອກຈາກນັ້ນ ກໍມີກິດຈະກໍາຕ່າງໆເພື່ອເປັນການລະນຶກຕໍ່ວັນແມ່ຍິງສາກົນ ເປັນຕົ້ນຈັດປາຖະກະຖາ ນັບທັງການໄປທັດສະນະສຶກສາ, ການທ່ອງທ່ຽວພົບປະສັງສັນຢ່າງມີຄວາມໝາຍ ແລະ ເບີກບານມ່ວນຊື່ນ.

ສໍາລັບຢູ່ ສປປ ລາວ ຂອງພວກເຮົາ ວັນແມ່ຍິງສາກົນປີນີ້ເຫັນວ່າຍິ່ງມີຄວາມໝາຍເປັນພິເສດ ເພາະຍິ່ງມີອາຍຸຍາວນານໄປເທົ່າໃດ ແມ່ຍິງລາວກໍຍິ່ງມີການພັດທະນາ, ມີຜົນງານໂດດເດັ່ນ ແລະ ເຕີບໃຫຍ່ຂະຫຍາຍຕົວໄປເລື້ອຍໆ. ຍົກຕົວຢ່າງເມື່ອບໍ່ດົນມານີ້ ໄດ້ມີແມ່ຍິງລາວຊື່ ປາເຢັງຊາລໍ່ ໄດ້ໄປຮ່ວມແຂ່ງຂັນນາງງາມຈັກກະວານ ສາມາດເຂົ້າຮອບ 16 ຄົນ ອັນເປັນປະຫວັດການ ແລະ ປະຫວັດສາດຂອງອົງການສະຫະພັນແມ່ຍິງລາວ. ວົງການນາງງາມລາວກໍຄືກຽດສັກສີຂອງຊາດລາວຄົນລາວ. ນອກຈາກທີ່ກ່າວມານີ້ແລ້ວ ຕະຫລອດໄລຍະ 47 ປີແຫ່ງພາລະກິດສ້າງສາພັດທະນາປະເທດຊາດ ແມ່ຍິງລາວບັນດາເຜົ່າກໍໄດ້ມີຜົນງານຢ່າງຫລວງຫລາຍຕໍ່ປະເທດຊາດ.

ປະເທດຊາດມີການພັດທະນາຈະເລີນຮຸ່ງເຮືອງຄືດັ່ງທຸກວັນນີ້ ຍ້ອນແມ່ຍິງລາວໄດ້ຢຶດຖືບົດບາດໜ້າທີ່ຂອງຕົນເພື່ອພາລະກິດຂອງຊາດ ເຊິ່ງສະແດງອອກໃນຄວາມຮັບຜິດຊອບຕໍ່ຕົນເອງ ແລະ ໜ້າທີ່ການງານ ເປັນຕົ້ນເປັນການນໍາໃນຂົງເຂດບໍລິຫານບ້ານເມືອງເຊັ່ນ: ເປັນລັດຖະມົນຕີ, ຮອງລັດຖະມົນຕີ, ຫົວໜ້າກົມ, ຮອງກົມ, ເປັນທະຫານ, ຕໍາຫລວດ, ນາຍຮ້ອຍ, ນາຍພັນ, ເຈົ້າແຂວງ, ເຈົ້າເມືອງ. ໃນຂົງເຂດທຸລະກິດກໍເປັນນັກທຸລະກິດ, ເປັນນັກວິຊາການ, ເປັນກໍາມະກອນໂຮງຈັກໂຮງງານ, ເປັນກະສິກອນປູກຝັງລ້ຽງສັດ, ເປັນຊາວຄ້າຂາຍທີ່ເກັ່ງ ແລະ ຊໍານິຊໍານານ.

ຈາກຖານະບົດບາດໜ້າທີ່ທີ່ໄດ້ກ່າວມານີ້ ແມ່ຍິງລາວຈໍານວນບໍ່ໜ້ອຍຈຶ່ງໄດ້ກາຍເປັນວິລະຊົນ, ນັກຮົບແຂ່ງຂັນ, ເປັນນັກພັດທະນາດີເດັ່ນຂອງຊາດ ບໍ່ວ່າໃນສະໄໝສົງຄາມ ກໍຄືໄລຍະສ້າງສາພັດທະນາປະເທດຊາດ ສົມກັບວ່າແມ່ຍິງລາວໄດ້ສ້າງບົດບາດຊື່ສຽງມາໃຫ້ຕົນເອງ ແລະ ປະເທດຊາດ.