ທູດໄທ ປະຈໍາລາວ ເຂົ້າຢ້ຽມຂ່ຳນັບຮອງນາຍົກລັດຖະມົນຕີ

ທ່ານ ພົນເອກ ວິໄລ ຫລ້າຄໍາຟອງ ໄດ້ສະແດງຄວາມຍິນດີຕ້ອນຮັບ, ພ້ອມທັງຕີລາຄາສູງ ແລະ ຊົມເຊີຍຕໍ່ທ່ານ ນາງ ມໍລະກົດ ສີສະຫວັດດີ ທີ່ໄດ້ຮັບການແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາ ສປປ ລາວ ຄົນໃໝ່ ເພື່ອສືບຕໍ່ປະກອບ ສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດໃຫ້ແໜ້ນແຟ້ນ ແລະ ເພີ່ມທະວີຂຶ້ນໃນທຸກລະດັບ ໂດຍສະເພາະແມ່ນການເຫັນດີຮ່ວມກັນໃນການຮ່ວມມື, ແລກປ່ຽນ ຂໍ້ມູນເຊິ່ງກັນ ແລະ ກັນ ໃນການສະກັດກັ້ນ ແລະ ຕ້ານບັນຫາຢາເສບຕິດ, ບັນຫາການຄ້າມະນຸດ, ບັນຫາການລັກລອບຂ້າມຊາຍແດນແບບຜິດກົດໝາຍ ແລະ ການຄ້າຂາຍເຖື່ອນຂ້າມຊາຍແດນລະຫວ່າງສອງປະເທດ, ແນໃສ່ຮັບປະກັນໃຫ້ການທ່ອງທ່ຽວ, ການໄປ-ມາ ຫາສູ່ກັນເຊິ່ງກັນ ແລະ ກັນ, ການທໍາມາຫາກິນຂອງປະຊາຊົນທັງສອງປະເທດ ໃຫ້ມີຄວາມສະດວກສະບາຍ ແລະ ຮັບປະກັນໄດ້ຄວາມສະຫງົບປອດໄພຍິ່ງຂຶ້ນ.

ທ່ານ ນາງ ມໍລະກົດ ສີສະຫວັດດີ ໄດ້ສະແດງຄວາມຂອບໃຈຕໍ່ທ່ານ ພົນເອກ ວິໄລ ຫລ້າຄໍາຟອງ ພ້ອມຄະນະ ທີ່ໃຫ້ການຕ້ອນຮັບຢ່າງອົບອຸ່ນໃນການເຂົ້າຢຽມຂ່ຳນັບໃນຄັ້ງນີ້ ແລະ ພ້ອມໃຫ້ການພົວພັນຮ່ວມມືຢ່າງຮອບດ້ານ ແນໃສ່ຮັບປະກັນໃນການປະຕິບັດວຽກງານດ້ານການທູດມີຄວາມຮັດແໜ້ນ ແລະ ໄດ້ຮັບຜົນສຳເລັດຫລາຍຂຶ້ນກວ່າທີ່ຜ່ານມາ.

ຂໍ້ມູນ: ປກສ