ຮອງລັດຖະມົນຕີ ກະຊວງປ້ອງກັນປະເທດ ລົງຕິດຕາມ ກວດກາ ການຈັດຕັ້ງປະຕິບັດ 2 ວາລະແຫ່ງຊາດ ຢູ່ກອງພົນທີ 2

ວັນທີ 13 ມີນາ 2023 ນີ້, ສະຫາຍພົນຕີ ຈັນທອງ ສອນຕະອາດ ກໍາມະການຄະນະປະຈໍາພັກກະຊວງ ຮອງລັດຖະມົນຕີກະຊວງປ້ອງກັນປະເທດ ໄດ້ລົງຕິດຕາມ ກວດກາ ແລະ ຊຸກຍູ້ການຈັດຕັ້ງປະຕິບັດ 2 ວາລະແຫ່ງຊາດ ຢູ່ກອງພົນທີ 2, ມີສະຫາຍພົນຈັດຕະວາ ບຸນຍົງ ດາດົງໄຊ ຮອງປະທານສານປະຊາຊົນ ປະທານສານທະຫານຂັ້ນສູງ ພ້ອມດ້ວຍຄະນະ, ຄະນະພັກ-ຄະນະບັນຊາກອງພົນ, ຄະນະຫ້ອງ, ພະແນກການ, ຄະນະພັກ-ຄະນະບັນຊາກອງພັນໃຫຍ່, ກອງພັນນ້ອຍ, ກອງຮ້ອຍທີ່ຂຶ້ນກັບ ຕະຫລອດຮອດພະນັກງານຫລັກແຫລ່ງເຂົ້າຮ່ວມ.

ໃນໂອກາດດັ່ງກ່າວ ສະຫາຍພົນຈັດຕະວາ ວຽງແກ້ວ ສີສຸລາດ ຫົວໜ້າການເມືອງກອງພົນທີ 2 ໄດ້ຂຶ້ນລາຍງານສະພາບໂດຍຫຍໍ້ ໃນການຈັດຕັ້ງປະຕິບັດ 2 ວາລະແຫ່ງຊາດ ໃນໄລຍະທີ່ຜ່ານມາ. ຈາກນັ້ນ, ສະຫາຍພົນຕີ ຈັນທອງ ສອນຕະອາດ ກໍາມະການຄະນະປະຈໍາພັກກະຊວງ ຮອງລັດຖະມົນຕີກະຊວງປ້ອງກັນປະເທດ ຄະນະຮັບຜິດຊອບການລົງຕິດຕາມ ກວດກາ ແລະ ຊຸກຍູ້ການຈັດຕັ້ງປະຕິບັດ 2 ວາລະແຫ່ງຊາດ ກໍໄດ້ມີຄໍາເຫັນຊີ້ນໍາ ເຊິ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ-ຄະນະບັນຊາແຕ່ລະຂັ້ນ ພ້ອມກັນເສີມຂະຫຍາຍມູນເຊື້ອອັນດີງາມຂອງກອງທັບ ແລະ ຂອງກົມກອງ, ພ້ອມກັນປະກອບສ່ວນອັນຕັ້ງໜ້າເຂົ້າໃນຜົນງານລວມຂອງຊາດ, ຂອງກອງທັບ ແລະ ສ້າງກົມກອງໃຫ້ໜັກແໜ້ນເຂັ້ມແຂງ ໂດຍສະເພາະແມ່ນການຈັດຕັ້ງປະຕິບັດ 2 ວາລະແຫ່ງຊາດ ໃນການແກ້ໄຂຄວາມຫຍຸ້ງຍາກດ້ານເສດຖະກິດການເງິນ ແລະ ສະກັດກັ້ນປາກົດການຫຍໍ້ທໍ້ບັນຫາຢາເສບຕິດ ພ້ອມທັງຮຽກຮ້ອງ ໃຫ້ຄະນະພັກ-ຄະນະບັນຊາ ແຕ່ລະຂັ້ນເອົາໃຈໃສ່ໃນການສຶກສາອົບຮົມການເມືອງແນວຄິດ ຂອງພະນັກງານ-ນັກຮົບ ໃຫ້ມີແນວຄິດການເມືອງໜັກແໜ້ນ ມີຄຸນສົມບັດສິນທໍາປະຕິວັດ, ຕັ້ງໜ້າຄົ້ນຄ້ວາຮໍ່າຮຽນ ກໍາແໜ້ນແນວທາງປ່ຽນແປງໃໝ່ຂອງພັກ, ກົດໝາຍຂອງລັດ, ເຊື່ອມຊຶມ ແລະ ກໍາແໜ້ນທິດທາງວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບ ດ້ານ; ເສີມຂະຫຍາຍມູນເຊື້ອ ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ດຸໝັ່ນປະຢັດມັດທະຍັດ, ຍູ້ແຮງການເພີ່ມພູນປູກຝັງ-ລ້ຽງສັດ, ຍົກສູງລະດັບຊີວິດການເປັນຢູ່ ຂອງກົມກອງໃຫ້ນັບມື້ດີຂຶ້ນ, ຫັນເອົາເນື້ອໃນຈິດໃຈ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດໃຫ້ເປັນອັນລະອຽດ ຕິດພັນກັບການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ແລະ ກົມກອງ 3 ປອດ, ສ້າງກົມກອງ-ນັກຮົບວັດທະນະທຳ, ສາມາດຕ້ານ ແລະ ສະກັດກັ້ນບັນດາປະກົດການຫຍໍ້ທໍ້ຕ່າງໆໃນຖັນແຖວກອງທັບໃຫ້ໝົດໄປ.

ພາບຂ່າວ: ຄໍາຮັກ ໄຊວັນທອນ