ນາຍົກລັດຖະມົນຕີຈີນໃຫ້ຄຳໝັ້ນສ້າງວຽກເຮັດງານທໍາ ປັບປຸງສະພາບແວດລ້ອມທຸລະກິດ
ນາຍົກລັດຖະມົນຕີຈີນກ່າວເຖິງການເລັ່ງປະຕິຮູບເສດຖະກິດ ເພື່ອເພີ່ມການຈ້າງວຽກ ແລະ ການສ້າງສະພາບແວດລ້ອມທາງທຸລະກິດ ໃຫ້ມີຄວາມເປັນມິດຕໍ່ນັກລົງທຶນ.
ວັນທີ 13 ມີນາ, ທ່ານ ຫລີ່ສຽງ ນາຍົກລັດຖະມົນຕີ ຖະແຫລງຫລັງສໍາເລັດກອງປະຊຸມສະພາປະຊາຊົນແຫ່ງຊາດ (NPC) ຊຸດທີ 14 ໃນນະຄອນຫລວງປັກກິ່ງ ມີເນື້ອໃນຕອນໜຶ່ງກ່ຽວກັບການບໍລິຫານນະໂຍບາຍເສດຖະກິດຂອງຈີນ ເຊິ່ງມີຂະໜາດໃຫຍ່ເປັນອັນດັບສອງຂອງໂລກ ແລະ ອັນດັບໜຶ່ງຂອງອາຊີວ່າ: ການພັດທະນາເສດຖະກິດຄືພື້ນຖານຂອງການສ້າງວຽກ.
ຂະນະດຽວກັນ, ທ່ານ ຫລີ່ສຽງ ເຊິ່ງຫາກໍຮັບຕໍາແໜ່ງໃນວັນທີ 11 ມີນາຜ່ານມາ ໃຫ້ຄໍາໝັ້ນວ່າ: ສະພາບແວດລ້ອມທາງການລົງທຶນຈະໄດ້ຮັບການປັບປຸງ ແລະ ບໍລິສັດທຸກແຫ່ງ “ຈະໄດ້ຮັບການເບິ່ງແຍງຢ່າງເທົ່າທຽມຈາກພາກລັດ” ບໍ່ວ່າຈະເປັນຜູ້ປະກອບກິດຈະການດ້ານໃດກໍຕາມ.
ກ່ຽວກັບການທີ່ລັດຖະບານປັກກິ່ງກໍານົດເປົ້າໝາຍ ການຂະຫຍາຍຕົວຂອງລວມຍອດຜະລິດຕະພັນພາຍໃນ (GDP) ໄວ້ປະມານ 5% ໃນປີນີ້ ເຊິ່ງຕໍ່າກວ່າທີ່ມີການຄາດຄະເນໄວ້ກ່ອນໜ້ານັ້ນ. ຂະນະທີ່ GDP ຂອງຈີນຂະຫຍາຍຕົວພຽງ 3% ໃນປີຜ່ານມາ ເຊິ່ງເປັນລະດັບຕໍ່າທີ່ສຸດນັບແຕ່ປີ 1976. ນາຍົກລັດຖະມົນຕີຄົນໃໝ່ຂອງຈີນຍອມຮັບວ່າ: “ການບັນລຸເປົ້າໝາຍດັ່ງກ່າວບໍ່ແມ່ນເລື່ອງງ່າຍ” ເນື່ອງຈາກຈີນຕ້ອງຜະເຊີນ “ຄວາມທ້າທາຍຫລາຍປະການ” ໃນປີນີ້.
ສ່ວນປະທານປະເທດ ສີຈິ້ນຜິງ ຜູ້ນໍາຈີນ ກ່າວໃນຕອນໜຶ່ງລະຫວ່າງການຖະແຫລງປິດກອງປະຊຸມ NPC ວ່າ: “ຄວາມໝັ້ນຄົງຄືຮາກຖານຂອງການພັດທະນາ” ແລະ ກ່າວເຖິງຄວາມຈໍາເປັນທີ່ກອງທັບປົດປ່ອຍປະຊາຊົນ (PLA) ຕ້ອງເລັ່ງພັດທະນາການດໍາເນີນງານທຸກຂະແໜງທີ່ກ່ຽວຂ້ອງໃຫ້ມີຄວາມທັນສະໄໝ ເພື່ອການເປັນ “ກຳແພງເຫລັກ” ໃນການຮັກສາຄວາມໝັ້ນຄົງ ແລະ ຄວາມປອດໄພຂອງປະເທດ.
