ປກສ ແຂວງຫົວພັນ ປະກາດຍົກຂັ້ນເງິນເດືອນໃຫ້ຜູ້ທີ່ມີຜົນງານ ແລະ ເລື່ອນຊັ້ນໃຫ້ນາຍຕຳຫລວດຫລາຍສະຫາຍ

ເພື່ອເປັນການປະຕິບັດນະໂຍບາຍຂອງພັກ-ລັດທີ່ມີຕໍ່ນາຍຕຳຫລວດຜູ້ທີ່ມີຜົນງານໃນການເຮັດວຽກງານມີຜົນສຳເລັດ ແລະ ຄົບມາດຖານເງື່ອນໄຂໃນການເລື່ອນຊັ້ນທີ່ກຳນົດໄວ້ ໃຫ້ແກ່ນາຍຕຳຫລວດກອງບັນຊາການ ປກສ ແຂວງຫົວພັນ, ໃນວັນທີ 9 ມີນາ 2023 ປກສ ແຂວງຫົວພັນໄດ້ຈັດພິທີປະກາດເລື່ອນຊັ້ນໃຫ້ນາຍຕຳຫລວດຈາກເລື່ອນ ພັຕ ເປັນຊັ້ນ ພັທ 15 ສະຫາຍ, ເລື່ອນ ຮອ ເປັນຊັ້ນ ພັຕ 47 ສະຫາຍ ແລະ ເລື່ອນຊັ້ນ ຮທ ເປັນຊັ້ນ ຮອ ມີ 83 ສະຫາຍ ໂດຍການປະດັບຊັ້ນຂອງ ພັອ ເພັດສອນ ອິນສຸພັນ ຫົວໜ້າກອງບັນຊາການ ປກສ ແຂວງຫົວພັນ.

ນອກນັ້ນ, ໄດ້ຜ່ານຂໍ້ຕົກລົງຕ່າງໆຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍການຍົກຍ້າຍ ແລະ ແຕ່ງຕັ້ງຫົວໜ້າຄຸ້ມຄອງດ່ານສາກົນນ້ຳໂສຍ ສະບັບເລກທີ 532/ປກສ ລົງວັນທີ 6 ມີນາ 2023 ໂດຍ ຍົກຍ້າຍ ພັທ ວັນນະທອນ ພົມມີໄຊ ຜູ້ເກົ່າມາເປັນຮອງຫ້ອງສັນຕິບານ ປກສ ແຂວງ ແລະ ແຕ່ງຕັ້ງ ພັທ ກິ່ງແກ້ວ ຄຳມີໄຊ ຮອງຫ້ອງສັນຕິບານ ໄປເປັນຫົວໜ້າຄຸ້ມຄອງດ່ານສາກົນຜູ້ໃໝ່;

ຜ່ານຂໍ້ຕົກລົງຍົກຂັ້ນເງິນເດືອນໃຫ້ຜູ້ທີ່ມີຜົນງານ ແຕ່ບໍ່ມີເງື່ອນໄຂເລື່ອນຊັ້ນຕາມກຳນົດເປັນ ພັອ 5 ສະຫາຍຄື: ພັທ ຄຳເຫລັກ ຈັນສຸລິ ຫົວໜ້າຫ້ອງການເມືອງ, ພັທ ທອນມີ ແກ້ວຈິນດາ ຫົວໜ້າກອງບັນຊາການ ປກສ ເມືອງວຽງໄຊ, ພັທ ວົງພັນ ແກ້ວເພັງຄຳ ຫົວໜ້າກອງບັນຊາການ ປກສ ເມືອງຊຳເໜືອ, ພັທ ຄຳຫລ້າ ສຸດທິດາ ຫົວໜ້າກອງບັນຊາການ ປກສ ເມືອງຊ່ອນ ແລະ ພັທ ເພັດແສງ ແພງມີໄຊ ຫົວໜ້າຫ້ອງພະລາທິການ ປກສ ແຂວງຫົວພັນ.