ຄະນະການນໍາ ແຂວງຄໍາມ່ວນ ເຄື່ອນໄຫວຊຸກຍູ້ການພັດທະນາພື້ນຖານໂຄງລ່າງຢູ່ 3 ເມືອງຂອງແຂວງ

ວັນທີ 11 ມີນາ 2023 ຄະນະການນໍາແຂວງຄໍາມ່ວນ ເຊິ່ງນໍາໂດຍ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ລົງເຄື່ອນໄຫວຕິດຕາມກວດກາສະພາບການພັດທະນາພື້ນຖານໂຄງລ່າງ ຢູ່ທ້ອງຖິ່ນຊົນນະບົດ ຂອງບັນດາເມືອງພາຍໃນແຂວງ ຄື:

• ໂຄງການກໍ່ສ້າງສ້ອມແປງເສັ້ນທາງ ແລະ ຂົວ ແຕ່ເຂດທາງແຍກຂອງບ້ານແສນພັນ ເມືອງ ບົວລະພາ ຫາ ຫ້ວຍໂຈນ ເມືອງຍົມມະລາດ ທີ່ມີ ຄວາມຍາວ 17,5 ກິໂລແມັດ, ກວ້າງ 5 ແມັດ, ໃນນັ້ນມີຂົວ ສອງແຫ່ງ ຄື: ຂົວ ຫ້ວຍຫວ້າ ແລະ ຂົວຫ້ວຍມ້າວົນ ພ້ອມທັງຕິດຕາມໂຄງການກໍ່ສ້າງເສັ້ນທາງ ແຕ່ ບ້ານກະຈາມໃຫຍ່ ຫາ ເຂດຈັດສັນ ບ້ານ ກະຈາມໃໝ່, ມີລວງຍາວ 4,14 ກິໂລແມັດ, ກວ້າງ 5 ແມັດ, ລວມມູນຄ່າທັງສອງໂຄງການ ປະມານ 736 ລ້ານກີບ ເຊິ່ງໄດ້ຈັດຕັ້ງປະຕິບັດເລີ່ມແຕ່ເດືອນ ຕຸລາ 2022 ເປັນຕົ້ນມາ ສຳເລັດແລ້ວ 93%, ຄາດວ່າຈະໃຫ້ສຳເລັດການກໍ່ສ້າງໃນທ້າຍເດືອນ ມີນາ 2023 ນີ້.
• ໂຄງການຕິດຕັ້ງກໍ່ສ້າງລະບົບຫົວງານຊົນລະປະທານ ບ້ານກະຈາມໃຫຍ່ ແລະ ຈຸດວາງຕາຂ່າຍໄຟຟ້າ ເຂົ້າສູ່ ບ້ານຈັດສັນກະຈາມ (ໃໝ່), ບ້ານກະຈາມໃຫຍ່ມີທັງໝົດ 134 ຫຼັງຄາເຮືອນ, 147 ຄອບຄົວ, ພົນລະເມືອງ 629 ຄົນ, ເນື້ອທີທໍາການຜະລິດນາປີ 187 ເຮັກຕາ ແລະ ນາແຊງ 70 ເຮັກຕາ ເຊິ່ງເປົ້າໝາຍໃນການພັດທະນາພື້ນຖານໂຄງລ່າງກໍ່ເພື່ອແນໃສ່ສ້າງເງື່ອນໄຂອໍານວຍຄວາມສະດວກ ໃຫ້ແກ່ການດໍາລົງຊີວິດ ຂອງຊາຊົນ ໃນທ້ອງຖິ່ນດັ່ງກ່າວໄດ້ຮັບການພັດທະນານັບມື້ນັບດີຂຶ້ນ.
• ໂຄງການຂະຫຍາຍລະບົບຕາໜ່າງເສັ້ນທາງຄົມມະນາຄົມເຂົ້າສູ່ບ້ານໂພນເຫຼັກ ເມືອງ ມະຫາໄຊ, ພ້ອມທັງຢ້ຽມຊົມຂອບເຂດທີ່ຕັ້ງຂອງ ບ້ານ, ນອກນັ້ນ, ຍັງໄດ້ກວດກາ ຈຸດເປົ້າໝາຍທີ່ຈະກໍ່ສ້າງແລວຕາຂ່າຍໄຟຟ້າ ເຂົ້າຫາ ບ້ານ ສອກບໍ ແລະ ເຂດທີ່ຈະຈັດສັນ ຂອງ ບ້ານ ແກ້ງແປ ເມືອງ ເຊບັ້ງໄຟ ອີກດ້ວຍ.