ກຽມສ້າງຂົວຂ້າມທາງ ເຂດໂຮງຮຽນ ມສ ລາວ-ຫວຽດນາມ ກໍານົດ 4 ເດືອນ ເພື່ອແກ້ໄຂບັນຫາການສັນຈອນຕິດຄັດແອອັດ

ພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນໄດ້ອອກແຈ້ງການ ສະບັບເລກທີ 1972/ຍທຂ.ນວ ລົງວັນທີ 7 ມີນາ 2023 ວ່າ: ເນື່ອງຈາກວ່າສະພາບການສັນຈອນຕົວຈິງເສັ້ນທາງຖະໜົນ ໄກສອນ ພົມວິຫານ ແມ່ນໜາແໜ້ນ ແລະ ສັບສົນ ເປັນຕົ້ນແມ່ນໂມງເຂົ້າການ ແລະ ເລີກການ ມີລົດມາຈອດແຄມທາງເພື່ອຮັບສົ່ງນັກຮຽນ ມີນັກຮຽນຍ່າງຂ້າມທາງ ເພື່ອເປັນການຊ່ວຍຫລຸດຜ່ອນ ແລະ ແກ້ໄຂການສັນຈອນແອອັດ, ແນໃສ່ເຮັດໃຫ້ການສັນຈອນໄປມາ ຂອງພາຫະນະມີຄວາມສະດວກວ່ອງໄວ ແລະ ໃຫ້ມີຄວາມປອດໄພ. ດັ່ງນັ້ນ, ນັບແຕ່ວັນທີ 8 ມີນາ 2023 ຈະໄດ້ເລີ່ມລົງມືກໍ່ສ້າງຂົວຄົນຍ່າງຂ້າມທາງຢູ່ຖະໜົນໄກສອນ ພົມວິຫານ (ຫລັກ 5 ຕໍ່ໜ້າໂຮງຮຽນ ມັດທະຍົມສົມບູນ ລາວ-ຫວຽດນາມ) ເປັນຕົ້ນໄປ ມີກໍານົດ 4 ເດືອນ ໃນນັ້ນຈະໄດ້ອ້ອມຮົ້ວບໍລິເວນຕີນເສົາ 2 ເບື້ອງ ທີ່ມີການກໍ່ສ້າງເປັນໄລຍະເວລາ 4 ເດືອນ.

ພ້ອມນີ້ ກໍຈະໄດ້ອ້ອມຝາກັ້ນດ້ວຍອາລູຊິງນໍ້າໜຶ່ງເວລາປະກອບຂ້າງຂົວ ເປັນໄລຍະເວລາ 10 ວັນ ແມ່ນສໍາເລັດບໍ່ພຽງເທົ່ານີ້ຍັງຈະໄດ້ຕັນດອນກາງທາງບ່ອນລົດລ້ຽວກັບເປັນການຊົ່ວຄາວໃນໄລຍະເວລາມີການກໍ່ສ້າງຕື່ມອີກ. ສະນັ້ນຂໍໃຫ້ນັກຂັບຂີ່ທຸກຄົນຕ້ອງໄດ້ປະຕິບັດຕາມລະບຽບ ແລະ ປະຕິບັດຕາມການລະບາຍລົດຂອງເຈົ້າໜ້າທີ່ຕາມຈຸດຕ່າງໆ.

ຊ່ວງເວລາມີການກໍ່ສ້າງປະເພດລົດຂົນສົ່ງສິນຄ້າ ແລະ ໂດຍສານຂະໜາດໃຫຍ່ ບໍ່ມີຄວາມຈໍາເປັນຫ້າມບໍ່ໃຫ້ມາ ນໍາໃຊ້ເສັ້ນທາງນີ້ ໃຫ້ໄປນໍາໃຊ້ເສັ້ນທາງອື່ນແທນ ຈົນກວ່າການກໍ່ສ້າງສໍາເລັດ.