ຕໍາຫລວດລົດໄຟ ຕ້ອງເພີ່ມທະວີປະຕິບັດໜ້າທີ່ໃຫ້ເຂັ້ມງວດ ເພື່ອຮັບປະກັນຄວາມສະຫງົບ-ປອດໄພ ໃນການຂົນສົ່ງ ແລະ ບໍ່ໃຫ້ເກີດມີປາກົດການຫຍໍ້ທໍ້

ວັນທີ 9 ມີນາ 2023 ນີ້, ທ່ານ ພັທ ຈັນສະໝຸດ ພົມມະຈັນ ຮອງຫົວໜ້າພະແນກຕໍາຫລວດລົດໄຟ ຫ້ອງຕໍາຫລວດ ປກສ ນວ ລາຍງານ ໃນກອງປະຊຸມສະຫລຸບການເຄື່ອນໄຫວວຽກງານວິຊາສະເພາະ ປະຈໍາປີ 2022 ແລະ ວາງທິດທາງແຜນການວຽກງານປີ 2023 ຂອງພະແນກຕໍາຫລວດລົດໄຟວ່າ: ໃນຕໍ່ໜ້າຄະນະພັກ-ຄະນະພະແນກຕໍາຫລວດລົດໄຟ ຈະສືບຕໍ່ເຮັດວຽກງານການເມືອງແນວຄິດ ໃຫ້ພະນັກງານ-ນັກຮົບ ມີແນວຄິດອຸ່ນອ່ຽນ, ທຸ່ນທ່ຽງ ມີສະຕິຕໍ່ການຈັດຕັ້ງ, ມີລະບຽບວິໄນເຂັ້ມງວດ, ລົງໂຄສະນາຢູ່ຕາມກຸ່ມບ້ານ ທີ່ມີເສັ້ນທາງລົດໄຟແລ່ນຜ່ານ ໃຫ້ເປັນປົກກະຕິ ໂດຍສົມທົບກັບພາກສ່ວນທີ່ກ່ຽວຂ້ອງ, ລົງກວດກາສະຖານທີ່ເກີດເຫດຕົວຈິງ, ສ້າງແຜນລົງຊຸກຍູ້ ແລະ ແຜນປ້ອງກັນງານສໍາຄັນຕ່າງໆ, ປ້ອງກັນເວນຍາມ ຢູ່ສະຖານີລົດໄຟຜູ້ໂດຍສານ ຕະຫລອດ 24 ຊົ່ວໂມງ, ຕິດຕາມກວດກາການເຂົ້າ-ອອກ, ຄົນຂຶ້ນລົດໄຟ ແລະ ສະກັດກັ້ນ ເຄື່ອງຂອງນໍາເຂົ້າ-ອອກ ທີ່ຜິດຕໍ່ລະບຽບກົດໝາຍ, ອອກກວດກາລາດຕະເວນຕາມແລວທາງລົດໄຟ ໂດຍສົມທົບກັບ ປກສ ເມືອງ ທີ່ມີເສັ້ນທາງລົດໄຟຜ່ານ ເພື່ອຕິດຕາມ ກວດກາບັນດາເປົ້າໝາຍທີ່ກໍ່ຄວາມບໍ່ສະຫງົບ ແລະງັດແງະລັກຊັບຢູ່ຕາມແລວທາງລົດໄຟ, ສົມທົບກັບພະນັກງານບໍລິສັດ, ລປພ ເພື່ອຈັດສັນຄວາມເປັນລະບຽບຮຽບຮ້ອຍຢູ່ສະຖານີລົດໄຟ.

ໃນປີ 2022 ມີປະກົດການຫຍໍ້ທໍ້ເກີດຂຶ້ນ 52 ເລື່ອງ, ແກ້ໄຂໄດ້ 22 ເລື່ອງ, ກັກຕົວເປົ້າໝາຍໄດ້ 18 ຄົນ ແລະ ຢຶດເຄື່ອງຂອງກາງຄືນໄດ້: ເຫລັກຮົ້ວກັ້ນແລວທາງລົດໄຟ 3 ແຜ່ນ, ເຫລັກທຸບເອົາຢູ່ໃນຝາປົກຮ່ອງນໍ້າສາຍໄຟຟ້າ, ຕາມແລວທາງລົດໄຟລາວ-ຈີນ 23 ກິໂລ, ເຫລັກໜີບຕໍ່ລາງລົດໄຟ 7 ຄູ່, ເຫລັກເສັ້ນຈະນຳເອົາໄປກໍ່ສ້າງ 100 ກິໂລ, ຮົ້ວອ້ອມແລວທາງລົດໄຟ 1 ແຜ່ນ, ເຫລັກໂຕນຜາປິດທາງຂຶ້ນລົດໄຟ 4 ແຜ່ນ, ໄດ້ມອບຄືນໃຫ້ບໍລິສັດ. ນອກນີ້ຍັງມີ ເຫລັກຫົວເສົາ 17 ອັນ, ນ໋ອດຈັບລາງລົດໄຟ 27 ອັນ, ເຫລັກລວດໜາມ 3 ໂຄ້ງ, ເຫລັກປິດຮ່ອງສາຍໄຟຟ້າ 3 ແຜ່ນ, ເຫລັກກັ້ນແລວທາງລົດໄຟ 16 ອັນ, ມອບຄືນໃຫ້ທາງບໍລິສັດ, ສາຍໄຟປອກ 24 ແມັດ.

ໂອກາດນີ້, ທ່ານ ພັທ ປທ ສີທາ ແກ້ວພິທູນ ຮອງຫົວໜ້າຫ້ອງຕໍາຫລວດ ປກສ ນວ ໄດ້ເນັ້ນໃຫ້ຄະນະພັກ-ຄະນະພະ ແນກຕໍາຫລວດລົດໄຟ ເປັນເຈົ້າການໃນການສະກັດກັ້ນ ແລະແກ້ໄຂປະກົດການຫຍໍ້ທໍ້ທີ່ອາດຈະຂຶ້ນໃນເສັ້ນທາງລົດໄຟ ລາວ-ຈີນ, ພ້ອມທັງເປັນເຈົ້າການໂຄສະນາຕໍ່ຕ້ານກຸ່ມຄົນໃສ່ຮ້າຍປ້າຍສີປະເທດຊາດ ທີ່ບໍ່ມີມູນຄວາມຈິງ ເຮັດໃຫ້ການນໍາໃຊ້ເສັ້ນທາງລົດໄຟ ລາວ-ຈີນ ນັບທັງຜູ້ໂດຍສານ ແລະການຂົນສົ່ງ ມີຄວາມເຊື່ອໝັ້ນ ແລະຮັບປະກັນຄວາມສະຫງົບ-ປອດໄພ.