ອົງການອະນາໄມໂລກຍ້ອງຍໍສປປ ລາວ ຕໍ່ຜົນສຳເລັດຄວບຄຸມພະຍາດໄຂ້ມາລາເຣຍ
March 9, 2023 - 3:14 PM
ອີງຕາມບົດລາຍງານຈາກອົງການອະນາໄມໂລກ(WHO) ໃຫ້ຮູ້ວ່າ: ສປປ ລາວ ສາມາດຄວບຄຸມການແພ່ລະບາດຂອງຂອງພະຍາດໄຂ້ມາລາເຣຍໄດ້ເປັນທີ່ໜ້າພໍໃຈ, ດ້ວຍການເຮັດໃຫ້ມີຈໍານວນຜູ້ຕິດເຊື້ອຫຼຸດລົງຫຼາຍຈາກທີ່ຄາດໄວ້ຈໍານວນ 462.000 ກໍລະນີ ໃນປີ 1997 ມາເປັນ 2.305 ກໍລະນີ ໃນປີ 2022.
ພະຍາດໄຂ້ມາລາເຣຍມີຍຸງເປັນຕົວນໍາເຊື້ອ, ເຊິ່ງກ່ອນໜ້ານີ້ 25 ປີ ໄຂ້ມາລາເຣຍໄດ້ແພ່ລາມເປັນວົງກ້ວາງຢູ່ ສປປ ລາວ ສ້າງຜົນກະທົບໃຫ້ແກ່ຄົນເຮົາແລະມີປະມານ 1.000 ຄົນ ໄດ້ເສຍຊີວິດຈາກການຕິດເຊື້ອ ແລະ ຫຼາຍພັນຊີວິດໄດ້ຮັບຜົນກະທົບໄລຍະຍາວຈາກການຕິດເຊື້ອໄຂ້ມາລາເຣຍ.
ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມ ພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃຫ້ຮູ້ວ່າ: ປັດຈຸບັນ ໄຂ້ມາລາເຣຍຕິດຕໍ່ໃນປະຊາກອນກຸ່ມນ້ອຍຢູ່ສປປ ລາວ ໂດຍພົບເຫັນຜູ້ປ່ວຍພຽງ 10% ຂອງ 5 ແຂວງ ຈາກທັງໝົດ 18 ແຂວງ. ຜູ້ຕິດເຊື້ອສ່ວນໃຫຍ່ແມ່ນຢູ່ເຂດຊຸມຊົນຫ່າງໄກ ແລະ ເຂົ້າເຖິງຍາກໂດຍສະເພາະແມ່ນກຸ່ມຊົນເຜົ່າ. ປັດຈຸບັນ ແມ່ນໄດ້ມີການສຸມໃສ່ການເຜີຍແຜ່ໃຫ້ຄວາມຮູ້ກ່ຽວກັບການປ້ອງກັນພະຍາດດັ່ງກ່າວໃຫ້ເຂົ້າເຖິງຢ່າງທົ່ວເຖິງຂຶ້ນຕື່ມ.
ຂ່າວ: CRI
