ພັກຝ່າຍຄ້ານຕວກກີຮ່ວມພະລັງ ສົ່ງທ່ານ ຄານທີ ເຄມັລ ລົງແທ້ຊີງຕໍາແໜ່ງຜູ້ນຳປະເທດ ໃນການເລືອກຕັ້ງໃຫຍ່ເດືອນພຶດສະພານີ້

ພັກຮ່ວມຝ່າຍຄ້ານຕວກກີທັງ 6 ພັກຮ່ວມພະລັງສົ່ງທ່ານ ເດມັລ ຄິລິກດາໂຣກລູ ຜູ້ນໍາພັກຝ່າຍຄ້ານຄົນປັດຈຸບັນ ອາຍຸ 74 ປີ ຈາກພັກ CHP ທ້າຊີງຕໍາແໜ່ງຜູ້ນໍາຕວກກີນໍາທ່ານ ເຣເຈບ ໄຕຢິບ ແອໂດອັນ ປະທານາທິບໍດີຕວກກີຄົນປັດຈຸບັນ ຈາກພັກ AKP ຜູ້ມີບົດບາດສໍາຄັນໃນວົງການການເມືອງຕວກກີມາເກືອບ 20 ປີ ໃນການເລືອກຕັ້ງໃຫຍ່ເດືອນພຶດສະພາປີນີ້.

ໂດຍທ່ານ ຄິລິກດາໂຣກລູ ສະເໜີວິໄສທັດ ແລະ ແນວທາງນະໂຍບາຍທີ່ແຕກຕ່າງຈາກທ່ານ ແອໂດອັນ. ພ້ອມໃຫ້ຄຳໝັ້ນຕໍ່ບັນດາຜູ້ສະໜັບສະໜູນວ່າ: ທ່ານຈະປົກຄອງຕວກກີຜ່ານການປອງດອງ ແລະ ການປຶກສາຫາລືລະຫວ່າງກັນ. ອີກທັງຍັງຈະປ່ຽນໃຫ້ຕວກກີກັບມາໃຊ້ລະບົບລັດຖະສະພາອີກ ຫລັງຈາກທ່ານ ແອໂດອັນ ພະຍາຍາມປ່ຽນຜ່ານໄປສູ່ລະບົບປະທານາທິບໍດີທີ່ເພີ່ມອໍານາດໃຫ້ຕົນເອງຢ່າງກວ້າງຂວາງເມື່ອປະມານ 5 ປີກ່ອນ.

ການປະກາດທ້າຊີງກັບທ່ານ ແອໂດອັນ ມີຂຶ້ນຫລັງຈາກຜູ້ນໍາຕວກກີຄົນປັດຈຸບັນກໍາລັງຜະເຊີນສຽງວິພາກວິຈານຢ່າງໜັກຈາກກໍລະນີວິກິດເສດຖະກິດໃນປັດຈຸບັນ ລວມທັງຜົນກະທົບຈາກເຫດແຜ່ນດິນໄຫວຄັ້ງໃຫຍ່ໃນວັນທີ 6 ກຸມພາຜ່ານມາ ເຮັດໃຫ້ມີຜູ້ເສຍຊີວິດ 5 ໝື່ນກວ່າຄົນ ໂດຍທ່ານ ຄິລິກດາໂຣກລູ ເດີນໜ້າໂຈມຕີລັດຖະບານຕວກກີຢ່າງໜັກ, ພ້ອມຊີ້ວ່າ: ເຫດການທີ່ເກີດຂຶ້ນກ່ຽວຂ້ອງກັບບັນຫາສໍ້ລາດບັງຫລວງ ແລະ ການກໍ່ສ້າງທີ່ບໍ່ໄດ້ມາດຕະຖານ.

ຫລາຍຝ່າຍຄາດວ່າ: ຕວກກີອາດຈັດການເລືອກຕັ້ງຄັ້ງສໍາຄັນໃນວັນທີ 14 ພຶດສະພານີ້ ຖ້າບໍ່ມີຜູ້ສະໝັກຄົນໃດໄດ້ຮັບຄະແນນສຽງສະໜັບສະໜູນເກີນ 50% ໃນການເລືອກຕັ້ງຮອບທໍາອິດ ຈະມີການຈັດການເລືອກຕັ້ງຮອບທີ 2 ເພື່ອຫາຜູ້ຊະນະຈະກ້າວຂຶ້ນມາດໍາລົງຕໍາແໜ່ງປະທານາທິບໍດີຕວກກີອີກ.

ອ້າງອີງ:

https://edition.cnn.com/…/turkey…/index.html

https://www.bbc.com/news/world-europe-64867467

https://www.dw.com/…/who-is-erdogan…/a-64910166