ໄນກີ້ ສົ່ງເກີບເຕະບານຄູ່ພິເສດໃຫ້ ເອັມປັບເປ້ ສະຫລອງທຳລາຍສະຖິຕິດາວຍິງສູງສຸດ ຕະຫລອດການຂອງ ເປແອສເຊ

ຄີລຽນ ເອັມປັບເປ້ ດາວຍິງທີມຝຣັ່ງ, ອາຍຸພຽງແຕ່ 24 ປີ, ກາຍເປັນຜູ້ຍິງປະຕູສູງສຸດຕະຫລອດການຂອງ ປາຣີ ແຊັງ-ແຊກແມັງ ເປັນທີ່ຮຽບຮ້ອຍ ຫລັງຫລ້າສຸດໄດ້ຍິງປະຕູທີ 201 ຂອງລາວໃຫ້ທີມໃນປາຣີສ ຊະນະ ນັອງ 4-2 ໃນວັນເສົາທີ່ຜ່ານມາ.

ຍີ່ຫໍ້ກິລາທີ່ຊື່ດັງຢ່າງ Nike ໄດ້ສົ່ງຂອງຂວັນແທນຄຳຊື່ນຊົມໃຫ້ ເອັມປັບເປ້ ຢ່າງໄວວາ. ດ້ວຍເກີບພິເສດ Nike Zoom Mercurial Superfly IX ທີ່ໄດ້ຮັບແຮງບັນດານໃຈຈາກ Mercurial Vapor XI ທີ່ລາວໃສ່ເມື່ອລາວຍິງປະຕູທໍາອິດໃຫ້ກັບ ປາຣີ ແຊັງ-ແຊກແມັງ ໃນເກມພົບກັບ Metz ໃນເດືອນກັນຍາ 2017.

ສຳລັບການເປັນຍິງປະຕູສູງສຸດຕະຫລອດການຂອງສະໂມສອນໃນອາຍຸພຽງແຕ່ 24 ປີແມ່ນເປັນເລື່ອງຍາກ. ແຕ່ນັ້ນແມ່ນສິ່ງທີ່ ຄີລຽນ ເອັມປັບເປ້ ເຮັດມັນໄດ້, ດ້ວຍການຍິງ 201 ໃຫ້ກັບສະໂມສອນ ນັ້ນເຮັດໃຫ້ລາວແຊງໜ້າສະຖິຕິເກົ່າຂອງ ເອດິສັນ ຄາວານີ ຜູ້ທີ່ເຮັດໄດ້ 200, ແລະ ນີ້ຖືເປັນຄວາມສຳເລັດໃນອາຊີບ.