ສົ່ງເສີມໃຫ້ເສດຖະກິດພາກເອກະຊົນພັດທະນາ ຢ່າງມີຄຸນນະພາບ ຫລາຍກວ່າ 60% ຂອງ GDP
ວິທະຍຸສາກົນແຫ່ງປະເທດຈີນ (CRI) ລາຍງານວ່າ: ວັນທີ 6 ມີນາ 2023 zjko,koU ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກ ຄອມມູນິດຈີນ, ປະທານປະເທດຈີນ ໄດ້ໄປຢ້ຽມຢາມສະມາຊິກພັກສ້າງສາ ປະຊາທິປະໄຕແຫ່ງຊາດຈີນ ແລະສະຫະພັນອຸດສາຫະກຳການຄ້າແຫ່ງຊາດຈີນ ທີ່ເຂົ້າຮ່ວມກອງປະຊຸມ ຄັ້ງທີ 1 ຂອງສະພາເປິກສາການເມືອງ ປະຊາຊົນແຫ່ງຊາດຈີນ ສະໄໝທີ 14. ສະມາຊິກສະພາເປິກສາການເມືອງ ປະຊາຊົນແຫ່ງຊາດ ໃນ 2 ອົງການດັ່ງກ່າວ ສ່ວນຫລາຍແມ່ນຊ່ຽວຊານ ໃນວົງການເສດຖະກິດ ນັກວິຊາການ ແລະນັກທຸລະກິດພາກເອກະຊົນ. ທ່ານ ສີຈິ້ນຜິງ ສົ່ງເສີມໃຫ້ວິສາຫະກິດພາກເອກະຊົນເພີ່ມທະວີຄວາມໝັ້ນໃຈ, ພັດທະນາຢ່າງກ້າຫານ, ເຮັດໃຫ້ເສດຖະກິດພາກເອກະຊົນພັດທະນາ ຢ່າງປອດໃສ ແລະມີຄຸນນະພາບສູງ.
ເສດຖະກິດພາກເອກະຊົນມີບົດບາດອັນສຳຄັນຕໍ່ການພັດທະນາ ເສດຖະກິດສັງຄົມ, ການປະກອບອາຊີບ, ລາຍຮັບດ້ານພາສີອາກອນ ແລະການປະດິດສ້າງໃໝ່ດ້ານວິທະຍາສາດເຕັກໂນໂລຊີ. ອີງຕາມຂໍ້ມູນ ສະແດງໃຫ້ເຫັນວ່າ ເສດຖະກິດພາກເອກະຊົນໄດ້ປະກອບສ່ວນດ້ານພາສີອາກອນຫລາຍກວ່າ 50% ຂຶ້ນໄປ, GDP ຫລາຍກວ່າ 60% ຂຶ້ນໄປ, ການ ປະດິດສ້າງໃໝ່ດ້ານເຕັກໂນໂລຊີ 70% ຂຶ້ນໄປ ແລະການປະກອບອາຊີບໃນຕົວເມືອງ 80% ຂຶ້ນໄປ.
ໃນຊຸມປີມໍ່ໆມານີ້, ປະເທດຕາເວັນຕົກໄດ້ໃຊ້ມາດຕະການສະກັດກັ້ນ ແລະກີດຂວາງຢ່າງຮອບດ້ານຕໍ່ຈີນ, ວິສາຫະກິດເອກະຊົນຫລາຍແຫ່ງ ຂອງຈີນ ເຊິ່ງລວມທັງບໍລິສັດຮວາເຫວີຍ ທີ່ເປັນວິສາຫະກິດໄຮເທັກໄດ້ຖືກ ກົດດັນ ແລະລົງໂທດ. ຜົນກະທົບຈາກການແພ່ລະບາດຂອງພະຍາດ ໂຄວິດ-19 ໄດ້ສ້າງຄວາມຫຍຸ້ງຍາກຢ່າງຫລວງຫລາຍໃຫ້ແກ່ວິສາຫະກິດ ເອກະຊົນຈຳນວນຫລວງຫລາຍ.
ໃນສະເພາະໜ້ານີ້, ລັດຖະບານຈີນ ຕ້ອງສົ່ງສັນຍານທີ່ແຮງກ້າເພື່ອຍົກສູງຄວາມໝັ້ນໃຈຂອງວິສາຫະກິດເອກະຊົນ, ສະໜັບສະໜູນ ແລະຊຸກຍູ້ໃຫ້ເສດຖະກິດພາກເອກະຊົນ ພັດທະນາຢ່າງມີຄຸນນະພາບສູງ.
