ສິງກະໂປຂະຫຍາຍເວລາກົດໝາຍຄຸມໂຄວິດ-19 ຕໍ່ 1 ປີ ກຽມຕັ້ງຮັບຖ້າເກີດສາຍພັນໃໝ່
ສິງກະໂປຂະຫຍາຍໄລຍະເວລາຄໍາສັ່ງເພື່ອສະກັດກັ້ນການແພ່ລະບາດຂອງໂຄວິດ-19 ອອກໄປອີກ 1 ປີເປັນຄັ້ງສຸດທ້າຍ ໃນວັນທີ 6 ມີນາ ເພື່ອໃຫ້ທາງການສາມາດຕອບສະໜອງໄດ້ຢ່າງທັນທີ ຖ້າເກີດເຊື້ອໂຄວິດ-19 ສາຍພັນໃໝ່.
ສໍານັກຂ່າວແຊນແນລນິວອາຊີຂອງສິງກະໂປລາຍງານວ່າ: ລັດຖະສະພາສິງກະໂປມີມະຕິເຫັນພ້ອມການແກ້ໄຂກົດໝາຍຢັບຢັ້ງການແພ່ລະບາດຂອງພະຍາດໂຄວິດ-19 (ມາດຕະການຊົ່ວຄາວ) 2019 ເພື່ອຂະຫຍາຍອາຍຸການບັງຄັບໃຊ້ກົດໝາຍຕາມມາດຕາທີ 7 ເຊິ່ງໃຫ້ອໍານາດລັດຖະບານໃນການອອກກົດລະບຽບເພື່ອປ້ອງກັນ, ຢຸດ ຫລື ຄວບຄຸມການລະບາດຂອງເຊື້ອໄວຣັສໂຄວິດ-19 ທີ່ເກີດຂຶ້ນໃນປະເທດ.
ທັງນີ້, ກົດໝາຍດັ່ງກ່າວໄດ້ລວມທັງ ການຈໍາກັດການເດີນທາງເຊັ່ນ: “ມາດຕະການຕັດວົງຈອນການແພ່ລະບາດ” ທີ່ເລີ່ມໃຊ້ມາແຕ່ເດືອນເມສາ-ມິຖຸນາ 2019.
ວັນທີ 6 ມີນາ, ທ່ານ ຈານິລ ພຸດທູເຈຍຣີ ລັດຖະມົນຕີອາວຸໂສກະຊວງສາທາລະນະສຸກສິງກະໂປ ກ່າວຕໍ່ລັດຖະສະພາວ່າ: ເຖິງວ່າສິງກະໂປໄດ້ຈັດໃຫ້ເຊື້ອໄວຣັສໂຄວິດ-19 ເປັນພະຍາດສະເພາະຖິ່ນແລ້ວ ແຕ່ປະຊາຊົນຕ້ອງບໍ່ລະເຫລີງໃຈ.
ໃນເດືອນຜ່ານມາ, ສິງກະໂປໄດ້ຫລຸດລະດັບການເຕືອນໄພພະຍາດໂຄວິດ-19 ລົງສູ່ລະດັບຕໍ່າສຸດນັບແຕ່ການລະບາດເລີ່ມຕົ້ນຂຶ້ນ ແລະ ຍົກເລີກມາດຕະການຈໍາກັດໂຄວິດ-19 ປະການສຸດທ້າຍ ຄືການບັງຄັບໃຫ້ປະຊາຊົນໃສ່ຜ້າປິດປາກໃນລະບົບຂົນສົ່ງສາທາລະນະ ຕະຫລອດຈົນໂຮງໝໍ ແລະ ເຮືອນພັກຜູ້ສູງອາຍຸ.
