ເລຂາ UN ເຕືອນ ໂລກອາດຕ້ອງໃຊ້ເວລາອີກ 300 ປີ ກວ່າຈະບັນລຸເປົ້າໝາຍຄວາມເທົ່າທຽມທາງເພດ
ທ່ານ ອັນໂຕນິໂອ ຕູເຕີເຣັສ ເລຂາທິການອົງການສະຫະປະຊາຊາດ (UN) ອອກມາກ່າວເຕືອນວ່າ: ເປົ້າໝາຍໂລກທີ່ມີຄວາມເທົ່າທຽມທາງເພດນັ້ນຫ່າງໄກອອກໄປເລື້ອຍໆ ແລະ ອາດຕ້ອງໃຊ້ເວລາເຖິງ 300 ປີ ກວ່າຄວາມສະເໝີພາບຈະເກີດຂຶ້ນ ເນື່ອງຈາກປັດຈຸບັນຄວາມຄືບໜ້າດ້ານສິດທິແມ່ຍິງທົ່ວໂລກນັ້ນ “ຫາຍໄປຕໍ່ໜ້າຕໍ່ຕາ”.
“ເປົ້າໝາຍຄວາມເທົ່າທຽມທາງເພດນັ້ນຫ່າງໄກອອກໄປເລື້ອຍໆ ໂດຍອົງການເພື່ອແມ່ຍິງແຫ່ງສະຫະປະຊາຊາດ (UN Women) ປະເມີນຈາກສະຖານະການປັດຈຸບັນວ່າອາດຢູ່ຫ່າງໄກອອກໄປເຖິງ 300 ປີ” ທ່ານ ກູເຕີເຣັສ ກ່າວສູນທອນພົດຕໍ່ກອງປະຊຸມສະມັດຊາໃຫຍ່ ກ່ອນວັນແມ່ຍິງສາກົນຈະມີຂຶ້ນໃນວັນທີ 8 ມີນາ.
“ສິດທິຂອງຜູ້ຍິງກໍາລັງຖືກຂົ່ມເຫັງ, ຖືກຄຸກຄາມ ແລະ ຖືກລະເມີດທົ່ວໂລກ” ທ່ານ ກູເຕີເຣັສ ກ່າວ. ພ້ອມຍົກວິກິດການຕ່າງໆທີ່ຜູ້ຍິງຕ້ອງຜະເຊີນເຊັ່ນ: ການເສຍຊີວິດຂອງມານດາລະຫວ່າງຖືພາ ຫລື ຫລັງໃຫ້ກໍາເນີດລູກ (Maternal Mortality), ເດັກຍິງຈໍານວນຫລາຍທີ່ຫລຸດອອກຈາກລະບົບການສຶກສາ ແລະ ເດັກທີ່ຖືກບັງຄັບໃຫ້ແຕ່ງດອງກ່ອນໄວອັນຄວນ.
ນອກຈາກນີ້, ທ່ານ ກູເຕີເຣັສ ຍັງໄດ້ເນັ້ນເຖິງສະຖານະການທີ່ໜ້າເສົ້າຂອງແມ່ຍິງໃນອັບການິດສະຖານ ເຊິ່ງປັດຈຸບັນຖືກປົກຄອງໂດຍລັດຖະບານຂອງກຸ່ມຕາລີບັນ, ຜູ້ຍິງ ແລະ ເດັກ ຖືກຈໍາກັດສິດໃນການດໍາລົງຊີວິດ ແລະ ມີລາຍງານວ່າ: ຜູ້ຍິງຖືກກີດກັນບໍ່ໃຫ້ເຂົ້າຮັບການສຶກສາ. ຂະນະທີ່ອີກຫລາຍພື້ນທີ່ທົ່ວໂລກ ຜູ້ຍິງຕ້ອງພົບກັບການຫລຸດສິດທາງເພດ ແລະ ສິດອະນາໄມຈະເລີນພັນ, ສ່ວນຢູ່ບາງປະເທດມີສະພາບແວດລ້ອມທີ່ອັນຕະລາຍເຖິງຂັ້ນວ່າເດັກຜູ້ຍິງອາດຖືກລັກພາຕົວ ຫລື ຖືກຂົ່ມຂືນຂະນະເດີນທາງໄປໂຮງຮຽນ.
ໃນໂອກາດນີ້, ທ່ານ ກູເຕີເຣັສ ໄດ້ຮຽກຮ້ອງໃຫ້ລັດຖະບານ, ພາກປະຊາສັງຄົມ ແລະ ໜ່ວຍງານເອກະຊົນທົ່ວໂລກ ປະສານການຮ່ວມມືກັນເພື່ອສ້າງລະບົບການສຶກສາທີ່ມີຄວາມເທົ່າທຽມ, ພ້ອມພັດທະນາທັກສະໃຫ້ທຸກເພດ ແລະ ຍົກລະດັບການລົງທຶນ ເພື່ອຫລຸດການແບ່ງແຍກເພດລົງໃຫ້ຫລາຍທີ່ສຸດ.
ອ້າງອີງ:
https://www.theguardian.com/…/antonio-guterres-un…
https://edition.cnn.com/…/un-gender-equality…/index.html
