ເດືອນມັງກອນ 2023 ມູນຄ່າການນໍາເຂົ້າ-ສົ່ງອອກສິນຄ້າ ບັນລຸໄດ້ 935 ລ້ານໂດລາ ແລະ ຂາດດຸນການຄ້າ 13 ລ້ານໂດລາ
ສູນຂໍ້ມູນຂ່າວສານທາງດ້ານການຄ້າ ກະຊວງອຸດສາຫະກຳ ແລະ ການຄ້າ ລາຍງານວ່າ: ມູນຄ່າການນໍາເຂົ້າ ແລະ ສົ່ງອອກ ສິນຄ້າ ຂອງ ສປປ ລາວ ປະຈໍາເດືອນ ມັງກອນ ປີ 2023 ບັນລຸໄດ້ ປະມານ 935 ລ້ານໂດລາສະຫະລັດ. ໃນນີ້, ມູນຄ່າການສົ່ງອອກ ປະມານ 461 ລ້ານໂດລາສະຫະລັດ, ມູນຄ່າການນໍາເຂົ້າ ປະມານ 474 ລ້ານໂດລາສະຫະລັດ ແລະ ຂາດດຸນການຄ້າ ປະມານ 13 ລ້ານໂດລາສະຫາລັດ.
ສິນຄ້າທີ່ສົ່ງອອກຫລາຍ ປະກອບມີ: ມັນຕົ້ນ, ຄຳປະສົມ ແລະ ຄຳແທ່ງ, ແຮ່ທອງ, ເກືອກາລີ, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ… ສິນຄ້າທີ່ນໍາເຂົ້າຫລາຍ ປະກອບມີ: ນ້ຳມັນກາຊວນ, ອຸປະກອນກົນຈັກ, ພາຫະນະທາງບົກ, ນ້ຳມັນແອັດຊັງ ແລະ ຊິ້ນສ່ວນອາໄຫລ່ລົດ…
ສຳລັບສິນຄ້າສົ່ງອອກຕົ້ນຕໍ 10 ອັນດັບໄດ້ແກ່: ມັນຕົ້ນ ປະມານ 89 ລ້ານໂດລາສະຫະລັດ, ຄຳປະສົມ ແລະ ຄຳແທ່ງ ປະມານ 59 ລ້ານໂດລາສະຫະລັດ, ແຮ່ທອງ ປະມານ 29 ລ້ານໂດລາສະຫະລັດ, ເກືອກາລີ ປະມານ 27 ລ້ານໂດລາສະຫະລັດ, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ ປະມານ 27 ລ້ານໂດລາສະຫະລັດ, ໝາກກ້ວຍ ປະມານ 24 ລ້ານໂດລາສະຫະລັດ, ເຄື່ອງນຸ່ງຫົ່ມ ປະມານ 23 ລ້ານໂດລາສະຫະລັດ, ເຍື່ອໄມ້ ແລະ ເສດເຈ້ຍປະມານ 17 ລ້ານໂດລາສະຫະລັດ, ນ້ຳຕານ ປະມານ 16 ລ້ານໂດລາສະຫະລັດ ແລະ ແຮ່ເຫລັກ ປະມານ 13 ລ້ານໂດລາສະຫະລັດ.
ສ່ວນສິນຄ້ານໍາເຂົ້າຕົ້ນຕໍ 10 ອັນດັບ ໄດ້ແກ່: ນ້ຳມັນກາຊວນ ປະມານ 93 ລ້ານໂດລາສະຫະລັດ, ອຸປະກອນກົນຈັກ ປະມານ 34 ລ້ານໂດລາສະຫະລັດ, ພາຫະນະທາງບົກ ປະມານ 32 ລ້ານໂດລາສະຫະລັດ, ນ້ຳມັນແອັດຊັງ ປະມານ 21 ລ້ານໂດລາສະຫະລັດ, ຊິ້ນສ່ວນອາໄຫລ່ລົດ ປະມານ 20 ລ້ານໂດລາສະຫະລັດ, ເຫລັກ ແລະ ເຄື່ອງທີ່ເຮັດດ້ວຍເຫລັກ ປະມານ 19 ລ້ານໂດລາສະຫະລັດ, ເຄື່ອງໃຊ້ທີ່ເຮັດດ້ວຍພລາສະຕິກ ປະມານ 16 ລ້ານໂດລາສະຫະລັດ, ສາຍໄຟຟ້າ ແລະ ເຄເບີ້ລ ປະມານ 14 ລ້ານໂດລາສະຫະລັດ, ເຄື່ອງໄຟຟ້າ ແລະ ອຸປະກອນໄຟຟ້າ ປະມານ 12 ລ້ານໂດລາສະຫະລັດ ແລະ ເຍື່ອໄມ້ ແລະ ເສດເຈ້ຍ ປະມານ 11 ລ້ານໂດລາສະຫະລັດ.
ປະເທດສົ່ງອອກຕົ້ນຕໍ 5 ອັນດັບໄດ້ແກ່: ປະເທດຈີນ ປະມານ 156 ລ້ານໂດລາສະຫະລັດ, ໄທ ປະມານ 128 ລ້ານໂດລາສະຫະລັດ, ຫວຽດນາມ ປະມານ 65 ລ້ານໂດລາສະຫະລັດ, ອົດສະຕາລີ ປະມານ 41 ລ້ານໂດລາສະຫະລັດ ແລະ ສະວິດເຊີແລນ ປະມານ 14 ລ້ານໂດລາສະຫະລັດ.
ປະເທດນໍາເຂົ້າຕົ້ນຕໍ 5 ອັນດັບໄດ້ແກ່: ໄທ ປະມານ 255 ລ້ານໂດລາສະຫະລັດ, ຈີນ ປະມານ 121 ລ້ານໂດລາສະຫະລັດ, ຫວຽດນາມ ປະມານ 21 ລ້ານໂດລາສະຫະລັດ, ສະຫະລັດອາເມລິກາ ປະມານ 14 ລ້ານໂດລາສະຫະລັດ ແລະ ອົດສະຕາລີ ປະມານ 12 ລ້ານໂດລາສະຫະລັດ.
ມູນຄ່າການນໍາເຂົ້າ ແລະ ສົ່ງອອກ ປະຈໍາເດືອນ ມັງກອນ ປີ 2023 ແມ່ນຍັງບໍ່ກວມເອົາມູນຄ່າການນຳເຂົ້າ ແລະ ສົ່ງອອກ ໄຟຟ້າ (ສໍາລັບມູນຄ່າການນຳເຂົ້າ ແລະ ສົ່ງອອກ ໄຟຟ້າ ພວກເຮົາຈະເອົາລົງພາຍຫລັງທີ່ເກັບກໍາຕົວເລກສະຖິຕິໄດ້ຄົບຖ້ວນ ແລະ ຊັດເຈນແລ້ວ).
